Library

Ари ахабар гьтурыхым, йгьлокIым. Ауи апшгьи гIаншитI. АгIвычIвгIвыс амара дашIуырпшныс ангIаутахъхауа гьщардам, ауаса Ашкацауа АмрахIва зхьзу ари апхIвыспа абари апш шIырпшыра лквнагитI. АжвгIванд йапшу ауи лыла чIыхвквала адуней джьащахъва дахъвлапшитI, дангвыргъьауа ллакта анурква йдрылашаритI. Лынхараква лгвы апхари ацкьари гIарылкIкIгIитI, лбзазара ашIара гIарныпщитI. Ауи зымгIва лымагIальаматпI – ашахв ангIагылра йгIашIарышвта йхъвландзыкIьара лбзазара алахъвгIахъасрипхьадза хвы азылбитI.

Ашкацауа Амра дхвыцищтара суратхъыхра бзи йылбитI. Апхъапхъа лыла йгIацIашвауа зымгIва лтелефон асуратхъыхгала йхъылхуан. РыцIа дантшытха ауыс йазлыму агIальамтра гвы азтыз лаба суратхъыхга бзи лзихвгIатI. Ауи алахъвгIахъасра Амра бзита йылгвнылкIылтI.

Ауи атшын алахIвара шIыцква йрымшын. Апсабари агIвычIвгIвыси, агIвычIвгIвыси апсауышвхIакви рдуней шапщылу, йызладкIылу ахацква лылалхIвауа далагатI. Айшыста йухIвушызтын, лара заджв йылзыхътIу бзазара философия гIанлыршауа далагатI. Лынхараква щардагIвы швабыж йыргвапхун, ареспубликала, Россияла йакIвшуз анкъвакъвраква рпны йхъылхуаз асуратква гIалыркIгIауа, апхъагылара рылагIалгуата йцатI.

Амра йшылхIвауала, дзайгвыгъауа ллахIваракви апсабара ануркви лыла йшгIацIашвауа ракIвпI. Дшынхуш, рыцIа гватра ззылчпуш агьиква Къалмых Дина дырзылбжьитI. Ауи лъачIвагIала дсуратчпагIвпI.

АсуратхъыхыгIв хачIв щарда йпахь йыргыл йауаштI: аджьащара йа агврыпшкара, йа апшдзара агIарбара.
– СураткI апны агвыргъьари анашхыйари, аджьащари айгIваджьри алата йгIасырбаланыс бзи йызбитI, – лхIвитI Амра.

Йджьащахъву ари акIвпI: анахьанат сурат рхъылхуа йахъазымкIва лара лхъагьи йахъылхныс дхънахлитI. «Абараса ухъа уадынхалныс, абзазара йгIанаршIыхауа алахIвараква гIауырбаныс рыцIа ймайрапI», – лхIвитI ауи. Ауаса зымгIва рацкIыс йылгвапу лан лгвыргъьара алахъвгIахъасраква гIалкIыта йхъылхныс акIвхуштI.

Ашкацауа Амра йжвизхауа акласс дапхьитI, теннис ду, волейбол, футбол дрыситI. Ауаса дхъызхауа ауысква зымгIвагьи адызкIылхуа асуратхъыхра акIвпI. Зны дсабита йлымагIальаматхаз ауыс бзазара ъачIвагIата йгIалылхуаш алащаквлыргылтI: Ростов апны кинематография афакультет дыцIалта дапхьаныс лмурадпI.

«Амра дфотографхушма момкIва дкинематографхушма?» – хIва хIаназцIгIа лыхъаз рыцIа йхъаду ауи шакIвым лджьауапхатI. Абзазара адгьыл ацIахьла тшгIахъаначвалуамцара йгIацIцIуа адзыхь йагIвызапI, дзачIвызлакIгьи йызгIацIцIуа адзыхь гIайаура, йбзазара апны йдзыш йхънакъьалуа, апхъала йщтIу йынцIра шцкьула, йшлашарула гвыгъьарата йзалуа йаъазара атахъыпI. Абари акIвпI йхъаду. ЛыршIыйарала аугIа рбзазара лрышарара, йлырпхара акIвпI Амра лыхъазла магIны зму. ДзачIвызлакIгьи ауи злайчпуш амаль – ажвалума, суратлума – йара йхъатала йщаквйыргылитI.

Эшерова Муъминат,
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki