Library

Къвныжв ЗамахIщари Уасман йпа асквш 1916 декабр а 5 атшын Псыжв кыт адгьылрхарджьыгIв йтгIачва апны дйытI. ДчкIвынта йани йаби йхъышвттI. Черкесск апны чкIвынргIа йырзыгIандыршаз апычIв апхьарта дгIалгатI, уадыргIвана асквш 1937 агIан ЭркеншахIар апны атракторнкъвцара тшазибжьауата дапхьатI. Псыжв атракторква радкIылырта апны сквшыкI аъара трактористта дынхатI.

Асквш 1937 агIан Ар Къапщ къвырльыкъвхара дызшIырттI. Асквш 1939 агIан Мараташварта Украина ачIвыла апны ахысыгIвчва рырхъв дрылата къвырльыкъв йхун. Асквш 1940 февраль а 5 агIан Къвныжв ЗамахIщари ахъацIари акъвльейри гIайырбауата агъа йдзот дталын йгIагIвижватI, гIважвижвагIвкI раъара йнадзуз асолдаткви афицаркви йщын афицаркI гъарта дгIайкIытI. Ауи афицар афиннква рыр даунашвачпагIвта йгIацIцIтI. АгIвгIвы Нежинский Валентин йкнига «Афырква рыйачIваква» (Черкесск, 1985) апны ЗамахIщари йфырра даквчважвитI.
Къвныжв ЗамахIщари апхъа йгылата айбащра йпшцIалуаз, Маннергейм йлиния пхьызжваз айсыгIвчва дрылан, агъа йгIагвысраква багъьата дырпшIагылуан. Асквш 1940 мартI мыз агIан, совет-фин айсра алганыс мчбжьыкI ахIа атахъыхымкIва, дхвхатI. Ар чымазагIвхьпшыра дангIацIыргIвгIах йкъвырльыкъвхара найырдзахныс ахъазла Москва дырщтитI. Кремль йызшIыртра атахъыта йазпшуаз айсыгIвчва къвырльыкъв ъархуз архъв дрыларцIатI.
Асквш 1940 апрель а 11 агIан СССР ЙхIаракIу а-Совет а-Президиум а-Щаквыргылрала афин гвардия шкIвокIва рабакIра апны ар унашвачпагIвчва йдыргылыз ахачIвква швапха бзи гIайырбауата, фырри хъацIари йылата йъайырхъйаз ахъазла (Къарча-Черкес абзазагIвчва зымгIва драйпхъахауата) Совет Союз а-Фыр ртшхъвага хьзы гIайквнадыргатI, Ленин йорденгьи «Хьапщ ЙачIва» медальгьи гIайыртатI (й-340-хауа аномер амата).
Йара ауи асквш май а 16 атшын акъральыгIва ртшхъвагаква гIарыртныс ахъазла айбащраква рпны йпшцIаз айсыгIвчва Кремль йдрайгватI. Артшхъвагаква Калинин Михаил Иван йпа йгIарнапIыцIайцIун. Ауи ЗамахIщари йквпы Ленин йорденгьи «Хьапщ ЙачIва» медальгьи алайцIатI, багъьата йнапIы йкIын йхIватI:
– Фырта уайсытI, пIатIу уыквта йынкъвга!
Асквш 1940 йгIашIарышвта Къвныжв ЗамахIщари Минск атанкнкъвцара училища апны дапхьун. Абашта айсра Ду ангIалага асквш 1941 июнь мыз йгIашIарышвта ауаъа дпшцIалтI. Ауи Орша къала, Белоруссия анахьанат аштаква рыхъазла дайсытI. Асквш 1941 август агIан Саратов йтагылаз атанкнкъвцара училища йапхьара найырдзахныс дырщтитI. Асквш 1942 апрель агIан дчмазагIвхIатлахан ар чымазагIвхьпшырта апны йайъазун, апрель аннадза дъазгIвадамыз йгIалцIла айсра дгIапшцIырщтхтI.
Ртшхъвагата Ленин йорден, Абашта айсра аорден, амедальква гIайквнадыргатI.
ЗамахIщари Уасман йпа гIвыпхIчви пакIи гIадзынйыргылтI, ауат ргIариква йыла йабатI, ддыргвыргъьатI.
Ужвы Псыжв апны йапхъахауа Совет Союз а-Фыр Къвныжв ЗамахIщари Уасман йпа йыхьыз акытквта урам йахъыпI. Араъа йбзазауа дзачIвызлакIгьи йкытлагIв фыр дйыладухауата анцIралагьи йгвы дтазлуштI.

Квициниа Инна, Мыква Мурат,
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki