Library

СынчIва май мыз агIан абаза чкIвынргIа р-АдкIылара «Шарпны» йгьи ажвлара гIалцIырта «Марамыз» ацIагылын амхIаджьырква ртынхаква рыхъазла цхърагIара шадыркIылуа ахабар дыргатI. АцхърагIара ззынарху айсра алгъачI йцIанакIыз Сирия йгIатыцIхта Апсны апны хъацIакIырта зауыз атгIачваква ракIвпI. ЙхIвара атахъыпI ауат араъа гIвнабзазарта йахъазымкIва ажвлара рпны рбзазаща зрымайруш амальквагьи шнарахвыз: апсуа бызшва ъаддырдыруаш йазалху акурсква рзыгIахъырттI, акъральыгIва тланыкъвала йапымшвтуата ахчала йгIарцхърагIитI, нхарта рызгIарауитI. Ага ауаса йаъазтынгьи, хакв шIыц апны убзазара шIыц-шIыц йгIащтIуххырныс швабыж йбаргвыпI.

Ауи ахъазла агIаджвыквцIара бзи адгалагIвчва арепатриантква рхъатачIв бзазара закIыла йахъварныс мурадта йыркIытI. СынчIва май йгIашIарышвта августдза сом зыкь 285 гIазыркIкIытI. Ауи ахча аунагIва пкъыгIваква алархвгIаныс йщаквдыргылтI: 15 рыхьшвашвагакI, 10 джвджвагакI, газла мацIауыга хIаквкI, дзырпхага баккI. Абаза чкIвынргIа р-АдкIылара «Шарпны» аунашвачпагIв Джьмакъвыл Бэли ажвлара гIалцIырта «Марамыз» аунашвачпагIв ТIыкIва Анити СогIвыми Гудаути рпны арепатриантква йрынйан ауат апкъыгIваква зымгIва рнапIыцIадыршватI. Атехника йазыбжу зымгIвагьи йшырзымхъаз гвынгIвырапI, ауи ахIатырла апхъапхъа асаби тгIачваква гIалыркIгIан йыззхъаз йрыларшатI.
АмхIаджьырква ртынхаква цхърагIара рзызщтийыз Абазашта йбзазауа райщчва швабыж йшырзыразу рхIватI, йгIарызцIгIахтI. Ауыс адгалагIвчва ауыс йацхърагIаз репатриация ауысла Апсны акъральыгIва комитет анхагIвчва йырзыразта ажва пхала тшырзынадырхатI, зайщчва ррыцхIагIа гвчIагIвла йадгылыз, ацхърагIара зкъару алазцIаз зымгIвагьи йгIарайхIвахIвтI. Сирия йгIатыцIхыз арепатриантква цхърагIара рзыгIаныршарала адгалагIвчва ргIаджвыквцIара гьашIадымрыстI, уахьчIвалагьи йынхаркIвитI.

Квициниа Инна,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki