Library

УасаражвкI зны араса йхIватI: «АуагIахъа рыршIыйара агIвычIвгIвыс йынкъвигауа ачгIвыча аъаща йашIырпшыпI». Сквшы 40 райхIа цIуата ЧквтIу Владимир дыздынхалуа ауыс шIырпшыра амамкIва хъатачIв аъаща йтагылапI. Ауи дгIазлыцIыз абаза уагIахъа ркультурагьи апхъанчIви заман йгIашIарышвта йара йылнакъьаз амгIва йтагылата тшауацIнахитI. Владимир йашваква рпны ауагIа рмакъымкви уыжвгIанчIви эстрада макъымкви рылкIгIараква йнардзата йгIайрысабапитI, пшдзата йацанйыргIалитI. «Амузыка ауысла йгьи ауи йахъазымкIва…» – щардала йырхIвауа абари ажванахъа айшыс ЧквтIу Владимир йхIыцагIвишаз ахъвыцраквагьи йрыквыргIапспI. Ауи авокал-ъамапсыма ансамбль «Абазинка», ашвахIвагIвчва гвып «Абазгьква» дыргIаныршагIвыпI, друнашвачпагIвпI, ачIахIныгIва хьызква «Апсны республикала гIатгара зму артист», «Къарча-Черкес республикала акультура апны гIатгара зму анхагIвы», «Къарча-Черкес республикала ауагIа рартист», «Къарча-Черкес республикала аршIыйара апны гIатгара зму анхагIвы» дрынкъвгагIвыпI. ХIара ЧквтIу Владимир йызхIыргылыз азцIгIараква йгIаритыз аджьауапква швгватра рзынахIырхитI.

ЧквтIу Владимир апхьарта апны ансамбль атшыбжьара сахIатква акIвйыршитI. Псыжв кыт. Асквш 1968 .

Владимир Рамазан йпа, хIайчважвара джвыквхIцIауата уынцIра-бзазара айшыста йгIахIаухIвныс хIахIвитI.

– ЙауаштI. «Владимир» – хIва схвыцищтара йсыпхьитI. Асцена апынгьи йара ауи ахьыз гIасхъхалтI. Ашвъаквала сыхьыздза ХзырпI. ХIангьи хIабагьи нцIрата йрымаз ркъаругьи рызгIвадарагьи йырмайгьдзауата сари, сащи, сахщи хIгIадзындыргылтI. ХIаба арра къвырльыкъвхара дызшIырымтскIва унагIва далалтI, къвырльыкъв йхаута асквш 1952 агIан сара сйытI. Псыжв апхьарта сгIалгатI, асквш 1971 агIан Черкесск йтагылу амузыка училища сыцIалтI. Йара ауи атлахан хIара хIансамбль Псыжв кыт акультура атдзы йадкIылата йынханыс хIдрайгван апхьари анхари ацсырцун. Ауи азаман йгIашIарышвта хIансамбль «Абазинка» – хIва йахьызхатI.

ЙшыгIдыруала, вокал-ъамапсыма ансамбль апхьарта уыцIаркIвата йгIануыршатI…

– ЦIабыргыпI. Й-60-хауа асквшква рцIыхъва рок-музыка йакъагIамтата ащта атурых йгIалахатI. «Битлз», «Роллинг стоунз», «Криденс», «Энималс» гвыпква рмузыка саргьи сыгIвзачваквагьи йыхIгвапхун, ага ауи асхъан йгIауаута урыздзыргIвныс швабыж йбаргвызтынгьи. Ауатгьи хIкъраль апны йбергьльыз ансамбльквагьи («Поющие гитары», Веселые ребята», «Самоцветы», датшагьи) рмузыка хIгвапхунта хIаргьи ансамбль гIанхIыршаныс гIахIтахъхатI. ХIызсуаз амузыка ъамапсымаква апхъапхъа хIара-хIара йхIчпун, уадыргIвана ахIбачва гIахIцхърагIатI. Сара ауи асхъан йагIбахауа акласс сыцIата сапхьун.

Амузыка училища уыцIалта ушапхьушыз ауи агIан уазхъвыцхьата йщаквуыргылхьазарын. Ауи акIвма?

– Ауи акIвхуштI йшцаз. Аучилища саныцIаз швабыж йысгвапхауата сапхьун. Йсыцапхьуз ачкIвынчваква срапхъанысуата йапшым амузыка ъамапсымаква срысуа тшызбжьун, йалачпу апьесакви амакъымкви гIартысщтныс сылшун. ХIазрыпхьуз рпынгьи ауи гватрадъа йгьгIанымхузтI. Ашваква раныргIалри аэлектрогитара асри (уадыргIвана аквцIа ъамапсымаква) йкIьыду ршIыйара уысын.

Ауи азаман аэстрада апны йбергьльыз ашваква шваргьи йшвхIвун. Ансамбль апны Къарча-Черкес акомпозиторква рашваква швхIвауа швышпалага?

– Зны акомпозитор Дауыр Аслан (ауи съапхьуз аучилища даунашвачпагIвын) йынхарта пещ снайдылын араса йхIватI: «Володя, уарад шшвхIвауа сгвапхитI. Сара суарадквакIгьи швшвырдырта йшвхIваныс стахъын, йауашызтын». ЙхIхIырдыртI. Йаргьи йгвапхатI. Ауат ашваква рызбжа арадиуа афонд апны уыжвгIандзарагьи йаъаханыс ауыпI: «Марйам», «Зджьара йбыжьгитI акIыжкIыж», «ХIыщхъа хаквла швгIайгва», «Марыхв щхъахъысырта адауышвара», датшагьи. УацIыхъван анахьанат акомпозиторква рашваквагьи хIхIвауа хIалагатI. Зашваква хIхIвуз йрыуапI абаза композиторквагьи – Гваджьа Галина, Гваджьа Абрагь-Зауыр, Йуан Муса, датшагьи.
ГIамта бзидздза агIвсхьата, Дауыр Аслан Нальчик апны йгIанйыршаз ашвахIвагIвчва гвып «Даханагъва» данрыдынхалуаз, «Абазгьква» рыршIыйарагьи гIальаматра ду азибатI, рконцертква анакIвшуз хIирайгвалун.

«Абазинка» ансамбль асквш 1979 агIан йрылакваз гIарбапI, армала угIалагата йгIашIыхIпхьадзапI: КIьыщмахва Николай – аэлектроорган; ХIачвыкъва Эдуард – абас-гитара; Джьанымбей Фуъад – атруба; АбытI МухIадин – аритм-гитара; ЧквтIу Назир – абарабанква; ЧквтIу Владимир – асоло-гитара; Науменко Анатолий – асаксофон тенор.

«Абазинка» йырхIвауата ауагIа швабыж йыргвапхун апсуа ашва «Азамат». Йауашызтын апсуаква рмузыка культура швгватра аназынашвырха, йшазынашвырхаз ахабар гIахIахIв.

– Ауи атлахан хIара хIансамбль аршIыйара бергьльын, йшпакIву ухIварыквын Къарча-Черкесла, Ставрополь крайла, акъраль ауацIала йакIвшуз анкъвакъвраква хIрылалуан, апхъагылара хIкIлун. Апсны апны йакIвшуз Къарча-Черкес акультури аршIыйари рдекада йалалныс йадыркIылыз ащтийыгIвчва гвып хIанрыларпхьадза амщтахь апсуа бызшвала уарад заджвыкI йадамызтынгьи йхIхIырдырта хIайщчва апсуаква йырзыхIхIваныс гIахIтахъхатI, йшпакIву ухIварыквын апсуакви хIари хIайщчвапI, хIкультураквагьи хIыбызшваквагьи аргваныпI. Аобласт радиуа афонд апны йаъаз ашваква «Азамат» гIарылхIхтI (ауи Царгуш В. дызунашвачпагIву афольклор ансамбль йырхIвауата акIвпI хIшанйаз). СогIвым астадион апны йайззаз ауагIа«Азамат» аныргIа зымгIвагьи гIагылын ауырата напIы йхIзастI, йапынкIылата хын йыхIдырхIватI. УадыргIвана апсуа композиторквагьи хIрыцынхауа хIалагатI, ауи цIаста йщаквгылын уыжвгIандзара хIащтаныкъвитI. Ашва «Азамат» ауралагьи хIрепертуар йалан, ужвы ауи «Апсуа ашваква рпопурри» йаланакIуа тема кIьыдата йхIхIвитI.

– «Абазинка» рыршIыйара апны йджьащахъву, ауаса щардагIвы йрымдыруа агIаншараква урынйитI. Ажва ахъазла, ВЛКСМ а-ЦК агитпоезд анхара швшалаз…

– Ауи цIабыргыпI. Й-70-хауа асквшква рцIыхъва «АшIара» радиуастанция «Абазинка» рыршIыйара йгIаквчважвауата йадыргалыз арадиуа атра эфир йталтI, СССР абзазагIвчва ахадыргIвазатI. Й-80-хауа асквшква ргIаталымта хIансимш нхара хIшалазымцара (аконцертква ахIтуан, Черкесск акультури атшпсщари рпарк «ДзыгIвбжьа йачIва» апны агIахIахIвра хъвлапынква адыгIгалуан) Москва дгIатыцIын ВЛКСМ а-Квта Комитет анхагIвы дхIызгIайтI, Псыжв кыт акультура тдзы апны хIуарадква дрыздзыргIвын дацапахтI. Бзидздза анцIы ВЛКСМ а-ЦК йгIарцхIан хIызшIырттI, абарауаса асквшква 1982 йгьи 1983 рагIан агитпоездква «Ленин комсомол», «Молодогвардеец» рынхара хIалата Сбыр, МарагIацIцIырта Хъара, Байкал-Амур айхамгIва уыхвартаква рпны хIаъан. Щарда гIбатI, йыгIгIатI, хIыршIыйара агIвынаквагьи тшауацIырхтI.

Ауи агIан Къарча-Черкеси Ставрополь крайи рыхьызла хIынхун, акъраль ду апны ауи анхара чIахIныгIвара йахъазымкIва джьауапкIра дугьи апщылан. ВЛКСМ а-Квта Комитет артшхъвагаква гIахIквнадыргатI, ауи акIвымкIвагьи Венгрия туристта хIцаныс лшара гIахIыртатI. Йапхъахауата гIвымакъраль хIаъан. Венгрия абзазагIвчвагьи рмузыка кукультура байапI, ауаъа йгIаншаз арок-музыкагьи джьащахъвапI.

ВЛКСМ а-ЦК агитпоезд «Молодогвардеец», асквш 1983: «Абазинка» ансамбль йалакву агитпоезд анхара йалу гвыпкIи уыхвагIвчви гвыпкIи йрыдзхъагылата чвахъабага сурат рхъырхтI.

Й-80-хауа асквшква рквта ЧквтIу Владимир композитортагьи йыхьыз дйырхIватI. Ауи шпагIанша?

– Сшхъвыцуала, амузыка зъачIвагIата сквшкъомкI йаланхауа рыуа щардагIвы ауи апш лахIвара рызгIашIыхитI. Саргьи зны амакъым шIыцква шсзыгIаншауа, схъа йштахъынхIвуа гвы астын нотала ашвъабгъьы йансцIатI. Ауаса ауат уарадхара ахъазла ажваква рзыгIвра атахъын. Ауи уыс баргвыта йгIацIцIтI. Насып дута йсзалыз йбергьльу ауысагIв Мыхц Кьарим съайынйаз акIвпI. Ауи ажваква дрыдынхалуа далагатI, сдрыразуата атекст гIальаматква йгIвытI, уадыргIвана сквшщарда хIацынхатI, ашва бзидздза ацгIанхIыршатI. Ауат арадиуа апынгьи ателебара апынгьи йанхIцIатI, азджьакI ужвы шIыц-шIыц хIрыдынхалхын «Абазгьква» ррепертуар йалахIцIатI.

Й-90-хауа асквшква рагIан «Абазинка» ансамбль рыршIыйара ауыс шпаца, уара йшпагIаугвалашвахуа?

– Ауи агIан хIуыс баргвхатI. ХъатакIла йгIауахвырквын хIыршIыйара йакъагIамтан, Трыквшта концерт ахIтныс хIдрайгватI. ЦIабыргыта, асквш 1992 агIан ауаъа хIцаныс тшхIрыхIазырхьан, ауаса Апсны апны айсра гIалагатI, хIаргьи хIуысква зымгIва нахIрыскIьан хIайщчва хIырцхърагIауа хIалагатI. Айсра амщтахь аршIыйара уысква хIгьырзымхъвыцхуазтI – хIкъраль апны тшызпсахыз щардан, азаман алакта хвгIара-тиран. Ауаса хIуагIахъа культура швабыж йщаквысуа йаныгIба шIыц-шIыц тшазхIкIкIыхтI, программа шIыц хIрыхIазырын хIынхауа хIаталагахтI.

Азаман баргвын, ауаса асквш 1996 ацIыхъва ахIбачва йырхъазымкIва асабиква ргвыпгьи адукIылуа уалагатI…

– Ауи цIабыргыпI. АхIбачва зымгIвагьи тгIачва рыман, аршIыйара хъахIарата йгIанагуаз гьаъамызтI, ауи ахIатырла датша нхартагьи ацдырцун. Саргьи щарда цIуата сгвы йтаз амурад саквгIацапахын асабиква срыдынхалуа салагатI. Абарауаса асквш 1997 мартI мыз агIан «Абазгьква» гвып асцена йгIаквлын рыршIыйара джвыквырцIатI.

Ужвы уыла йгьуызгIацIажьуам ауищтара жвыхвсквша райхIа цIхьата. АшвахIвагIвчва гвып «Абазгьква» уагIахъа ансамбльта рыхьыз щаквгылапI, Къарча-Черкес амузыка культура апны дара ргыларта багъьа рымапI, рыршIыйара амгIва кIьыдата йлыркъьан йрызхIауа йымгIвайситI. А-Дуней Артийск Комитет йаланакIуата КIавкIаз апны йынхауа ахъвшара ауат гвы гIарыртта йъагIалыркIгIаз рыршIыйара анадзара шхIагIу йаквшахIатта гIацIцIуаштI…

– «Абазинка» рыршIыйарагьи ауи апш гватра азрыман Москва апны йынхауа Адуней Артийск Комитет йаланакIуата Россия ахъвшара. Асквш 1998 агIан Къарча-Черкесла ашва культура хIалацIара рпхьадзауата, аршIыйара апны хIъазара хвду аквырцIауата Россия Артийск Комитет «Абазинка» ансамбль йазалху адиплом гIахIыртатI, ауи йаццауата артшхъвага хьзы «Россия апны йпщбахауа Артиада алауреат» гIахIквнадыргатI.

Адуней апны пшдзарала йбергьльу ари ажвлара организация ргватра «Абазгьква» рыршIыйара йъагIазынадырхаз швабыж йсгвапапI. КIавкIаз апны йынхауа ауи ахъвшара абзирала ансамбль йалата ашва зхIвауа ЧквтIу Алина «Хьапщ Бжьы БО-НА-МИ» – хIва йахьызта ашвахIвагIвчва шIаква рквтала Анталия къала апны (Трыквшта) йакIвшаз а-Дуней анкъвакъвра далан, Гран-При гIатылгатI. Асквш 2011 агIан ЧквтIу Алина ачIахIныгIва хьзы «Къарча-Черкес республикала гIатгара зму артист» гIалквнадыргатI.

А-Дуней Артийск Комитет авице-президент, ршIыйарала Академия апрезидент, АМАН академик Бетуганов Ауэс швабыж сизыразпI, апхъахьылагьи хIащтаныкъвара тшауацIнахуа хIацынхушта сгвыгъитI.

Авокал-ъамапсыма гвып «Абазгьква» йалакву армала йгIашIарышвта йашIыхIпхьадзапI: Джьанымбей Алик – абас-гитара; ХIашвцIа Асланбек – авокал; Мижай Беслан – авокал, агитара; ХIашвцIа Умарбек – аквцIа ъамапсымаква, акъвабыз; ЧквтIу Алина – авокал; Къвныжв Тимур – абарабанква; Маз Иналь – авокал, агитара.

ЩардагIвы хIыхъазла амузыка тшпсщара амальпI. Уара тшызлапсущауата ухъызхуа ачIвыйа?

– АпслачвакIра. ПслачвакIра санцара арахьарат абзазара уысква зымгIва схъаштылитI, тшпсщитI, щаквкIыта йджвыквхIцIуш, хIыздынхалуаш ауыс шIыцква срызхъвыцитI. СчкIвынищтара шахматгьи футболгьи бзи йызбитI. Италия рфутболасыгIвчва рыцIа йсгвапхауа гвыппI. Телебарала сырпшланыс апсабара, агIамдараква, аспорт агьиква йгIарыквчважвауа атраква рыцIа схъырхитI.

– Амузыкант, акомпозитор, апродюсер ЧквтIу Владимир йхъыцIыз асквш 60 щарда мцIуата йдыртлапIатI. ХIара хIайчважвара апны уыршIыйара анапаквакI ракIвпI йхIзыгIарбаз. ЙащтагIайуата, йауашызтын, уахьчIвала уыста уызлакву, апхъахьыла мурадта йумакву тIакIв урылачважваныс хIтахъын.

– Апхъапхъа швабыж сшырзыразу схIвара стахъыпI сара сыршIыйарагьи, «Абазинка», «Абазгьква» рыршIыйарагьи гIальаматра рзызбауа, йгIахIыцIагылуа, йгIахIцхърагIауа ауагIа зымгIвагьи. Апхъахьылагьи швгвыгъара хIамайжьауата йшхIылшауала ашва шIыцквала, аконцертквала, агIаджвыквцIара бзиквала швышхIыргвыргъьуш акIвпI хIызщтазлуш. Сара сынхарта Абаза къральыгIва театр апны йаныргIалпI, аспектакльква йрыквыргIапсу амузыка садынхалитI. Атеатр абзибагIвчва цIабыргква ауи бзита йырдыритI. Датшагьи уыс хъадата сыздынхалныс йсымагIальаматкву йрыуапI Адуней абаза-апсуа адкIылра «Алашара» ргIаджвыквцIараква, рпроектква.

Асуратква ЧквтIу Владимир йхъатачIв архив йгIалхпI.

ХIызздзыргIвы йауаш аудиогIвыраква ЧквтIу Владимир йадигалтI:

1 – Бзила

2 – ЙгIанхуштI сара сгвы

3 – Ахьта чвгьа сагитI

4 – Сгвыгъара

5 – Апсуа ашваква рпопурри

6 – Абыгъь гIважьква

7 – сара сгвы

8 – БаъапI бара

9 – НаныкIьара

Айчважвара ХIасарокъва Бильаль йакIвйыршатI,

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki