Library

Уаз Елена лсабихъа ангIалгвалашвахуа тIакIвгьи дпшвырхъыччитI. Ауи агIан аткванква йыртиуаз ачгIвычаква закIыла йгIалукIгIушта йгьаъамызтI. Йынкъвылгуз ачгIвычаква чIащыгIваракI рылалцIара лтахъыта адзахра тшазылбжьатI. Адзахра ауыс ага бзи йылбарыгьи йылъачIвагIахарныс дгьащтамызтI. Ашхабад ауниверситет апны финансистта дапхьатI. Апхьара даналга амщтахь ХIабаз йтагылаз азавод «Виток» апны сквшы 20 райхIа дынхатI: апхъапхъа экономистта, уадыргIвана апрофком даунашвачпагIвта.

Адзахра амальынтшата акIвпI йшылъачIвагIахаз: й-90-хауа асквшква рагIан азавод хъыргIвахын нхадата дгIанхатI. Ауи амщтахь бзи йылбауата дыззычпаз ауыс хъаталкIытI. АлбыргIан апхьарта апещкI багьандата йгIалахвын дзахырта гIахъылтIытI. Араъа ауи датшагьи цгIвы лыцынхауа йалагатI.
УадыргIвана Уаз Елена гвыгIвбара лыларкIвата тгIачвала Черкесск дталхтI. Араъа бзазартагьи нхартагьи гьлымамызтI. Дзахырта гIахъылтIызтIхIва багьандата йгIалахвуаз апещква лара лкъарула йлырчIаджьуан, ауаса йызнымкIва йылпсахра атахъхатI. ДгIапсазтынгьи луыс ащапIы багъьата йхвынлыргылтI. УахьчIвала Уаз Елена лдзахырта апны хыгIв нхитI. ЙцIыхъвахауа ажвасквша руацIа ауат йалкIгIата ащхъа уагIахъа фашаква рдзахра тшазынадырхатI.
АуагIахъа фашаква рдзахра ауысла апхъапхъа Уаз Елена йгIалыдгылыз «Нарт» ашвахIвагIвчва гвып йалакву ракIвпI, уадыргIвана «Абазинка» ансамбль агIахIвыгIвчва гвып. Ауаса зымгIва рацкIыс уыс баргвы ларгьи йлыцынхауа адзахыгIвчвагьи рпахь йгIащтIазцIаз ауи агIан йгIаншагIвацаз агIахIвра театр «Меркурий» ракIвпI. ДзахчIвыта йырпыраз ауи аъара йалачпанта акъыльпшгIара ду гIадрысабаптI, ръазарагьи рдырраквагьи йрылазырхIаз нхарата йалтI.
– Ансамбль агIаныршагIвы Дерев Станислав цIаста йщаквгылу афашаква рквпшыра мачIкI йпсахныс гIайтахъхатI, – йхIвитI агвып музыка ауысла унашва рхъызцIауа Аджьбакь Валерий. – Лена АлахI дылзыразхатI. Швабыж лгвы аквкIта ауыс дадгылтI. Лагъь КIавкIаз шабгу гIамударыгьи хIара йхIыму афашаква рапш датша заджвгьи йгьйымам.
– АкIвымжвквагьи ахIвссаква рфашаквагьи агIахIвра апны йаквшвалара атахъыпI, – йгIацицIахтI агIахIвра театр абалетмейстер Гаги Мурат. – ЙаъапI уагIахъа гIахIвра псейспа афаша айшысква знымгIалуа. Араъа зкIалтаква ауыру афашаква рыцIа йангIалитI. АгIахIвра ласква рпны йыршвырцIауа афашаква, акIвымжвква рыцIа йласыпI. Лена йзачIвгIахIвразлакIгьи йангIалуа афаша аквпшыра шаъазара атахъу лылалхIвауата пшдзата йгIанлыршитI, йылдзахитI.
Ауат рхъвыцща йацикIуата дчважвитI Къарча-Черкес республика акъральыгIва ансамбль «Эльбрус» аунашвачпагIв Байрамыкъва ИсмагIильгьи. Ауи йшыпхьадзауала, Уаз Елена ауагIахъа фашаква рдзахра швабыж дазъазапI:
– ХIхаквлагIв лъазара йаквшахIатпI уагIахъа фашала Москва апны йакIвшуз афестиваль апны ауи йгIалквнадыргаз адипломгьи. Адиплом «КIавкIаз ауагIахъаква руагIахъа фаша» номинацияла апхъагылара шгIатылгаз йагIарбагапI.
УахьчIвала Къарча-Черкес аршIыйара гвыпква рфашаква Уаз Елена лпны йшырдзахуаш йащтапI. Афаша анадзара хIагIа йахъазымкIва ауагIа лгвапара гвхвгIагата йырзалитI, руыс зкву гIалгвынгIвуата дрыцынхитI. Асаби ансамбль «Къарча» Уртенова Тамара Уаз Елени лари рацынхара араса даквчважвитI:
– ГвжважвагIвала уыскI рхъйара анатахъу Лена дызлу анхараква зымгIва налрыскIьитIта угвжважвагIва тылщтитI.
Уаз Лена асабиква дшырзыъу гIалукIгIушта йаъапI:
– АгIахIвра тшазызбжьауа асабиква рыуа щардагIвы фаша злардзахуаш ахча рзымхъауатагьи йгIаншитI. Ауаса йанцарагьи йсылшауала сырцхърагIитI – лхIвитI ауи. АдзахыгIв ъаза закIзаджвыкI акIвпI лгвы йасуата йгIалрахауа – чкIвынргIа дызланхауа аъачIвагIа тшачвдрыхъаритI.
– Аучилища сцан арыпхьагIвчва-бжьагIвчва срыцта апхьагIвчва срынйатI, нхара йсызгIайныс йгIасрайгватI. ЙсызгIайуашыз заджвгьи дгьгIарылымцIтI. Ари аъачIвагIа уаланхара ахъазла бзи йубара атахъыпI, ауаса араса ауыс згвы азыцхIауата йаъу мачIыгIвдзапI, – лхIвитI лгвы йасуата Елена. – АхIвссаква дизайнерханыс, модельерханыс ртахъыпI, ажва «дзахгIвы», йара адзахра уыс тшадыркIылныс йшвитI.
Ауаса йаъазтIхIва Уаз Елена лгвы гьылрыдзуам. АуагIа лыргвыргъьауа дашIамсуа дынхитI. Асцена апны йгIахъвмаруа артистква пшдзата йгIвычата йангIаквылуа хIыуа дзычIвызлакIгьи йгвы йаналахIауа ларгьи лгвы гIащтIыцIитI, лъачIвагIа лхъа аладухитI.

ЧкIала Георгий
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki