Library

Гвымлокт апны чкIвынргIа рсовет айззара акIвшатI. Айззара акыт апны спорт комплекс ауыхвара йазынархан. Араъа чкIвынргIа акыт асоциал-экономика уысква рырхъйара рыцIа джьгарта йшзацхърагIушгьи йалачважватI.

Акыт ачкIвынчва ргIаджвыквцIарала ари апш айззара йапхъахауата йадыргалтI. Айззара йалан Красна Восток кыт ахъада Джьмакъвыл Владимир, акыт совет адепутатква, айфанд ахIба Аджьбакь МухIамад, Кавминводы йтабзазауа абазаква руагIахъа культура автономия «Абазашта» аунашвачпагIв Макъвауа АгIвырби, «Алашара» адкIылара рщтийыгIвчва (Мыхц Рамазан, Джьмакъвыл Бэла, Бежан ГIайщат).

Айззара акыт абзазагIв Огвыз Рельян йгIахъитIытI. Ауи акыт апны аспорт гIащаквыргылхта тшауацIнарыхра шатахъу йауацIыхта даквчважватI. «Акыт апны спорт комплекс ныжьхта апхьарта аспорт зал акIвымкIва ауи ауысла датша закIгьи гьаъам, – йхIватI ауи. – Йхвбахауа, йцбахауа аклассква йрыцIу ачкIвынчва айдзаква тутын рчвауа, рзгIвадара йазазарархуа адзайшаква рыжвуа тшадрыщцитI. Зарарта рхъа йазгIаргуа тшгьазырдыруам. Апхъала ацIайква дара-дара турник дыргылуан, гIврала йапхъанысуан. Ужвы ауатква гьаъахым. ЧкIвынргIа рызгIвадара зрыбагъьушта, йандухара йрыхъвушта йаъу аспорт шакIву гьгIаргвынгIвуам».

Айззара апны йгIачважвакваз асабиква рбжьара, рапхьара, раъащаква рпны аспорт амагIны шдуу гIалыркIгIатI. Згвы цхIауа ачкIвынчва сквшщарда цIуата йаркIыта йгылу аткваныжв атдзы багьандата йгIарахвта хвитра абакIра йабжьагу спорт залта йырчпахныс гIартахъхатI.

Акыт ахъада Джьмакъвыл В.Х. йшихIвазла, аунашвахъцIарта аштат апны спортла аметодист йъанатIа гIандыршатI. СынчIва ауи абюджет йауата сом зыкь 20 аспорт ъамапсымаква рхвгIара йазалхпI. Культурала КЧР аминистр йгIаджвыквцIарала, уыжвласыла акыт акультура тдзы апны асабиква ауагIахъа йырзибжьаныс ахъазла мчыбжьыкI ауацIа хын ауи зъачIвагIу ахореограф дгIайлуштI.

ЧкIвынргIа спортла аметодист йъанатIа нкъвигарныс Огвыз Зураб йыхьыз гIархIватI. Ауи аспорт зал адгалра ауысгьи йыхъвдаквырцIатI.

Кавминводы йтабзазауа абазаква руагIахъа культура автономия «Абазашта» агIащтийыгIвчва Макъвауа АгIвырбии ЧвзыкIьа Радийи аспорт зал ауыхвара йацыркIтI. Радий аткваныжв атдзы хвгIата ауи абагьандара ауыс зынгьи ауатыкв йгIатамылхуата йаныргIалра атахъыта йпхьадзитI.

Айззара амщтахь гвыпкI аткван атдзы аъаща йызтагылу йапшытI. Инженер-уыхвагIвкI дгIазшIыртта атдзы арчIаджьра ахчата йаквшвуш гIайдрыпхьадзарныс йалачважватI. Ауи атдзыжв дмырчIаджьуата спорт зал шIыцкI руыхваныс рыцIа йагъьханыс ауыпI.

Айззара амщтахь «Алашара» ргIащтийыгIвчва чкIвынргIа ргвыпи акыт ахъада Джьмакъвыл Владимири ранйара йалазларныс йдрайгватI.

Бежан ГIайщат,
«Алашара» аинформация рхъвыхра ахъвшара.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki