Library

Адуней колледж “Полиглот” Россия апны зынхара зымгIва йрагъьу апхьартаква йрыларпхьадзатI, ауи адиректор Дагвжвей Марджьанат ГIайса йпхIа ”Асквш адиректор” чIахIныгIва знак гIалквнадыргатI. Абари ауыс “Россия апны зынхара рыцIа йагъьу апхьарта 100” – хIва йзхьзу анкъвакъвра йаланакIуата йакIвшатI. АпхъагылагIвчва амедаль “Европа анадзара” йгьи анкъвакъвра алауреатра адиплом рнапIыцIарцIатI.

Анкъвакъвра асквш 2006 йгIашIарышвта йакIвдыршитI. ХачIвыта йархъйауагьи гвынгIвырапI: апычIв йгьи аквтанай ъачIвагIагIацIгарта апхьартаква рыуа зынхара анадзарата рыцIа йхIагIу гIарыбергьыльра. Анкъвакъвра йадгалагIвпI Россия ассузква рдиректорква р-Совет йгьи а-КъральыгIва Думи а-Федерация а-Совети йазалху ркомитетква йацгIандыршаз ажвлара совет, датшагьи. СынчIва аэксперт жюри руыс баргвын: апхъагылагIвчва щаквдыргылра ахъазла анкъвакъвра йгIалалыз апхьарта 3000 раъара дырхъвыхра атахъхатI.

МагIны ду зму абари апш гIаншара хIара хIгватра азынархата Марджьанат ГIайса йпхIа хIлынйатI. Ауи йбергьльу ари анкъвакъвра апны йъапхъагылагIвхаз швабыж дшайгвыргъьауа лхIватI, адахIвра йапщылата аколледж йынхауа агвып рджьауапкIрагьи шалахIаз, рынхара апны амаль шIыцква йырзыпшгIара шатахъу гIалылкIгIатI.
– Россия апны апычIв йгьи аквтанай ъачIвагIагIацIгара арыпхьара ауысла сквшигIадзапхьадза йакIвшалауа аконференция амшква рагIан акIвпI апхъагылагIвчва рсогIаква анрыртуаз. Аконференция анхара йалан а-КъральыгIва Думи а-Федерация а-Совети йазалху ркомитетква ргIащтийыгIвчва, арыпхьарали наукали Россия аминистерства ахъвшараква рунашвачпагIвчва, – лхIвитI Марджьанат ГIайса йпхIа. – Анйара апны арыпхьарала астандарт шIыцква абзазара йзлаларыжьуаш амальквагьи йрылачважватI, арыпхьара агъьчIвра, уыжвгIанчIви амаль шIыцква гIарысабапра шатахъу гIалыркIгIатI. ХIаргьи бзира щарда тшрыхахIыргIвазатI, анахьанат аъачIвагIагIацIгарта апхьартаква рунашвачпагIвчва хIрынйатI, амаль шIыцта йгIадрысабапуа рунашва гIахIрахатI, зымгIва хIацыта Санкт-Петербург апхьарта дуква рпны хIаъан. ЙхIаракIу ауат апхьартаква ргIатгараква анубара къару шIыц гIауылалитI, амаль шIыцквала рахIагьи бзита уынхарныс гIаутахъхитI.

Къарча-Черкес апны дахIврала йынхауа, зынхара хвы аквырцIауа апхьарта шIыц ззыгIаныршаз Дагвжвей Марджьанат зынгьи дшамайчуа бергьльыпI. Апсахраква ангIаншуз асквшква рагIан ауи лынхарта йацлырцауата (лъачIвагIала длингвистпI) здырраква йалазырхIаныс зтахъу чкIвынргIа кIьыдата дрыдынхалуа далагатI. АпхьагIвчва рпхьадзара рыцIа-рыцIа йалахIун, йзыгIвнапхьуш апещква рыцIа йтыбгIата йгIаура атахъхатI. Ларгьи лхъазы дрыдынхалныс лкъару гьрыквымхъахуазтI, йлыцынхуз арыпхьагIвчвагьи гIалцлырхърагIауа далагатI. Ауи асхъан аколледж агIаныршара ауыс дазхъвыцтI. Анчва-абачва рахIварала асквш 2002 агIан арыпхьара квта гIанлыршатI, гIвысквша анахъыцI агIвымакъральква йырпщылата йынхауа аколледж “Полиглот” гIанлыршатI. “АгIвымакъральква йырпщылапI” анхIхIвара ауат гьажва мцырам: аколледж ангIанша йащтагIайуаз асквшква руацIа ауаъа йаргвану агIвымакъральква йрыуу астудентква апхьун, Англия, Скандинавия къральква йрыуу апхьартаква, арыпхьара квтаква йрабадыртI. Къарча-Черкес апны уахьчIвала астудентква агIвымакъральква рпны рдырраква йрыладырхIаныс амаль рзыгIанзыршауа “Полиглот” йшахъазу гIалкIгIара атахъыпI.
– Астудентква йрылшитI йддырдыруа абызшваква йаъарылачважвауа акъральква рбзазагIвчва йрынйаныс, ръазара йаладырхIаныс. Ауи хIара хIыхъаз магIны ду амапI, – лхIвитI Дагвжвей Марджьанат. – Ауыс ари ахъата астудентква аргвышхвитI: ауат датша дуней, датша бзазаща тшахадыргIвазитI. Рдунейпшыща тшапсахитI, бзирата йырбауа йашIпшуа йалагитI. Щарда мцIуата аколледж йызпхьауа аъачIвагIаква йрылахIатI: “Банковское дело”, “Право и организация социального обеспечения” (юрист квалификация апщылата), “Программное обеспечение”, “Менеджмент” – арат аъачIвагIаква шIыцта йгIацIыргитI. Аколледж йгIацIыргауа аъачIвагIаква зымгIва йрыцта агIвыма бызшваква цIолата йддырдыритI.
Дагвжвей Марджьанат афилология наукаква дыркандидатпI, ачIахIныгIва хьызква “Россия Федерацияла гIатгара зму арыпхьагIв”, “Арыпхьара анхагIв бзидздза”, “Къарча-Черкес республика аугIа рарыпхьагIв” гIалквнадыргатI, ауаса зымгIва рацкIыс хвы ззылбауа аколледж йгIалгакваз чкIвынргIа ъалагаз анхартаква рунашвачпагIвчва йгIарщтиуа аразыра сальамшвъаква ракIвпI. Ауи аъара дамайчуата дшзынхауа, ауи апш къару ду ъахьъалызгIайуа хIазымцIгIауата йгьхIзымчхIатI.
– Ссабищтара апхъагылара сымата сгIадзынгылуан, – лхIвитI Марджьанат ГIайса йпхIа лымадзаква гIахъылтIуа. – Апхьарта апны апионер организация унашва ахъсцIун, рыцIа сантшытха акомсомол организация саунашвачпагIвхатI. Гвалымста сгIанызымжьуа закI сылапI. УахьчIвала сара сыхъазла рыцIа йхъаду съачIвагIа йазсыму абзибара, сара снапIы йгIаннаршаз ауыс ракIвпI. СгIапсара ахайыр анызбауа саргвыргъьитI, къару шIыцта сызгIанарыцIситI.
ХIайчважвара апны Марджьанат апхъахьыла дыздынхалуаш ауысквагьи гIалрахатI. Лынхара пещ ашв зны тшгIанатIитI, зны тшанаркIыхитI: йлызгIайуа щардагIвыпI, рыуа дзачIвызлакIгьи йыхъаз ауи замангьи гIалауитI, йгвлахIару ллакта лашаралагьи йгвы лырбзийитI, уадыргIвана йыззгIайыз ауыс лгвы аквкIта даздзыргIвитI. Ауи ахъаз дгьунашвачпагIвым, сквшы 20 рапхъала йгIанлыршаз абари ауыс агIвычIвгIвыс йгвы шынхауа апшта дынхауамца псы ахъалцIитI. Анхарта дангIайхра лунагIва апынгьи бзи йылбауа лгIарикви ауат рхвыцкви лызпшитI, драйгвыгIвитI. Ауи йлапшу агIвычIвгIвысква санрынйара уахъыкIи мышкIи пхьадзарата йгIарыцIанакIуа сахIат 24 рахIа шнамдзауа спсы йгьхъанацIахуам… Дагвжвей Марджьанат лшвапхала йгIалырбитI агIвычIвгIвыс ауат асахIатква злайырчвуа ауыс шакIву йхъаду. Бзи йубауа ауыс уанадынхалуа угIапсара ахайыргьи шубахуаш кьангьаш гьалам.

Квициниа Инна

“Абаза Къраль” сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki