Library

Асквш 2013 февраль а 19 Черкесск, а-Печать а-Тдзы, ареспублика газет «Абазашта» аредакция апны а-Дуней абаза-апсуа адкIылара «Алашара» ахъвшараква рунашвачпагIвчва «Абазашта» газет аредактор хъада, КЧР АуагIа Айззара (а-Парламент) адепутат Къвыл Фардауыс йлынйатI, йлабадыртI.

«Абазашта» газет ареспублика йтабзазауа абазаква йырхабарргага хъадапI: ауи анапаква йгIарыквшвитI акытква рхабарква, агIаншара шIыцква рунашва. Ауи ахIатырла «Алашара» адкIылара ргIаджвыквцIараква, йдырхъйауа ауысква рунашва агазет йгIаквцIара ауысла рацынхара магIны амапI.

Агазет аредактор хъада аредакция йрылшауа амальква гIадрысабапуамцара «Алашара» адкIылара йшрыцынхуш йазлыргвыгъатI. Анйара апны Фардауыс рыцIа йхъаду ауагIахъа уысквагьи гIащтIылхтI, йалкIгIата абаза чкIвынргIа зынйауа абаргвыраква, хIыбызшва, хIкультура, хIцIасква ргIахчарала йчпачIву, чкIвынргIа рквтала анхадара ауыс агьиква. Агазет хачIвыта йархъйауа даквгIашIастI, атираж йалахIархIара шатахъу гIалылкIгIатI. «Абазашта» газет апхьагIвчва рпны асабикви чкIвынргIи рпхьадзара йалахIара ахъазла аредакция йакIвдыршалун анкъвакъвраква: «Насыпла йырчву асабихъа», «Абазашта а-Мисс», «Абаза тгIачва». Асквш ауацIа нархарата йлыхула агIвыракви асураткви гIаквырцIалун, асквш ацIыхъва афиналисткви апхъагылагIвчви щаквдыргылуан, адипломкви асогIакви рыртлун. Ахча гIалцIырта ъарымахым ашвхIаусыгIвала абарат анкъвакъвраква гьакIвдыршахуам.

Къвыл Фардауыс лгвы йасуата далачважвитI «Ажурналист шIа» кружок анхара ъашIасхызгьи. Ауи Абаза район йаланакIуа АлбыргIан кыт апхьарта апны йынхун. Акружок акIвзыршауа нхаша йыртныс апхьарта йъарылымшуз ашвхIаусыгIвала акIвпI ауи уахьчIвала йызнымхахуа. Фардауыс дышгвыгъауала, ажвлараква йгьи а-Дуней абаза-апсуа адкIылара «Алашара» цхърагIара гIандыршузтын апхьартаква рпны хъашыгIври гвышхвари злу асабиква рыхъазла афакультативкви акружоккви акIвыршала йауаштI. ХIугIахъа уахьчIва ажурналистквала, ауысагIвквала, алитераторквала, асуратчпагIвчвала, акомпозиторквала йбжапI, чкIвынргIа хIугIахъа ркультура атшауацIнарыхра йазынарху аъачIвагIаквала йрыхIазырра атахъыпI. Аредактор хъада датшагьи йгIащтIылхыз ауысква йрыуапI Къарча-Черкес педагогика колледж апны ажурналистика апычIв дырраква рымата ъачIвагIагIвчва дрыхIазырныс.

Анйара апны Къвыл Фардауыс «Алашара» адкIылара ргватра асабиква, апхьагIвчва йъарзынарху дазыразта далачважватI, йшпакIву ухIварыквын ауат ракIвпI хIугIахъа рпхыцIа ауысла апхъахьыла уызквгвыгъушта йаъу. УахьчIвала абаза бызшвала йатакIу амультфильмква пщба йнадзитI. Ари ауыс рбзира ду алапI Абаза район ахъада йъанатIа нкъвызгуз Уаз Мурати акъарча-балкъар чкIвынргIа рфонд «Эльбрусоид» аунашвачпагIв Тоторкулов Алии. Ари анархарала хIашIамсуа хIынхара атахъыпI, йауа ухIварыквын хIыбызшва гIахIхчара ахъазла цри бызшвала асаби книгаква, амультфильмква, акинофильмква, ашваква щардата йаъазара атахъыпI.

АгIвтланыкъвакIгьи ацынхара ауысла йангIалтI. «Абазашта» газет аредакция «Алашара» адкIылара анхара гIазырбауа агIвыраква агазет анапа хвыдъа йгIаквырцIаланыс йхIазырпI.

Бежан ГIайщат.
Информацияли рхъвыхрали «Алашара» ахъвшара.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki