Library

Асквш 2012 йцIыхъвахауа амыз ауацIа Къарча-Черкес апны РСФСР-ла гIатгара зму артист Ерыжв Зули Джьамбот йпхIа йылхъыцIыз асквш 100 йадахIвуата анйара щарда акIвшатI. Ауи лъазара ареспублика аугIахъаква зымгIвагьи квырмыш азырчпауата йбергьльын.

Ауи Дарыкъвакт (ужвы – Псыжв кыт) йтабзазуз адгьылрхарджьыгIв Джьамбот йтгIачва рпны дйытI. АпхIвыспа чкIвын дырра гьлымамызтI, йшпакIву ухIварыквын ауи дансабийыз агIан йщаквгылаз ащхъа цIасквала ахIвссаква апхьарта йгьыцIарымжьуазтI. Ауи аршIыйара хац шлылаз, амакъымква майрата йшлылалкIуаз дшIадзата лыгвла пхIвыс лкъвабыз бжьы анылгIа зынла йгIалныпщтI. Акъвабыз ауи аъара лпсы алашван лынцIра йахъвхатI. Агвла пхIвыс аунагIва уысква данрылаз Зули акъвабыз гIалахвуанта йылдыруаз амакъымкви ашвакви гIатылщтныс далагун. ЙпхIа хвыц акъвабыз лгвы азыщтакIта Джьамбот гвы анайт йыжвзаджвыкI йтйын йылзихвгIатI. Абари асогIа Зули лынцIра шцушыз алащаквгылтI.Ауи лкъвабыз асща дугьи хвыцгьи ргвы ацIгIвадза йнадзауата йаъан.

Ага йгвасразтынгьи, Зули лбзазара ймайрамкIва йгIамгIвайсуан: паса хъапщыладъа дгIанхатI, Абашта айсра Ду агIан агъа йгIазаб лбатI, асабиква лхъазы йгIадзынлыргылтI. ГIапсара ду лчва йштшузгьи акъвабыз зынгьи йгькIалымрышвтI. «Амаша стагылыргьи акъвабыз насышвтх, ауи аъара ауи бзи йызбитIта», – лхIвалун Зули.

Айсра азаман хьанта агIан айсра йпшцIамыз зымгIвагьи ркъару йамайгьдзауа йынхун. Ерыжв Зулигьи ауат дрылан. Зны, гъын чвгьата, ауи дрылата гвыпкI зквчIваз уандыркI асрычвхIва йылата йшымгIвайсуаз йгIващатI: акыт йызлагIайхуаш амгIва гьырмаухуазтI. Аквыджьмаква ауи асхъан хIвыча-хIвыча архъаква гIамырдун, арахвква ныжьхта аугIагьи йрыжвылуан. ЙырзыпшгIаныс йшгIаджвыквлыз здыруаз Зули лкъвабыз гIалахвын дасуа далагатI. Акъвабыз абжьы згIаз апшгIагIвчва ласдза йгIараухын аугIа гIархчатI. Ари агIаншара джьауымщушта йгьаъам. Йджьащахъву датшагьи закI аъапI: Зули лкъвабыз амакъымква рбзирала щардагIвы рбзазара мгIва щаквгылтI. Зули Джьамбот йпхIа акъральыгIва ансамбль апны къвабыз дасуа даналага лыршIыйара Къарча-Черкес йахъазымкIва хIкъраль ду анахьанат аштаква рпынгьи щардазджьара йбергьыльхатI. ДъанызлакIгьи дызсуаз амакъымквала лгвы апхара дамайгьдзауата ауагIа йырзылшун.

Абаза район апны йбергьльу акъвабызчы, РСФСР-ла гIатгара зму артист Ерыжв Зули йылхъыцIыз асквшышв йадахIвуата лыхьыз ахъыта апхъанчIви абаза музыка ЙгIвбахауа анкъвакъвра фестиваль акIвшатI. Анкъвакъвра йадгалагIвын ауи лъахIыльчва, ларгванква ЕрыжвргIа КъахIари Руслани, Абаза муниципал район аунашвахъцIарта. Анкъвакъвра фестиваль йалан зныбыжьла йапшымыз аршIыйагIвчва: рыцIа йайцIбаз 14 сквша дыртан, рыцIа йахIбаз – сквшы 87. Араъа йгIадгылыз аршIыйагIвчва акытква рпны рыцIа йъазата йырпхьадзакваз йрыуан, 20-гIвы йнадзун. Анкъвакъвра джвыквылра апхъала ауат тшырзынайырхауата дгIачважватI аунашвахъцIарта ахъада Ныр МухIаджьыр ЧагIбан йпа. Анкъвакъвра йалакваз ръазара зырхъвыхуаз ажюри йбергьльу акъвабызчкви акультура анхагIвчви алан.

Анкъвакъвра фестиваль агIарбараквала зныбыжьла сквшы 30-дза йыртаз рквтала апхъагылара ШвхIагващ Абазат йгIатигатI, йгIвбахауа агыларта Архагъ Роман йквнадыргатI, йхпахауа агыларта – ЛагIвычв СултIан.

Зныбыжьла сквшы 30 йайхIаз акъвабызчква рквтала дапхъагылагIвхатI Гвымлокт йауу Шармат ХвыркIьа, Алиева Тамара – йгIвбахауа агыларта, ХIваджь Альбина – йхпахауа агыларта рквнадыргатI.

Анкъвакъвра йалакваз зымгIвагьи Абаза район артшхъвагаква рыртатI, культурала КЧР а-Министерства йгьи адгалагIв комитет рыхьызла хпата йахъыхацIыху адипломква, асогIаква, ахча согIатква рнапIыцIадыршватI. Афестиваль йалалын йдрыпшдзатI асаби гIахIвыгIвчва гвып «Сальам» (ршIыйарала унашва рхъицIитI Къвмыкъв Азамат), КЧР-ла гIатгара зму артист Напщ Аминат, Тльастанкъвыл Вадим.

Ауи амщтахь мчбжьыкI анцIы – декабрь а 14 атшын – лынцIра йауата йцIыхъвахауа асквшква руацIа Ерыжв Зули дзыгIвнабзазаз атдзы йкIыдырцIаз ахъмаштылга гъвы гIахъыртIытI. Айззара йалан Къарча-Черкес а-Правительства ргIащтийыгIвчва, а-Парламент адепутатква, ажвлара уыснкъвгагIвчва, ажурналистква, Ерыжв Зули ларгванква.

– Ерыжв Зули швабыж дгIвычIвгIвыс джьащахъван. Ауи лынцIра шабгу зквшахIату закIыпI – Анчва ахъашыгIвра ахац зымгIвагьи йгIарылайцIитI, – йхIватI ауагIахъа уысквала, апечать йгьи йауацIыху аинформация амальква руысквала Къарча-Черкес республика аминистр Кратов Евгений. – Ерыжв Зули йлылшаз ауыс йгIанарбитI дызтабзазуз акъраль джьащахъва апны агIвычIвгIвыс дъайыз ашта хвыцгIваца дгIатамхауата хъарата йыхьыз шизыргуз. Ауи кыт хвыцкI дгIатадрийызтIхIва хIкъраль ду шабгу рпны лыршIыйарала ащхъа бзазагIвчва рдунейпшыща лзыгIарбун, йшпакIву ухIварыквын ауагIа рмакъымква ауат рбзазара апсыпнкъвгара амадзаквагьи гIахъыртIитI. Ерыжв Зули йлапшу агIвычIвгIвысква хIхъа рыладухушта йаъапI.

Ахъмаштылга гъвы ащапIы ахIврапшдзаква анщтIарцIа амщтахь айззара йалакваз ареспублика драмтеатр азал йнашылтI. Араъа Ерыжв Зули йылхъыцIыз асквшышв йадахIвуата концерт ду акIвшатI.

Аконцерт гIахъитIуата культурала Къарча-Черкес республика аминистр ЕмгIвыкъва Уали Ерыжв Зули абазаква йырхъазымкIва Къарча-Черкес йтабзазауа ауагIахъаква зымгIва ркультура атшауацIнарыхра апны лалацIара шдуу гIаликIгIатI. АшвахIварали гIахIврали ареспублика ансамбль апны дынхауа даналага Къарча-Черкес ауагIахъаква рмакъымква Ерыжв Зули лхъатала дрыдынхалуамцара арепертуар йалалцIатI.

Аконцерт акIвыршагIвчва КIьыщмахва Умари НакIвахв Ази Зули Джьамбот йпхIа лыршIыйара агIахIвра макъымква къвабыз йгIатылщтуа йахъазымкIва лхъатала ашваквагьи шалалцIузгьи йгIаквчважватI. Ауи лрепертуар йалан апхъанчIви абаза гIахIвра макъым «Сармасей», ачеркес уагIа ргIахIвра макъым «Къафа», абаза-черкес гIахIвра макъым «Кьамиль», ауагIа гIахIвра макъым «КIвашара», датшагьи щарда. Ауат арадиауа апынгьи, ателебара эфир апынгьи уыжвгIандзара йбыжьгитI. Лцри бызшвала ашва гIальаматква дыравторпI. Абаза бызшвала йалалцIакваз йрыуапI «Апхьарта марш», «Терешкова Валентина лыхъазла ашва», «ХI-Псадгьыл ахъазла ашва». Черкес бызшвала йалалцIатI ашваква «Сасра швхIызгIай», «Надасра», датшагьи.

Ерыжв Зули ачIахIныгIва хьзы «РСФСР-ла гIатгара зму артист» асквш 1958 январь мыз агIан йгIалквнадыргатI. Йара ауи агIан ауи апш хьзы гIайквнадыргатI лпа Дзыба Георгийгьи. Ауи зъазара швабыж йхIагIаз дхореографын, дбалетмейстерын, Апсны, Адыгея, Къабард-Балкъар, Дагестан рпрофессионал ансамбльква дрыцынхун, алокIфырква дыршIдырпшуата йыхьыз атурых йгIалахатI. Георгий йхъашыгIвра йан лъазара йгIахъшахъыцIуата тшгIащтIнахтI. Ауи апхъала, асквш 1957 агIан, Москва апны апхьагIвчви чкIвынргIи р-Дуней фестиваль акIвшун. Ерыжв Зулигьи лпа Георгийгьи афестиваль йалауреатхатI, «Йагъьу анхара адахIвраква рыхъазла» – хIва йзхьзу амедаль агIвыджьгьи йгIарквнадыргатI. Йбергьльу акомпозитор Дауыр Аслан араса йхIватI: «Акомпозитор Мурадели Вано данишIашва Ерыжв Зули лъазара щтIызхуаз амальква ргIаурала дгIалцхърагIатI, дгIалайбжьатI, ауи амщтахь лкъвабыз абжьы «апсыпнкъвгаща» рыцIагьи цIолата йлылалхIвауата лыршIыйара апны йгIалрысабапуан».

Дарыкъвакт абзазагIвчва квырмыш ду лзырчпауата лпагьи ларгьи ъабзазуз аурам Зули лыхьыз ахъырхIвалгIатI. Ауи акIвпIта, Ерыжв Зули йгIадзынгылуа абанпараква рыгвква анцIралагьи дыртазлуштI. Ауаса лара уыжвгIандзарагьи дхIылабзазауазшва йыгIбитI, йшпакIву ухIварыквын лпсы лцришта йазыналырхаз амакъымкви ашвакви йрылата йгIамгIвайситI.

Ерыжв Зули лмакъымква

ЧкIвынргIа рашва

Амакъым гьажвуам

ЧкIвынргIа ргIахIвра

Агвква рмакъымква

АпхъанчIви абаза кIвашара

Адзыхь апны

Гвымлокт ргIахIвра макъым

Квициниа Инна,

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki