Library

Йбергьльу аспорт бжьагIвы ЕмгIвыкъва Псабыда дыздынхалуа 13 сквша зныбжьу ачкIвын Цамбов Эдгард боксла Россия Апхъагылара апны дайгIайтI. Анкъвакъвра Анапа апны йакIвшатI. Ари айгIайра йащтагIайуата асквшква 1999-2000 рагIан ййыз аспортсменква рквтала Европа Апхъагылара йалалныс Россия йырщтиуа агвып дрыларцIатI. Ауи анкъвакъвра Ирландия апны йакIвшуштI.

Цамбов Эдгард зхIатларала килограмм 50 йнадзауа рквтала бокс даситI. Анапа апны пщын дайсытI. Йпщбахуз анйара акIвпI рыцIа дызрагIапсаз. АчкIвын йшихIвазла, 10:5 йгIарбарата дайгIайныс злайылшаз абжьагIвы дыззибжьаз акъвльейраква ракIвпI.

Йара Псабыда Рауф йпа Совет Союз анаъаз бокс ауысла йщаквгылыз айсыща цIасква йылайкIныз ъайылшаз насып дута йпхьадзитI. Ауат ацIасква адуней апны рыцIа йагъькву йрыларпхьадзун. Ужвы йъазара амадзаква йгIадзынгылуа ашIаква йшырзыгIахъитIуаш дащтапI. Аспорт апны магIны змам закIгьи гьаъам, зымгIва урызхъвыцра атахъыпI, ажва ахъазла, аспортсмен аъащата дызтагылу, йлахIвараква шщаквгылуа. ЙткIьийу апшIагылра апны абжьагIвы йырхъвыхуа аспортсмен йхъа шйызгIайнапIыцIакIуа, дайгIайныс ахъазла рыцIа йгIайцхърагIуш акъвльейраква шйызгIарысабапуа акIвпI. Ауи ахъазла аспортсмен йапшым къвльейра щарда йырдырра, ргIарысабапра дазыбжьара атахъыпI.
Ужвы Эдгард дамайчуата анкъвакъвра ду тшазирыхIазыритI, йхъагвы аквыпI, йхъаду йыргвышхвагIв, йаба Цамбов Нуралигьи, дйыцта апхъагылара гIатиганыс ймурадта тширыхIазыритI. АбжьагIвгьи ачкIвын йылшараква бзита, апхъагылара дазыхIазырта йпхьадзитI.
Къарча-Черкес йауу датшагьи чкIвынкI – КIвращын Арсен – Россия Апхъагылара апны зхIатларала килограмм 65 йнадзауа чкIвынргIа рквтала джьаз медаль гIатиган Россия йадыркIылуа агвып дрыларцIатI. Ауи бжьагIвыта Архагъ ХIасана дйыдынхалитI.

Квициниа Инна,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki