Library

Апcны апны агвчIагIвчпара гIаджвыквцIараква ужвы акIвпI тшанауацIырхуа.
ЙцIыхъвахауа асквшква руацIа арат ауысква нкъвызцауа ажвлараква гIанрдыршауа йалагатI. Ауат асаби ныкъвадыкъвакви асаби йыбакви йырцхърагIитI. Абарауат йрапшу ажвлараква йрыуапI акультура гвчIагIвра гIалцIырта «Ашана». Ауи гIанзыршаз Шакая Беслан йакIвпI. Беслан йгIаджвыквцIарала агвчIагIвра гIалцIырта асквш 2008 агIан Ахъахвитра Амш йадахIвуата йгIаншатI. Ажвлара «Ашана» ауралагьи йрыцынхитI Россия агвчIагIвра гIалцIырта «Коммерсантъ», афирма «А-мобайл», акоммерция банк «Гарант-Банк», датшагьи. Йынхауищтара «Ашана» анхагIвчва зызгIва хьанту саби 35-гIв дырбзиханыс рылшатI.

«Ашана» адиректор Колосова Джевейра йшылхIвауала, агвчIагIвра гIалцIырта мурад хъадата йамапI Апсны республика апны йгIадзынгылуа абанпараква ракъыль йалархIара, ръадаб-намыс ащтIыхра. Ауи ахъазла ауат чкIвынргIа рарыпхьара, ауагIахъа рызгIвадара арыбагъьара, апсуа уагIахъа культура атшауацIнарыхра ркъаругьи рахчагьи аларцIитI. Нархарта хъадата йаланхитI Апнсы апны хьантата йчмазагIву асабиква райъазара ахъазла ахча азкIкIра. Анхартаквагьи лшара зму абзазагIвчвагьи алата асквш 2011 февраль мыз йгIашIарышвта «ХIацIагылпIта абзазара гIахIхчапI» – хIва йзпхьауа агIаджвыквцIара акIвшитI.
– Апхъапхъа цхърагIара ауысла йызлагIахIыдгылуата йщаквгылаз цызгIвакI ракIвын, ужвы азгIваква руысла алых гьаъахым, – лхIвитI Колосова Джевейра. – ХIара зылшара дуу аклиникаква ракIвпI хIызцынхауа, ауи ахIатырла хIгIапсара ымдзуата сайыр шгIалцIуа гвынгIвырапI.
Июль а 12 СогIвым АмхIаджьырква рдзтшпурам апны пшдзата йадгалаз айззара акIвшатI. Ауи «Ашана» агвчIагIвра уысква йырзынархата йджвыквылтI. Акция ахъазла ачвахъабага магнитчкIвынква дрыхIазыртI: Апсны акъалаква Гагра, Пицунда, Гудаута, Афон ШIыц, СогIвым, Очамчира, Ткъварчал, Гала рквпшыраква рныта.
Ачвахъабагаква рпшцIыщтра йгIанагуа ахча йчмазагIв хIатлу асабиква райъазара йазалхпI. АуагIа айчра рымамкIва «АгвчIагIвра амагнитква» рхвгIитI, ауи йазыртиуа ахча цхърагIара швабыж йазыбжу асабиква згIвадари гвыргъьари шырзгIанагуаш рдыруата.

Акция агIахIвраквали ауагIа рхъвмараквали йгIахъыртIытI. АхIбачва рыхъазла атшпсщара программа адыргалтI. Асас хвыцква рыла зырпшуашызгьи щардан: аниматорква, акIьанджь дуква, асабын швахъырчква ралажьра, ауасамцара. Асасчва рпахь асаби гIахIвра ансамбльква гIахъвмартI, ауагIа ашваква гIархIватI. АгвчIагIвра гIаджвыквцIара ужвыгьи йымгIвайсыркIвитI, сынчIва октябрь а 1-дза йакIвшуштI.

«Ашана» гIалцIырта анхагIвчва йашIамсуата ауыс бзиква дырхъйитI. Ауат радресла ансимшы ауагIа рразыра гIазырбауа асальамшвъаква гIайитI. Рыуа запшызлакIгьи абарат ажва гвапаквала йалгитI: «Анчва йщквырла швара шваъапI!»

Квициниа Асида,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki