Library

Август агIаталымта Апсны апны къраль щарда ръачIвагIагIвчвала йалу аспелеология экспедиция адунейла рыцIа йцIолу ахIатшпы агIапшыхвра ауысла анхара джвыквырцIатI. Аэкспедиция анхара мчбыжьквакI руацIа йакIвшуштI. АхIатшпы Арабика щхъа апны йаъапI, амшын ахъахь йгIашIарышвта йупхьадзарыквын йъану ахIагIара метр 2250 йнадзитI. Аспелеологква араъа йапхъахауа архъвыхра нхараква асквш 1960 агIан йджвыквырцIатI, йара ауи агIан йбергьльу аурышв географ Крубер Александр йыхьыз ахъарцIатI.


Апсны ащхъаква рпны хIатшп цIола шщарду бзидздза цIуата йбергьльыпI. Й-ХХ-хауа асквшышв ахъа ауат рунашва афранцуз апхьахьа-карстолог Мартель йхIвун, ауи Апсны ахIатшпква щардала йырхъвыхуан. Асквш 80-ква рагIан зунашва хIхIвауа ахIатшпы ахьыз ауатыкв йатагIаталхтI. Ауи асхъан Киев йауу аспелеологква ари ахIатшпы ацIгIва йнадзаныс рмурадын, ауаса метр 340 айхIа йгьызбгъамылтI. Ауи атлахан аои ахIатшпы «Воронья» – хIвагьи йапхьауа йалагатI. Йара ауи агIан Апсны апны гIвхIатшпыкI рпшыхвныс рылшатI – «Арабика» (метр 1110) йгьи Жовеквары (метр 1240). Ауатгьи адунейла рыцIа йцIоладзу ахIатшпква рпхьадзара йалашватI.
Апхъала рыцIа йцIоладзу хIатшпыта йырпхьадзуз Австрия апны йаъу «Лампрехтсофен» акIвын, ауи ацIолара метр 1632 йнадзитI. Асквш 1999 йгIашIарышвта «Крубер-Воронья» гIазпшыхвуа аспелеологква адунейла йдуу арекордква щаквдыргылитI. Асквш 2001 агIан Россия йгьи Украина йацгIандыршаз агвып арекордква атадыргылхтI: метр 1680 йгьи метр 1710. Ауи азаман йгIашIарышвта «Крубер-Воронья» адунейла рыцIа йцIоладзу хIатшпыта йырпхьадзитI.
«Крубер-Воронья» ачIвылацIгIва апны йаму акъвийква, агалереяква, акIылсыртаква швабыж йджьащахъвапI, араъа адзыгIвчкIвынква, адзгIакIажжыртаква щардапI. РыцIа йгъагъу акIылсырта метр 30 йнадзитI, рыцIа йтшву – сантиметр 30.
«Крубер-Воронья» хIатшпы архъвыхраква ртурых ачIвылацIгIва агIапшыхвра ауысла агIвычIвгIвыс йылшараква шдуу йрыквшахIатпI. УахьчIвала кьангьаш злам закIыпI – апсуа хIатшпы «Крубер-Воронья» адуней апны зымгIва рацкIыс рыцIа йцIоладзапI. Ауи йапщылата хIзынйуш агIахътIра шIыцква абзазара йгIахIнарбахпI.

Квициниа Асида,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki