Library

Мыхц Кьарим Лиуан йпа асквш 1949 май а 5 ХъвыжвчкIвын кыт апны дйытI. Ауи дчкIвын айдзата ауысара дхънахтI. Суратчпарагьи бзи йбун, гвыгIвбара далата бзидздза дгIамгIвайсызтынгьи йбзазара уысхаз ауысара акIвпI.

Йапхъахауа йуыса йхпахауа акласс дапхьауата йгIвытI, йцбахауа акласс дыцIата йапхъахауата йуыса агазет йгIаквырцIатI, ауаъа йнанаркIыта абаза газет анапа запыт йуысаква гIаквшвалун. Кьарим йжвабахауа акласс дапхьаркIвун йбергьльу абаза гIвгIвы, ауысагIв ТхIайцIыхв Бемырза ауи йыхъаз араса йанигIвы: «УйыргвыргъьитI, ауысара чIвец шйылу уылаухIвитI. Ауатква зымгIва уанрызхъвыцра, угвы багъьата йхъанацIитI: Мыхц Кьарим дуысагIвпI, ауысара амгIва багъьата дтагылапI».

Асквш 1967 агIан апхьарта-интернат дгIалгатI, Черкесск йтагылу заводкI апны сквшыкI дынхан арра къвырльыкъвхара дызшIырттI. МызквакI рахIа къвырльыкъв йымхаскIва йуысаква йапхъахауа разкIкIра шгIацIцIыз ахабарла ддыргвыргъьатI.
Ауи амщтахь йыршIыйара алахь гвыгIвбара алахымкIва йщаквгылтI: къвырльыкъв шихузымцара йуысаква рцIахьсатырква урышв бызшвала йрыхIазыртI, Литература институт апны йакIвшуз анкъвакъвра далалын асквш 1970 агIан ауаъа апхьара дыцIалтI. Зъадаб-намыс нардзу агIвычIвгIвыс ду Михайлов А.А. йакIвйыршуз ауысара семинарква рпны дапхьун. «Ауи анышв тIайы шгIатдрышвтуа апшта уысагIвта сичпатI», – йхIвалун Кьарим йарыпхьагIв йыхъазла.
Мыхц Кьарим Литинститут агитбригада дрылата Россия аштаква щарда дгIарыкIвшатI, Бурятия апынгьи, Амур йаргванта къвырльыкъв зхуз акъральгIвынахчагIвчва рпынгьи, ГДР апынгьи даъан. Асквш 1975 агIан аинститут дгIалгатI, йцришта дгIайхын абаза газет аредакция апны сквшы 25 раъара дынхатI. Асквшква 1992-1993 рагIан акырт-апсуа айсра анакIвшуз журналистта ауаъа дпшцIан. Ачвгьахара, адыгьра, азальмагIара ршвыр лактаква рахIагьи йгвы дыршвын дгIацапахтI. Асквш 1999 агIан «Абазашта» газет дангIакъвыцIх агазетква «Къарча-Черкес акурьер», «Абашта» дырредакторын. Асквш 1998 асхъан ачIахIныгIва хьзы «Къарча-Черкес республикала ауагIа руысагIв» йквнадыргатI.

Мыхц Кьарим йара йхъатачIв бжьы йыман. Йуысара апны йажва ауи аъара угвы йалалуанта йазхъауымцIакIва амаль гьамамызтI. Абаза уысара апны йапхъалагьи йцIыхъвалагьи ауи апш лшара заджвгьи йгьйымамызтI. АуысагIв йхIвалакIгьи йпсы йгIахъшахъыцIуаз амакъым апхьагIв йпсы зынла йалалуан. Ауи апш ъамыр гIаздахIвуа мачIсачIыгIвпI. Ачачан уысагIв Итаев Вахид Кьарим йыхъазла араса йхIвун: «Ауи йугIахъа хвыц рлитература апны уыс дукI йчпарныс йгвалан». АхърыкъьаракIгьи аламкIва уахьчIвала хIара багъьата йхIзыхIвитI: Мыхц Кьарим йгвала дахIвра дула йырхъйатI – йлирика анадзара ауи аъара йхIагIапIта адуней уысара ахъыкв хIагIадзаква закIылагьи йгьгIархьшвум.
Асквш 1999 май мыз агIан, йхъыцIуаз асквш 50 апхъала, «Курьер» газет апны Мыхц Кьарим йуысаква рабаркIыра гIаквырцIатI. Ауат апхъажва тшыткI рзигIвтI: «АгIвычIвгIвыс дъадзабгу пхара гIайылцIитI. Сара ауи апш «пхарата» йсыму суысара акIвпI. Ари адуней хьшвашва ахъахь ауи заджвымзара заджвы йгвы аршышызтын ахъазгIваца сгьымбзазатI». Ауи амщтахь гIвысквша анахъыцI ауысагIв адуней йхIваджьтI, ауаса йуысара уыжвгIандзарагьи пхара гIахъыцIитI, данабгаз гвшышта дшбзазузгьи уахьчIвала апхьагIвчва рыгвква рпны дышбзазауаркIвауагьи йрыквшахIатта.

АуысагIв йазкIкIра «Апхъапхъа йаъан абзибара» Леонардо да Винчи йажваква «АйачIва ацIыхъва йтагылата йцауа зынгьи дгьгIахъынхIвыхуам…» эпиграфта йазичпатI. Мыхц Кьарим ахIба пшдзата йзаъаз алитератор ду ТхIайцIыхв Бемырза ауи ауысла араса йгIвытI: «Кьарим йачIва пшдзакI ацIыхъва дтагылата дымгIвайситI. Ауи дгIахьшварнысгьи дгIахъынхIвыхта тшйыртынчхырнысгьи анасып гьйымам. АуысагIв йчмазагIву йуагIа рылахь тшалайрыдзуа, йпсыпла рыцIа-рыцIа йацIихъыйуа дымгIвайситI».

Мыцх Кьарим данпсы амщтахь ашвъаквала йхъырхыз афильм «ЙшпссгIуз йгIакIашваз айачIва» – хIва йахьырцIатI. Йара ауи атурасы ауысагIв данпсы амщтахь йгIацIцIыз гIвыра щардагьи йырхъадзгылата йгIарбапI: «Кьарим йыйачIва», «ЙачIвата дгIакIкIан… дыдзхтI», «РыцIа йдуу айачIва»… Аратква рыуа закIгьи ахъаз йгьгIанымшатI, йшпакIву ухIварыквын, йапхъахауата, айачIва атурасы Мыхц Кьарим йыршIыйара магIны щарда гIазныцIуа дамыгъа хъадата йщаквгылапI, йгIвбахауата, йара Кьаримгьи ауысара апны шIырпшыра змам йачIвата акIвпI апхьагIвчва рыла дшгIацIалауа.

ЧкIала ПIитIа,

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki