Library

АйъазагIвра зъачIвагIу агIвычIвгIвыс ачымазагIвква бзибара рызйымазара атахъыпI. АуагIа урайъазарныс ахъазла ауыс бзита йудырра атахъыпI.
Хвына Заудин Дагъаза йпа зыхьыз дута йырхIвауа айъазагIвчва дрыуапI, ауи айъазара зща йалата Анчва йгIайшаз дгIвычIвгIвыспI. Хвына Заудин асквш 1939 декабрь а 5 Къвбина кыт дйытI. Асквш 1959 рызна медальла аквтанай апхьарта дгIалган йапхьара Ставрополь къральыгIва медицина институт апны йнайырдзахтI. Аинститут диплом «къапщыла» йгIалгаз аъачIвагIагIв шIа АдгьахIабльа район чымазагIвтара нхара дырщтитI, дукI йнамихуата ауи ачымазагIвтара даунашвачпагIвхатI. Ари аъанатIа ахъвдаквцIаракви аркъьагIвы йхачIвкви адикIылуа дынхун.


Аинститут дапхьаркIвауата Заудин Дагъаза йпа анаука рхъвыхраква дрызъазата тшгIайырбатI. Аинститут аунашвачпагIвчва ауи аспирантура дыцIалныс йызнымкIва даквдыргвышхвун. Анхара дхънакъьалыргьи анаука тшгьачвйымрыхъаратI. Кандидат диссертация дадынхалуата адунейла йбергьльу аъачIвагIагIвчви апхьахьакви рынхара 380 раъара цIолата тшрыхайыргIвазатI, йкандидат диссертация атемала цгIвыракI гIацIищттI.
Хвына Заудин Дагъаза йпа «Россия Федерацияла гIатгара зму айъазагIв», «СССР азгIвадарахчара анхагIв бзидздза» чIахIныгIва хьызква гIайквнадыргатI. «Солнечна» санаторий-профилакторий адгалра къару ду адигалтI, анхагIвчва гвып йхъатала йадикIылтI. Заудин Дагъаза йпа йылшатI ари айъазарта Россия ауацIала рыцIа йагъькву асанаторийква йрыларпхьадзарныс.
УахьчIвала «Солнечна» профилакторий аврач хъада йхъвдаквцIараква йырхъйауата Хвына Заудин жвлара уыс къомкIгьи нкъвигитI: Къарча-Черкес Республика ашта айъазара палатагьи, КЧР а-«Росздравнадзор» ажвлара советгьи, Россия апны хъатачIв нхарта змата йынхауа айъазагIвчва йапхъахауа радкIыларагьи друнашвахъцIагIвпI, адунейла аурологква-андрологква р-АдкIылара далапI.
Асквш 2012 йгIашIарышвта Заудин Дагъаза йпа а-Дуней адкIылара «Алашара» згIвадарахчарала ахъвшара аэкспертква рсовет даунашвчпагIвпI. АдкIылара аэкспертква ауи йыхъазла йацзакIыта напIы щтIырхтI, йкьангьашраквагьи йбжьагажваквагьи рыларкIуата апрограммаквагьи апроектквагьи йрыдынхалуан. «Алашара» адкIылара ахьызла Хвына Заудин Дагъаза йпа данйы амшла хIйайхIвахIвитI, згIвадара багъьи насып дуи йзыхIтахъпI, агвщтIыхра йыгымхаргIатI, ймайрам йынхара апны апхъахьылагьи адахIвра дуква йымазтI.

ЕмгIвыкъва Оксана
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki