Library

«Абаза Къраль» сайт йазалхпI

– Араъа йакIвшаз айззара адунейла аргамта уыс дута йалтI, ауи амщтахь хIыбызшви хIкультури ргIахчарала ахабарргагаква рцхърагIара адуней акъральква рквтала тшауацIнахуашта хIгвыгъитI, – абараса йхIвитI апрофессор ПIаз Сергей аконференция «Апсны йгьи Европа: ангIалри ацынхари руысла амальква» анхара даквчважвауата. Аконференция Брюссель Европарламент апны йакIвшатI.

Апхьахьа йшихIвазла, аконференция апны апхъахьыла Европарламент йгьи Апсны рацынхара анархартаква йауацIыхта йрылачважватI. Ауат ауысква йрыланакIитI Европарламент ацхъарагIарала ареспублика апны анаука, акультура гIаджвыквцIараква абзазара ралажьра, аконференцияква ракIвыршара. Европа апынгьи акультура анархартала агIаджвыквцIара бзиква адыргалитI. Ажва ахъазла, сынчIва ноябрь мыз ауацIа Гамбург апны «Черкесы» – хIва хьыз амата этнография гIарбарта адыргалуаштI. ПIаз Сергей йшихIвазла, агIарбарта адгалагIвчва араъа анахьанат ауагIахъаква йрылапхьадзата апсуаквагьи абазаквагьи ркультура гIадырбаныс рылшуштI.
– Лшара ду гIахIызтуа абари амаль абазаква хIпны йапхъахауата йгIаншатI, – йгIаликIгIитI ПIаз Сергей, уадыргIвана йгIацицIахтI:
– РыцIа йхъаду ари акIвпI – адуней акъральква рквтала абазаква йырмагIну йалыргата йгвынгIвырахвуштI. Ажва «абаза» щардазджьара йбергьльыпI, ауаса европа абзазагIвчва ауи уагIахъа щарда гIацIанакIуата йырпхьадзитI. Датшагьи аконференция апны йбыжьгаз агIачважвараква ангIаквырцIахра амщтахь Европа апхьагIвчва адиаспора зынйауа абаргвыраква йрыхагIвазахуштI: адемография аъаща, рцри бызшва агIахчара уысква. Сара сангIачважвуз Россия апны хIыбызшва агIахчара йазынарху амальквакI шнарахвуа гIалскIгIатI, абаза уагIахъа театр, телебара, газет шаъу. Трыквшта йбзазауа абазаква, ажва ахъазла, ауи апш амаль гьрымам. ХIхаквлагIв абаза профессор ТхIайцIыхв Михаил йгIачважвара Трыквшта апны абазаква рбзазартаква шаныргIалу йазынархан.
Апхьахьаква йырхъазымкIва Шамба Тарас дзунашачвачпагIвыз ащтийыгIвчва гвып ажвлара уыснкъвгагIвчвагьи рылан. Араъа рыхьызква хIхIвапI Ставрополь шта абазаква руагIахъа культура жвлара аунашвахъцIагIв Чагва Армида, ажвлара уыснкъвгагIв Чагва Файзидин.

ПIаз Сергей аконференция апны апсуакви адгьакви злу абаргвыраква йауацIыхта йшрылачважваз йхIватI. ХIайчважвара ацIахъва Европа апны ачеркесква рфедерация чIахIныгIва хьзыла йаунашвачпагIву адмирал Дашдемир йажваква гIаликIгIатI: «Заджвгьи закIылагьи хIара хIайщчвара гьизыптшуашым, ауи зрыбагъьауа ауысква ракIвпI йхIырхъйуш, анцIралагьи хIацацхърагIуштI, уахьчIва аконференция анхарагьи зквшахIату ауи акIвпI».

Квициниа Инна,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki