Library

МартI а 19 Черкесск апны культура дырранкъвгарала а-Дуней абаза-апсуа адкIылара «Алашара» ахъвшара апрезентация акIвшатI. Ауи ахъвшара Къарча-Черкес республика ауацIала йынхуштI. Айззара йгIадгылтI ареспублика авласть органква ргIащтийыгIвчва, Абаза район ахъадагьи аунашвачпарта анхагIвчвагьи, абаза кытква рунашвахъцIартаква рхъадаква, ажвлара организацияква рунашвачпагIвчва, ахIаракьатчпагIвчва.

Апхъапхъа «Алашара» апрезидент Егьзакь Муса ХIабальа йпа адкIылара нхарата йакIвдыршаз айшыста даквчважватI:

- быжьсквша руацIа йакIвшалауа «Абаза ашва афестиваль» – ари агIамта ауацIа Тльача Альберт ашва анкъвакъврата хвба акIвйыршатI;

- абаза, апсуа уагIахъаква ртурых архъвыхри агIащаквыжьри, Емельянова Н.М. лунашва йацIата йадкIылу анаука-рхъвыхра, агIвырагIацIщтра гIаджвыквцIараква;

- адунейла йынхауа «Абаза Къраль» сайт гIаншатI, ауи гIаншищтара гIвысквша цIитI, хвбызшвакIла йынхитI;

- Апсны Республика апны аспорт атшауацIнарыхра.

«Алашара» агIаджвыквцIара шIыц швабыж йауацIыхпI, ауи ажвлара бзазара анархартаква зымгIвагьи гIацIанакIитI (акытква рпны асоциал-экономика атшауацIнарыхра, айъазари азгIвадарахчари, аспорти чкIвынргIа руыскви рщтIыхра, асабихъи атгIачви руысква, ахIбачва рыжвлараква ргIащаквыргылхра, ахабзахчара амальква ргIаныршара, аинформации архъвыхра уыскви рахъвдаквыщтра); аэкспертква алата йлыху апрограммаква абзазара йззалажьуаш агвып адкIылапI.

Аэкспертква зъачIвагIа уысква йрызъазу, дахIврала йахъвдаквызщтуа уагIапI. АдкIылара анхара нархартипхьадза ауысла экспертта 10-15-гIв йрайкьангьашлуштI. Апрограммаква анлырхуа абаза уагIахъа уысквала амониторинг рчпата, уадыргIвана ауат Ажвлара Совет алапшта йандрыбагъьара амщтахь акIвапI. Ажвлара Совет йалазлуштI ажвлара организацияква рунашвачпагIвчви пIатIу зкву ауагIа ргIащтийыгIвчви. АгIаджвыквцIараква зымгIва сквшщарда гIарыцIанакIуата абаза уагIахъа рбзазара агъьчIвра йазынархата йрыдынхалуаштI. Къарча-Черкес апны ари анхара унашва ахъицIуштI «Алашара» авице-президент Ажьи Зауыр Чапай йпа.
Егьзакь Мусса йшипхьадзауала, ауагIахъаква разазаъащагьи магIны амапI. «Алашара» апроект КIавкIаз ауагIахъаква радкIылрагьи йазынархапI, йшпакIву ухIварыквын ауат йынкъвыргауа ацIаскви ахабзакви райгвара арыбагъьара йащайдзапI.

Апрезентация анакIвшуз асхъан ахабарргагаква рынхагIвчва арат азцIгIараква гIадыргылтI: «ЙырзыхIазырума момкIва йгьырзыхIазырымма абаза уагIахъа абарат агIаджвыквцIараква?» «Ари апрезентация акIвыршара збзиру ачIвыйа, дзачIвыйа?» АзцIгIараква джьауап ритуата Муса ХIабальа йпа йшихIвазла, хIуагIахъа лшара ду зму, зкъару абзира ахъазла йадызкIылныс, ауи гIазрысабуа йынханыс зтахъу гIвычIвгIвыс гвыбзыгъа щардагIв гIарылцIтI. Ажва мцыраква рзаман щарда цIуата йагIвсхьатI, ужвы уыскI гIаджвыквызцIаныс, йахъвдаквызщтныс зтахъу ауагIа йыркьазупI.

Егьзакь Муса йшгIаликIгIазла, ари анхара йалыргу ащтацаща амата йакIвшуштI. Акытква рпны згвы цхIауа чкIвынргIагьи ауысква рырхъйара йгIадкIылра атахъыпI. Ажвлара рпны ахIбачва ргыларта гIацарпахта йщаквыргылхра атахъыпI. Нхарата йакIвшауа, абзазара йалалуа апроектква ахабарргагаквагьи интернетгьи руатыкв йтазлуштI.

Апрезентация апны йгIадрайгваз асасчвагьи йхIвахIвуата йгIачважватI. РгIачважвараква рпны КЧР а-Хъада йунашвахъцIарти а-Правительстви рунашвачпагIв йцхърагIагIв Чква Нурби Заудин йпа йгьи Ставрополь край абазаква р-НКА «Абаза» аунашвачпагIв Чагва Армида Хзыр йпхIа йшырхIвазла, абаза уагIахъа рыжвлара абари апш ажва мцыра злам аквгIазшIытра щарда цIуата йазыбжан, йазпшуан. Ажва гвапала йхIвахIвуата датшагьи араъа йгIачважваз йрыуапI культурала КЧР а-Министр ЕмгIвыкъва Уали, афилософия наукаква рдоктор Гваджьа Къахвын, Абаза муниципал район аунашвачпарта ахъада Ныр МухIаджьыр, Черкесск къала аимам Хвби Иналь, «Полиглот» колледж аунашвачпагIв Дагвжвей Марджьанат. «Абазаква хIуыс уахьчIвала йгьгврыдзгадзам Егьзакь Муса йапш згвы цхIауа гIвычIвгIвыс данхIылазара, – лхIватI Марджьанат ГIиса йпхIа. – УахьчIва абазаква хIтурых апны напа шIыц гIахъхIтIитI. Ауаса йанаъазара чкIвынргIа рбжьара ауыс хъгал амазара атахъыта йспхьадзитI».

Айззара хъигIвахуата Муса ХIабальа йпа ажва анйырт Къарча-Черкес апны «Алашара» ахъвшара апрезентация йгIадгылта айззара анхара джьгарта йалаз зымгIвагьи дшырзыразу йхIватI, апхъахьылагьи абзираква рзитахъта драйхIвахIвтI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki