Library

Аджьбакь ХIаджьисмель СултIан йпа асквш 1953 май а 17 атшын Гвымлокт (Красна Восток) апны дйытI. Асквш 1971 агIан акыт аквтанай апхьарта дгIалган Псхваба (Пятигорск) йтагылу агIвыма бызшваквала акъральыгIва педагогика институт дыцIалтI. Аинститут дангIалга амщтахь Тува автономия республика апны нхара дырщтитI. Араъа намыца бызшвали англьыз бызшвали йайрыпхьатI, Сосновка агIкласскI йъагIарылгауа апхьарта даунашвачпагIвта дынхатI. Асквш 1981 агIан Кърым дталхын сквшыкI ауацIа Евпатория апны асабикви чкIвынргIи рсанаторий апны бжьагIвыта дынхатI. Асквш 1982 агIан «Коммунизм алашара» газет апны нхара джвыквицIатI, асквш 1989 йгIашIарышвта уахьчIва йъагIадзаз акъральыгIва телерадиуа компания «Къарча-Черкес» апны абаза бызшвала атраква рстудия даредактор хъадапI.

ХIаджьисмель СултIан йпа жвакнигакI раъара дыравторпI. Ауат ржанрквала йахъыхацIыхпI: уысара, прозагIвра, публицистика, атакIра, ауасамцара. ХIвран ШахIамбии ТIыгв Владимири дрыцта ауагIа рхабаргIвыраква разкIкIра «Ауасаражвква рытшгIва» адигалтI. УахьчIвала абаза литераторква рсатыр джьгарта далапI.

Асквш 1988 июль мыз агIан акнига пшцIыщтра, аполиграфия, агIвырагIацIщтра руысла а-КъральыгIва Комитети акультура анхагIвчва рпрофсоюз а-Квта комитети
рщаквыргылрала ХIаджьисмель СултIан йпа ачIахIныгIва хьзы «Апечат апны йагъьу анхагIвы» гIайквнадыргатI, асквш 2000 агIан КЧР АуагIа Айззара а-Президиум а-Ртшхъвага швъа гIайыртатI, асквш 2007 сентябр мыз йгIашIарышвта ареспублика президент йщаквыргылрала ауи ачIахIныгIва хьзы «Къарча-Черкес республикала гIатгара зму ажурналист» нкъвигитI, асквш 2008 июн мыз агIан литератури ршIыйари рнархарала КЧР апрезидент йсогIат далауреатхатI.

ЧкIала ПIитIа

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki