Library

ХIкъраль апны май мыз агIапын гвыргъьахъвмшква АйгIайра Амш анур рхъагылата йакIвшитI. Абашта айсра Ду йахъыцIуа асквш 68 агIаталымта а-Дуней жвлара адкIылара «Алашара» анхагIвчва гвып абаза кытква йыртабзазауа айсыгIвчва ветеранква йрынйатI, адкIылара а-Президент Егьзакь Муса йыхьызла йрайхIвахIвын асогIаква рнапIыцIарцIатI.

ХвынзыкьыгIв йнадзауата хI-Псадгьыл ахъазла айсра йпшцIалыз абазаква йрыуата уахьчIвала абгата йгIанхаз йнадзауа жвагIв ракIвпI. Рхъвыхра хьантата рчва йтшаз амщтахьгьи арат афырква щтахьла йгьгIатымхъатI, рхъахв гьнадмыркъвытI, гвыла йхътIыта, амшыркъвара ркьахврата, гIвычIвгIвыс пшдзата йгIабзазатI. Ауат рбзазаща пшдза уыжвгIанчIви чкIвынргIа зшIпшы йауаш швапха бзипI. Абарат ахъвыцраква узыгIацIситI ауат йчкIвынчва шIата айсра йшпшцIалыз, айсра айбащраква чвгьаква, рынбжьагIвчва фырква, рыла йыцIсыз агIазаби агIапсари гIаргвалашвахта йанырхIвахуа.
«Алашара» анхагIвчва аветеранква рбзазаща шаъу йазцIгIатI, акъраль йгIарнатуа ацхърагIара анадзара йалачважватI. Абжараква ррыдзрала амальква нахвра шатахъу щаквдыргылтI, йшпакIву ухIварыквын уыздынхалуаш гьмачIым: аинвалидква рныкъвара зрымайруш амальква рыгхитI, айъазагIвчва йгьи асоциал нхагIвчва йнардзу гватра гьрызрымам. ЙащтагIайуаз амшква руацIа акъраль йгIарнатуа ацхърагIара абгата йгIарайдзаныс ахъазла йатахъу ашвъаква радгалрала ТIапIанта кыт йауу аветеран Къалмых СултIан ИсхIакъ йпи АлбыргIан кыт йауу аветеран Йуан Бахсит Асльангьари йпи йырцхъарагIатI.
Дара аветеранква йшырхIвауала, ауат рыцIа йыргвапу гватрата йырзалырхуи айгвыгIврата йырзыгIандыршауи ракIвпI. Ауаса хIара йшхIпхьадзауала, хIыуа дзачIвызлакIгьи ауат рфырра, адуней апны амамырра гIархчара ахъазла йгIадырбаз ахъацIара пIатIу ду аквицIара йборчпI.
ЙтлапIу аветеранква, хIышвзыразпI, хIбзазара мамырта йахъагылу ажвгIванд ахъазла квырмыш ду швзыхIчпитI!

Квициниа Инна,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki