Library

Абараса йызхьзыз асурат гIарбарта Амман апны а-Черкесква ргвчIагIвра жвлара апны дахIврала йакIвшатI. АгIарбарта а-Дуней адкIылара «Алашара», культура ауысла РФ а-Министерства йаланакIуа культурологияла а-Россия институт йгьи Йордания апны Россотрудничества акъвырльыкъвхарта рацынхара уысква йрыуазакIыта йакIвшатI.

АгIарбарта а-Черкесква ргвчIагIвра жвлара апрезидент Самир Къардан йгIахъитIытI.

АпшыгIвчва тшрыхадыргIвазаныс рылшатI апхъанчIви замани уыжвгIанчIви замани гIазырбауа асуратква разкIкIра. УыжвгIанчIви суратква Къарча-Черкес республика апны асквшква 2010-2012 руацIа Емельянова Надежда йхъылхтI. АпхъанчIви заман гIазырбауа асураткви ашвъакви Къарча-Черкес йгьи Ставрополь рархивкви рмузейкви йадыргалтI. Амузей коллекция йаланакIуа асуратква рыуа щарда Россия апны ареволюция апхъала йбергьльыз асуратхъыхыгIв ду Ермаков Д. (1846 – 1916) йчIвыпI.

Йорданшта апны Россотрудничества апредставительства аунашвачпагIв Дорофеев Александр ажва пхала а-Черкес жвлара тшырзынайырхатI, Россия йгьи Йорданшта агуманитар уысквала рацынхара атшауацIнарыхра йъацхърагIауа ахъазла дшырзыразу йхIватI.

Александр Александр йпа культурологияла Россия аинститут адиректор Разлогов Кириллгьи ажва пхала тшизынайырхатI, а-Дуней абаза апсуа адкIылара «Алашара» апрезидент Егьзакь Муса тшизынайырхауата анаука, арыпхьара, акультура проектква радгалри абазазара ралажьра ауысли ауи ажвлара нхара ду шакIвдыршауа гIаликIгIатI.
«Абари йапшу ауысква рырхъйара апны хIацынхара Йорданшта рыжвлара бзира алырбгIауата йаквчважвитI, Лагъь КIавкIаз аугIахъаква руысла Россия аунашвачпагIвчва йынкъвыргауа аполитика чва бзи гIахъанацIитI, агIвымакъральква рпны Россия акъвырльыкъвхартакви Йордан Хашимит паштахIыгIва йту Лагъь КIавкIаз аугIахъаква рдиаспори ращтаныкъвара атшауацIыхра йазынхитI. Анаука ауысла Россия йгьи Йорданшта рацынхара атшауацIыхра апны швамайчри швалацIари хвду рзыгIбауата швабыж хIышвзыразпI», – араса йгIанахIвитI культурологияла Россия аинститут йгьи а-Дуней адкIылра «Алашара» йырзынархата ауи йгIайщтийыз ашвъа.

АгIарбарта даквчважвауата ауи адгалагIв Емельянова Надежда йшгIалылкIгIазла, асуратква рпны абаза угIахъа ртурых анапаква рыцIа йауацIыхта йшгIалырбушыз дащтан. Араъа асуратква ахъаз ршIыйара квпшырата йахъазымкIва атурых гIазырбауа швъа цIабыргыта йалитI.

Акультура ауысквала агIвымакъральква рыцынхара, ауи атшауацIнарыхра йырзынарху апрограмма йаланакIуа уыскIта акIвпI асурат гIарбарта шадгалаз.

Октябрь ацIыхъва, ноябрь мыз агIаталымта рагIан апхъахьыла абзазара йалажь йауаш ауысквагьи ауатыкв йтан. Ауат йрыуапI апроект «КIавкIаз аугIахъа: ауат адызкIылуа акультура амальква» йаланакIуата Дуней редакция комитет агIаныршара. Акомитет хачIвыта рпахь йгылазлуштI магIны зму ашвъаква гIазрыбергьыльуаш атгIачваква, архивква, амузейква ршвъаква рырхъвыхра, хIкъраль апынгьи агIвымакъральква рпынгьи ауат ашвъаква копия рхъыхра ауыс адгалра. УадыргIвана КIавкIаз аугIахъаква ркультура йгIаквчважвауата ауат асураткви ашвъакви сурат альбомта, книгата ргIацIщтра адгалра.

«Абаза культура а-Фестиваль» атема рыцIа йауацIыхта асквш 2013 апрель-май мызква рагIан Йорданшта апны абаза культура а-Мшква акIвдыршаныс йалачважватI. Ауат амшква рагIан Амман апынгьи анахьанат акъалакви акыткви рпынгьи абаза ашвахIвагIвчва рыршIыйара гIадырбуштI, Россия йтабзазауа абазаква рмузыка культура йахадыргIвазуштI.

Ауи акIвпIта, асурат гIарбарта «КIавкIаз: азаман асуратква» Россия йгьи Йордания рацынхара атшауацIнарыхра арыбагъьауата йакIвшатI. Ауи йаквшахIатхатI араъа йсасуаз Россия апосольства анхагIвчва йгьи Йорданшта йту ачеркес диаспора, «Нарт» телеканал анхагIвчва гвып, ари аршIыйара бзи йызбауа апшыгIвчва, абзазагIвчва рыуа щардагIвы.

Квициниа Инна,

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki