Library

Абазакви апсуакви йгIарылцIыз амхIаджьырква адуней къраль щарда йрылапсахатI. Ауаса ауат йгIархъшахъыцIуаз абанпараква зынгьи рабадучва рпсадгьыл КавкIаз зынгьи йгьырхъдымраштылуазтI. АйъазагIв Бакьыр АхIмад КIважв йпа Сирия йтагылу аль-Кунейтра къала апны зыхьыз бергьльу абзазагIвчва дрыуан. ЙмхIаджьырхаз ауи йапхъанчIви цриква Апсны йтыцIын Сирия йталхтI (ауи атлахан ари ашта Осман паштахIыгIва йаланакIуан).  Йара Бакьыр АхIмад асквш 1953 агIан аль-Гассаниа кыт апны дйытI. Дамаск апны аквтанай апхьарта дангIалга Россия АуагIахъаква Райгвара р-Университет айъазара факультет дыцIалтI. Йдырраква бзидздзата ауаъа дангIалга СССР анаукаква р-Академия анаука-рхъвыхра институт аспирантура зынла днарахвтI.

Бакьыр АхIмад йдиссертация агIвычIвгIвыс йгвы йайъазауата йырчпауа аркъьараква йырзынархан, архъвыхра нхараква чымазагIв 50-гIвы гIацIанакIуата йакIвйыршун. Бакьыр АхIмад ари анархара дгIаквчважвауата наука гIвыра бзидздза гIацIищттI. Ауат рбзирала рыцIа йкъыту агвыхь згIваква злащаквыргыл, ркъьарала уызлайъаза йауаш амаль шIыц гIандыршатI.

Адиссертация йхчата амедицина наукаква даныркандидатха амщтахь Бакьыр АхIмад Сирияла дацапахтI. ГIамта айшысла ауи агвыхьква рхирургия айъазара апны зыхьыз бергьльу айъазагIвчва дрыларпхьадзатI. Здырраква цIолу айъазагIв кардиологква ргвып друнашвачпагIвта агIвычIвгIвыс йгвы зларпсахуа аркъьара Сирия апны йапхъахауата ауи йакIвйыршатI. АуагIахъа рызгIвадара агIахчара йхатI дудздза ъалу гIапхьадзахауата асквш 1991 агIан Сирия ГIарып Республика ауи асхъан йапрезидентыз Хафез аль-Асад Бакьыр АхIмад акъраль апны ЙхIаракIу а-Орден гIайквнайыргатI.

Апсны апны айсра анакIвшуз (асквшква 1992-1993 рагIан) Бакьыр АхIмад йапхъанчIвиква р-Псадгьыл рыцIа йзыбжата йпхьадзатI. Йшатахъу апш дадгаламкIва ауи зхвыртаква рыцIа йхьантаз айсыгIвчва апсра йгIашIигауа драйъазун. Амамыр бзазара анщаквгыл амщтахь йырхъвыхра нхара Санкт-Петербург апны йджвыквицIаныс ймурадын. Ауаса йгьгIайдамыхIвтI: асквш 1994 агIан Бакьыр АхIмад ъазагIва змам азгIва гIайыдсылын гIвысквша ахIа днамихуата дагатI. Йыцынхаквузгьи йыгIвзачвагьи швкIыгIвпхьадзара йнадзауата дызквылыз йцIыхъвахауа ахрат мгIва апны днардастI. Асквш 1996 апрель а 28, акъвырман тлапIа йапхъахуз атшын, Дамаск йаргвану Гута шта апны Бакьыр АхIмад ачIвыла дарттI. Араъа акIвын ауи йабагьи дъагIадрийыз, дъабзазуз.

Емельянова Надежда
«Абаза Къраль» сайт йазалхпI

АгIвыра Бакьыр АхIмад йынхара-бзазара зырхъвыхуа Аднан Кобартая агIарып сайтква йгIарыквицIаз аматериалква гIазщтийыз «Абаза Къраль» сайт апхьагIвчва рахIварала йадгалапI. АгIарып гIвыраква атазкIыз Жарир Гуссус йакIвпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki