Library

Арыпхьара ауыс йара лкIгIара амапI. Араъа акалендарь абгъьыцква гьракIвым, адырра йапщылу амшква ракIвпI йырпхьадзауа. Абаза район апны йагIвсыз апхьара сквшы агIарбаракви йгIаталуа апхьара сквшшIыц ахачIвкви йрылачважватI. Арыпхьара йгьи акультура уысквала Абаза район аунашвахъцIарта аунашвачпагIв Муртаз Зимфира йшылхIвазла, арайон апхьартаква шIыцра щарда злу арыпхьара нархартаквала йынхауа йалагатI.



Асквш 2012 ауацIа арайон арыпхьара уысква рмодернизация сом агIмильуанкI аквдрыдзтI, ауи йгIалцIла арыпхьара кабинетква радгалра агалагьи йагъьхатI. Апхьартаква рырчIаджьра ауысквагьи сом гIвмильуанкI рзалырхтI. Арыпхьара амаль шIыцквала адгалра апны магIны ду зму арыпхьагIвчва рдырраква йрылархIара акIвпI. АпычIв апхьартаква рарыпхьагIвчва зымгIвагьи ауи йапшу адырраква раутI. Амодернизация апрограмма асквш 2013 ауацIагьи абзазара йаларжьитI, Абаза район апхьартаква ауи ауысла сынчIва сом хвмильуанкI райхIа рзалырхтI.
УахьчIвала арайон апхьартаква рпны арыпхьагIвта 260-гIвы нхитI, ауат йрыуата 138-гIв йхIаракIу акатегория рымапI. Ари аъачIвагIа апны зъазара гIазырбауа арыпхьагIвчва рквтала йакIвшалауа анкъвакъвраква зымгIвагьи йрылапI. Абарат анкъвакъвраква рпны арыпхьагIвчва архъвыхраква йрыцIситI, йыззычпу рзыгIарбитI, йашIашIпшитI, ръазара йаладырхIитI, йадыркIылуа арыпхьара амаль шIыцквала рхъвыцраква агIвыршитI.
Арыпхьара апны псахрата йгIаншауа йрыццауата анхаша йшаладырхIушгьи йащтапI – квтанайта арыпхьагIвчва рынхаша сом 12800 йнадзитI. АсабигIзартаква рынхагIвчва рынхашагьи йалахIатI, ужвы ауи сом 12969 йаъарапI.
Арайон аунашвачпагIвчва асабигIзартаква рынхара адгалрагьи шагъьхуш йащтапI. Асквш 2012 агIан ауат рпны асабиква 210-гIвы йнадзун. Ужвы арыпхьара ауысквала аунашвахъцIарта анхагIвчва йнарахвыз амаль шIыцква рбзирала асабиква 50-ла йрылахIатI. Ауаса ужвыгьи саби 275-гIв ркьазу йазпшитI. Асквш 2013 алымгаскIва рыцIа йабаза кыт дуу Псыжв апны уыжвгIанчIви сабигIзарта шIыц гIахъыртIныс рмурадпI. АсабигIзарта саби 75-гIв аднакIылуаштI.

Муртаз Зимфира арыпхьара кIьыдата йацгIайуа адырракви абжьари руысгьи даквгIашIастI. Араъа асабиква рхIальшанква зсайуа амальква гIаншитI, зхъашыгIвра бзийу асабиква рылшараква йрылахIитI. Абаза район апны ауи ауысла йынхитI асабиква рыршIыйара а-Квта йгьи асабикви чкIвынргIи рспорт апхьарта. Абаза апхьартаква рапхьагIвчва арайонла, ареспубликала, акъраль ауацIала йакIвшауа анкъвакъвраква джьгарта йрылалитI, апхьара апынгьи, аспорт апынгьи адахIвра бзиква рымапI. ЙгIалкIгIара атахъыпI апхын ауацIа апхьартаква рпны атшпсщартаква шадгалаз, йшынхуз. Араъа саби 145-гIвы тшпсырщатI. Апхьартаква зымгIвагьи фачIв пхали айъазара уысквали йадгалапI.
ЛгIачважвара далгауата Муртаз Зимфира арыпхьагIвчва драйхIвахIвтI, йыздынхалуаш ауысква шщарду, ачхIари, амайчри, азгIвадари, адахIвракви шырзылтахъу лхIватI. АрыпхьагIвчва рынхара ргви рпси аларцIитI, асабиква адрыпхьитI, йрылабжьитI. Ауи акIвпI йыззынархаз айззара амщтахь ауи йалакваз зпшыз агIарбартагьи.

Ешерова Муъминат,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki