Library

Абаза кытква ЙынджьыгьчкIвыни АлбыргIани рбзазагIвчва ауралагьи спорт бзи йырбун. ЦIабыргыта, ауи ауысла арат акытква йшатахъу апшта йгьадгаламызтI. Асабиква топ йъасуаш рызгIауыргьи абакIра бзи йзбуз ачкIвынчва ЙынджьыгьчкIвын дзыгIв йырста анахьани атшпы йчIву ХIабаз кыт йцара атахъхун. Ауаъа хвитра абакIрала Къарча-Черкес апны йапхъахауата СССР аспорт йамастерхаз Аргвын Юра дибжьагIвыта акIвпI Чква Михаил (йцри кыт абзазагIвчва ВалентинхIва йыпхьитI) дшгIадзынгылыз.


Къарча-Черкес пединститут апхьара даныцIал амщтахь йъазара абжьагIвы Бархозов Ш. йалайырхIатI. Арра къвырльыкъв йхауата ауи адахIвра дуква гIатигатI. Акъраль ауацIауысква рырхъвква дрылата Валентин самбо абакIра акъвлейраквагьи ййырдырын арат агIвспорт квпшыракIлагьи СССР аспорт дамастерхатI.
Йцришта дангIацапах АлбыргIан апны абакIрала асабиква йбжьауа далагатI. АчкIвынчваква абакIра тшазырбжьаныс гвып-гвып йызгIайуан. Ауат йрыуата рыцIа йгврыхвакваз аобласть, акрай анкъвакъвраква рпны апхъагылара ркIуа йалагатI, щардагIвы аспорт мастерра йакандидатхатI.
Асквш 1984 агIан ахча цхърагIара ъамайдзахуаз йгIалцIла аспорт апхьарта хъыргIвахтI. Михаил Заудин йпа датша бзазара уыс хъатайкIра атахъхатI, ауаса йгвы гьтынчмызтI – йпсы бзи йабуз ауыс ахьыла йгвгьи ахъуан. Зны йара йпи йаща йпи хвитра абакIрала Черкеск апны йакIвшуз анкъвакъвра ду йапшныс йырцатI. «Спартак» спорт Тдзы апны хIкъраль аштаква йгIартыцIын йбергьльыз аспортсменква гIадгылтI. Аспортсменква къарута йгIадырбузи рабакIыща аъазари апшыгIвчва шIаква швабыж йыргвапхатI, ргвы йгIатахатI. Ауат афильмква йрылата йырбалуз апхъанчIви гладиаторква шайсуа йапшуазшва акIвын аспорт абакIра рыла йшгIацIалуаз.
Анахьани атшын апхьарта йангIайх ачкIвынчва рчгIвычаквагьи рымпсахскIва апещ ауацIа йамцIасын йабакIуа йалагатI. Анкъвакъвра апны йырбаз акъвльейраква гIаддыргвалашвахуа абакIыгIвчва йыршIпшуан. Ауи аъара йаланахIван Валентин дгIашылта йшйырхъвыхуаз гвы гьарымттI. Данырба тшдырзахвауа йалагатI: «ХIара хIгьамисуазтI, ахъаз хIабакIуан», – хIва. Ауи дпшвырхъыччауа дгIарпшын, – «ШвабакIыгIв ъазаханыс швтахъума?» – хIва дгIарцIгIатI. «ЙхIтахъымкIва!» – рджьауапхатI ачкIвынчва йацшIакIта. Валентин агвыргъьара дгIанарылашаратI: асабиква рща йалу гIацIсытI, ауат йара йыщта дырцаныс йхIазырпI.
АчкIвынчва ргвала хъйара ахъазла ауи йылшауа закIгьи гIанимыжьуата йрыдигалныс йщаквйыргылтI. Апхъапхъа ауат апахь, ащаца апны, дрыдынхалуа, абакIра йазибжьауа далагатI. АдгьахIабльа йауу йынбжьагIвчва-бжьагIвчва йызквабакIуа цматкI согIата йангIайырт амщтахь йтдзы апещкI азалихтI, ауаъа йщтIайцIатI, спортзал чкIвын квпшыра амата йадигалын абжьара атаджвыквицIахтI. Ауи асабиква дрыдынхалуата ахабар аныргIа зны абакIра йазибжьата йдухаз ахъачваква рпачваквагьи йызгIарддтI. Валентин ауат хъацIара ду рылата йшгIадзынйыргылуаш кьангьаш гьазгIарымгуазтI. Ауаса абжьагIв гвыбзыгъа бзита йадгалам ймини-спортзал апны ауатква шйылымшуш гIайгвынгIвуан.
Чква Михаил зымгIвалагьи йадгалу абакIра апхьарта гIанйыршаныс гвы йчпатI. ГIапсара дула йазалху пещ гIапшцIигатI, ауи арчIаджьра йацхърагIуш хIаракьатчпагIв дгIайаутI, ауыс асабикви чкIвынргIи йрспорт апхьартата йщаквгылныс ахъазла ХIабаз район аунашвахъцIарта гIайцйырхърагIатI. Пыраста йгIайпшIагылыз зымгIва дгIарыцIстI. Асквш 1999 агIан аспорт апхьарта гIахъыртIытI. АгIахътIра йадахIвуата Валентин йынбжьагIв бзи, Европа хын йачемпионхаз, адуней йачемпиону, асквш 1972 йгIашIарышвта 1981-дза СССР абакIыгIвчва гвып йырбжьагIв хъадаз Шахмурадов Юрий Аванес йпа дгIайрайгватI. Ауи адуней апны хвитра абакIра гIаншищтара загъь даъам абакIгIвытагьи бжьагIвытагьи дырпхьадзитI.
ЙынджьыгьчкIвыни АлбыргIани рбзазагIвчва ргвыргъьара цIхъва гьамамызтI. Аспортзал ангIахъыртIы йащтагIайуаз атшын чкIвынргIа ауи йаквибагатI. АбакIра тшазызбжьаныс зтахъыз ашIаква ауи аъара йщардагIвынта хгвыпкIта йагIвыршатI. Гвыпипхьадза чкIвынчва 40-гIв рылан. Драчважваныс ахъазла зымгIва ангIалайыргыл Валентин зныкI ахъазла дъанквынхатI. ЙхIвуш йымдыруазшва ауи асабиква дырпшуа бзидздза ддзыргIвытI, йыладзква гIахъагылтI. Арат ахвыцква рабачва дшрыдынхалуаз, зымгIва бзита йшащтацуз, анкъвакъвраква рпны йшапхъагылагIвхуз гIайгвалашвахтI. Йпсы бзи йабуз арат ауысква щарда цIуата йбзазара йагхун. Абар ужвы аспорт агвыргIваква, агвыргъьараква, адахIвраква абгата йкъару рылайцIауа дбзазаныс амаль атайзыгIаншахтI. Аспорт уыс дуква рахъвдаквыщтра йылшушта йаъапI.
Йгвыгъараква абзазара йахъвхатI. Апхьарта аспортсменква ареспубликала, ГIвадахь федерал округла, Россияла анкъвакъвраква рпны йапхъагылагIвхун. Араъа абакIра йахъазымкIва футболасрагьи боксгьи йырзырбжьауа йалагатI. Валентин йахIварала апхьарта Шахмурадов Юрий йыхьыз ахъырцIатI. ГIвысквша руацIала Шахмурадов Ю. йыхьыз зхьзыз асабикви чкIвынргIи рспорт апхьарта «АшIара» Къарча-Черкес Республикала рыцIа йбзидздзакваз аспорт апхьартаква йрыларпхьадзатI, агIатгараква швабыжта йхIагIата йщаквгылтI.
Чква Михаил йгIаджвыквцIарала хIкъральгьи агIвымакъральквагьи рабакIыгIвчва гIалалуата Шахмурадов Ю.А. йыхьызла агIтурниркI акIвшатI: агIвба – ЙынджьыгьчкIвын апны, ацба – Черкесск апны. АбакIыгIвчва ХIабаз район ахъада йчIахIныгIва согIат йазабакIуан.
СынчIва декабрь ацба йгIашIарышвта агIбадза Черкесск йаныргIалу «Спартак» спорт Тдзы апны Россия аштаква гIацIанакIуата Россияла гIатгара зму абжьагIвы Чква М.З. йхъмаштылра йазынарху хвитра абакIрала йапхъахауа атурнир акIвшуштI. Ауи йгIалалуаштI асквшква 2000-2001 ййыз ачкIвынчва.
Акыт спорт апхьарта апны Чква Михаил йгIадзынйыргылтI дуней классла спорт мастеркI, Россия аспорт мастерква йрыуата цгIвы, аспорт амастерра йакандидатта гIважвагIвы райхIа, йапшым аразрядква зму спортсмен швкIгIвы раъара.
Зкъару таркIваз, зылшараква дууыркIваз Чква Валентин йагIамкIва апсра дхIылнахтI. Асквш 2007 ноябрь а 16 атшын Шахмурадов Юрий йхъару гIвымакъралькI даъата дгIайын ахрат мгIва йыквлыз йынбжьагIв днайдастI. Аджьабара айззара апны дгIачважвауата ауи аспорт апхьарта «АшIара» гIанзыршаз йара Чква Михаил йыхьыз ахъырцIахныс ажванахъа гIайгтI. УахьчIвала аспорт апхьарта ауи гIанзыршаз агIвычIвгIвыс йыхьыз нкъвнагитI. Араъа йгIадзынгылуа ашIаква рарыпхьагIв, рбжьагIвы ду Чква Михаил Заудин йыхьыз рхъа аладухауата адахIвра дуква йрызцауа йышчIвырхъуш кьангьаш гьазгIагIгуам.

Чква Расул
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki