Library

Айззара гIальамат адыргалтI Ставрополь апны йапхьауа абаза чкIвыныргIа рыхъазла Ставрополь край йту абазаква ругIахъа-культура автономия ауыснкъвгагIвчва. Ноябрь а 20 араъа йакIвшаз анйара йалаз ачкIвынчви ахIвсси йабадырныс, ауысква йрылачважварныс, рылагьи дырпшныс рылшатI.


Ахъвлапын зладжвыквырцIаз ауысква ракIвпI. Ставрополье абазаква р-НКА апредседатель Чагва Армида хIызту асквш ауацIа нхарата йакIвдыршаз гIалхIватI. Ауи лымщтахь йгIачважваз аугIахъакви акъазакъкви руысквала Ставрополь край акомитет ахъвшаракI аунашвачпагIв Чаплыгин Алексей хIышта апны аугIахъаква разазаъащаква тамамта йщаквгылра ахъазла ажвлара адкIылараква рмагIны шдуу гIаликIгIатI. Абаза жвларауыснкъвгагIвчви анахьанат аугIахъаква рыжвларакви ащтаныкъвара пшдза шрызбжьу йаквшахIатхауата ари анйара йалан авайнахква, аурымква, акъарчаква, адгьаква ргIащтийыгIвчва. Къарча-Черкес апны йгIаныршу абазаква радкIылараква хIгьрыквчважвадзум – ауат аламкIва Ставрополь апны айззаракIгьи гьакIвшум. Ари азынгьи араъа йгIадгылтI «Шарпни» «Алашари» рделегацияква.
АгIачважвараква рымщтахь сынчIва Ставрополь апхьара йгIайгIвацаз ачкIвынчви ахIвссакви астудентква ргвып йгIарыларыжьтI. Ари ауысгьи пшдзата йгьи кьахвта йакIвдыршатI адгалагIвчва. Йапхъахауа акурс апхьагIвчва драйхIвахIвтI Ставрополь къала апны йгIаныршу «Абаза» культура квта аунашвачпагIв Къвырча Владимир. Ргьагьара йакIвшауа рылархIвауата, астудент шIаква йъапхьауа апынгьи рансимш бзазара апынгьи абазаква рыхв надмыркъвуата штшгIадырбушла йквытI.

Анйара йгIадгылкваз ргвы гьымшIыгъьтI. АдгалагIвчва ауат рыхъазла йапшым мшыркъвара анкъвакъвра щарда гIархъвыцтI. ЗымгIвагьи ргвква гIащтIырхуан Тластанкъвыл Вадим акъвабыз йгIатищтуаз амакъымкви Джео Марианна йылхIвуз ашвакви. АгIахIвраква ракIвпIта – ауатыкв дакъикъакIлагьи йгьыммцырахузтI – ухIва ауаштI.
Араса укьахвта заджвгьи уйабамдыруата ушпацахуаш? Йара акIвпIта, ари йапшу абазаква ранйараква рпны йабадыруа чкIвыныргIа разазаъащаква багъьахитI. Ауи йаквшахIатхауата ари айззара апны ауатыкв йгIатардан йрайхIвахIвтI цIыпх айззара апны йабадырта хтгIачвакI гIанзыршаз ачкIвынчви ахIвсси. Ауи апш цIыхъватшара пшдзагьи арат йрапшу ахъвлапынква ззадыргалуа амурад хъадаква йрыуапI.

ЧкIала Георгий

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki