Library

Ужвы азаман баргвыпI йуылаухIваныс арат агIважвакI ауи асхъан гвлахIарата йрылаз. ЙалкIгIата, Къарча-Черкес апны арадиуа хвбызшвакIла йангIачважва асхъан. Ауищтара сквшышвбжакI аъара агIвсхьатI. ТIыкIва ХIамид ауи агIамта бзита йдырхитI. Ауи йыхъазла арадиуа хабарргагагIвацата гьакIвмызтI йшаъаз, знымзара-зны йптшыта йчпахра шатахъхуш гIайгвынгIвуан. Йаргьи атехника майрата йзырчIаджьуа тшибжьатI.

Апхъапхъа ауи йынцIра йауысхушта, бзи йбуш нхарата йцапIхIва дгьазымхъвыцуазтI. Апхьарта амщтахь асвязь асигналква йъарзырбжьауа Новосибирск йтагылу арра апхьарта дымгIапсауата дыцIалтI. Йгвтара гIайыдахIвтI. Ауаса йгвыргъьара гьауырамызтI. Йан лхъазы жвгIвысабичва ргIадзныргылра дшарыгIапсауа аниба апхьара кIайрышвын арра база Арзамас-16 апны связистта дынхауа далагатI.

Атшпсщара мшква йымата йцри ТIапIанта кыт дангIай йкытлагIв, акомпозитор бергьльы Йуан Муса арадиуа апны дынханыс дирайгватI. Йуан Муса ауи асхъан аобласть радиуа ахор унашва ахъицIун, ауаъа атехника бзита йыздыруаз аъачIвагIагIвчва йырзыбжан. Асквш 1978 сентябрь мыз агIан ТIыкIва ХIамид арадиуа апны механикта дынхауа далагатI. Зунашва дацIаз Проценко Алексей Павел йпа уыжвгIандзарагьи пхата дйылачважвитI.

Ауи азаман КIапI Алигьи ХIаратокъва Муъайадгьи йыцта ауагIа рмакъымква ранцIарала нхара ду акIвдыршун. Акытква йызлагIарыкIвшуз йазалхта йадгалу амашинагьи рыман. Дарынашхыйауата йшихIвауала, ауи агIан йрыгIвуамцара йазыркIкIыз амакъымква ракIвпI арадиуа афонд уыжвгIандзара йызлащаквгылу, псахра дукI гьащтагIамитI. ЙагIвсыз азаман даналачважвауа здырраква ауацIыху аъачIвагIагIвчва уахьчIвала анхарта йшагхауа гIаликIгIитI. Ауаса астудия аъамапсымаква йрыуата шIыцра щарда гIаншатI, ауипхьадза гIальаматра злу чIащыгIваракI аницIаныс, дадынхалныс гIайтахъхитI. Абаза культура атшауацIнарыхра залацIара дуу Ерыжв Зулии Цекъва Зарыли гIазсуаз амакъымква ауагIа шайгвыргъьуз запыт йгIайгвалашвахитI.

ТIыкIва ХIамид йымадзагьи гIахъитIитI: ари анхара абзазара апны ашваква йыцта, лахъвгIахъасрипхьадза дзайгвыргъьауа дчIвырхъауа дшабжьаз гьцIайкIуам, йан дъабгаркIву, асаби хвыцква ъагIадзынгылуа, бзи йбауа априемник йцри бызшвала йъачважваркIвауа йгвлахIарапI…

УахьчIвала ТIыкIва ХIамид “Къарча-Черкес” телерадиуакомпания арадиуа хъвшара апны йхъаду инженерта дынхитI. СквшкъомкI руацIа йырхъауа ауыс джьауапкIра ду шапщылу йылайхIвауата атехника апны намдзарата йгIаншауа зынла йырчIаджьхуа акIвпI дшынхауа. ЙшпакIву ухIварыквын магIны ду азибитI аэфир злагIаджвыквылуа арат йгвщтIыхгу, арадиуа йахцIарахаз агIважвакI цкьата, йалыргата арадиуа аздзыргIвчва ансимшы хвбызшвакIла йыргIаланыс: “Черкесск начважвитI…”

Ешерова Муъминат,джурналистпI.

“Абаза Къраль” сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki