Library

Гвымлокт абзазагIвчва йузалмыргуш аъаща йташватI: адзыгIв ду рыгIвситI, азамзамдз уахъгьи тшынгьи адгьыл йгIацIцIитI, ауаса рунагIваква рпны мызпхьадзара цIуата дзы гьырзынадзум.

– МызкIы айхIа цIитIта хIунагIва дзы гьазгIайуам, – йхIвитI акыт абзазагIв Шармат Кьащиф. – Амшква араса швабыж йаншуару хIуыс швабыж йбаргвхатI. Спа Кисловодск дтабзазитI, мчбыжьигIадзапхьадза дгIайитIта дъадзаным йхIызхъуш дзы хIызгIадигалитI. Акыт абзазагIвчва зымгIвагьи адзыхьква йрызцумца дзы гIаргитI. Апхъала акыт адзхъа адзыхьква щардан, ауаса асквш 2002 агIан адзы ангIатыгIвры ауат рыуа щарда анышви ахIакъвари йхъыргIватI. Ауи асхъан адзгIагга ныкъвартаква бзита йынхаркIвун, заджвгьи адзыхьква уыста йгьйымбатI. Абараужвы кьазу йгылата йгIанхаз адзыхьква рпны дзы гIатырхитI.

Акыт абзазагIвчва райхIарагIв тажв-лыгажвпI. АчкIвынчва нхарта ъагIарауа йцумца акыт йтыцIитI, ауаса ужвы уыста йрыму зымгIва кIарпситIта абари апш пхын шуара ранчви рабачви дзыдъа йшгIанымхуш йащтата запыт йгIайлитI.

– СквшбжакI цIуаштI сунагIва дзы азыгIамдзауищтара, – йхIвитI Измаилов Артур. – Адзы йазалхта тара азыхIчпан хIыгвлачва ртракторла адзыхь йгIагIгуамцара йтахIчвитI. Зхъамаль ззымбахуа атажв-лыгажвквагьи хIшырцхърагIуш хIащтапI. ХIбзазаща датшаханыс шхIтахъу ажва гьалам, сара заджвыла араъа нхартакIгьи ъасмауыз йгIалцIла сан лхъазы дгIанызыжьта акыт стыцIра атахъхатI. Абар ужвы дзы ъагIатыхIхлауа адзыхь зрыцкьаз, йгIарысабап йауата йадызгалыз Егьзакь Муса йакIвпI: абыхъв ащапIы апны дзыхь гIайаутI, дзтара азичпан ауи йаназнахара хIаргьи хIыдзтараква йгIартахIчвахитI.

Акыт аунашвахъцIарта апны йшгIахIархIвызла, адзгага ныкъвартаква асквш 1983 агIан йырчпатI. Ауищтара зынгьи йазалху рчIаджьра гьакIвдмыршатI. Ауи адзгага жвырата йахьыз процент 90 йаъарапI. Ужвы унагIвакI дзлитркI азынадзара апхъала литр 50 атруба йкIылситIта адгьыл йалалитI. Дзы ззынамдзауа абзазагIвчва ахв шрымшвауа гвынгIвырапI, ауаса анасосква нзырхауа аэлектрокъару ахв швамкIва йгIанхитI. Абараса ауыс алапIатIауамца йцIолахитI.

– СынчIва арчIаджьра нхараква сом хмильуанкI рзалырхтI, – йхIвитI Гвымлокт ахъаунашвахъцIарта ахъада йцхърагIагIв ХвытI Йараджьыб. – Ауи ахчала ареспублика апны ауыхвара ауысла аунашвачпарта арчIаджьра йазалху ашвъаква дрыхIазырта Гвымлокт адзгага зырчIаджьуаш анхарта тендерла йщаквдыргылта дара анхараквагьи ахъвдаквырщтра атахъыпI. Ари ауыс мызпхьадзарала йауырахатI. АрчIаджьра нхараква йрылымгакIва акыт абзазагIвчва дзы гьырзынадзушым. Акыт аунашвахъцIарта ахъада ауыс шласхуш ацIыхъва дтагылапI. ХIаргьи ари акыт хIтабзазитI, датша зджьарала хIгIатыцIта хIгьгIайуам, анахьанат рапшта дзы хIазыбжапI.

ХвытI Йараджьыб зунашва йхIваз анхарта адиректор Чотчаев Ахмат хIйынйан ауыс уахьчIвала йзкву гIахIайхIвырныс тшизынахIырхатI.

– «Ауыхвара шIыц аунашвахъцIарта» нхарта акъральыгIва ртланыкъвала йуысрхъйагIвпI. СынчIва КъарчачкIвын район йаланакIуа Гвымлокт адзгага арчIаджьра хIхъвдаквцIарапI, – йхIвитI Чотчаев Ахмат. – АрчIаджьра нхараква сом хмильуанкIи зыкь гIважви цби рзалхпI. Ауи ахча йауата сам гIвмильуанкIи зыкь пщынгIважви агIба афедерал бюджет йгIалхпI, ареспублика бюджетлагьи – сом зыкь жвшви гIважви жвагI. УахьчIвала ашвъаква абгата йхIрыхIазырхьатI. Ахабза апкъ йтагылата анкъвакъвра акIвшитI. Йшалгуш хIалачважваныс хIгьахвитым. ХIгвыгъитI анкъвакъвра апны ауыс здыруата йзырхъйауа, зкъару ту нхарта бзикI йрыквшвушта. Ауи асхъан хIызту асквш ауацIа Гвымлокт адзгага дырчIаджьуаштI, абзазагIвчва руыс агалагьи рыцIа йагъьхуштI. ХкилометркIи бжакIи зуру адзгага трубаква рпсахныс акIвпI йшаъу. Йапымшвтуата аугIа дзы рызцаныс ахъазла атрубаква рпсахра йахъазымкIва акъвийквагьи рпсахуаштI, арчIаджьра анахьанат анхараквагьи акIвдыршуштI. Адзы ауысла абзазагIвчва гIапсара рымбахныс акIвпI зымгIва ззынарху.

Акыт зладыргвыгъауа щардапI. Адзы ауыс аугIа сквшкъомкI руацIа йыззпшуа апсабара газ ъарымамгьи рхънараштылхтI. ЙымгIвайсуа й-21-хауа асквшышв апны ауыжвгIанчIви амальква ага йщардазтынгьи Гвымлокт абзазагIвчва агвжвайра йгIалырхын апхъанчIвиква рапш адзбылгаква гIащтIырххныс йхIазырпI.

Квициниа Инна

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki