Library

Асквш 2013 агIан Россия Федерация апны Апсны Республика апосольства йадкIылата Москва йтагылу апсуа апхьарта сквшы 23 ахъыцIитI. Апхьарта апны апсуа бызшва йадрыпхьитI, ауагIахъа гIахIвраква йырзырбжьитI, апсуаква ртурых, рхабзаква, рцIасква ддырдыритI. Январь а 15 атшын апхьарта арыпхьагIвчва Россия Федерация апны Апсны Республика апосол Ахба Игорь йынйатI. Асквш 2013 ауацIа хачIвыта йырпыру ауысква, арыпхьара амальква, апхьарта анхара шадыргалуаш, аъачIвагIагIвчва шIаква ауыс йшадыркIылуаш агьиква йрылачважватI. Апосол йшипхьадзауала, апхьарта апны апсуа бызшви литератури рарыпхьара йахъазымкIва асабиква йырдырныс ахъазла Апсны атурых йапщылу агIаншара дуква руысла айззаракви анйаракви адгаллара атахъыпI. «Ауи йапшу агIаджвыквцIараква дыррра шIыцгьи бжьарагьи рылапI, ауи ахIатырла йгIадзынгылуа абанпараква рыхъазла магIны ду рымапI», – йгIаликIгIатI Ахба Игорь.

Москва апны апсуа апхьарта анхара «Нартаа» – хIва йзхьзу акультура жвлара (ауи асквш 1989 агIан йгIандыршатI) йадкIылата йадыргалтI. «Нартаа» жвлара даунашвачпагIвхатI ауи агIаныршара гIаджвыквызцIаз Ахба Игорь. Ажвлара унашвачпарта апны йыцынхауа йалагатI Чирикба Вячеслав, Анчабадзе Юрий, Гулиа Татьяна. Апхьарта даунашвачпагIвхатI Басария Ирина. Йлырхыз аустав апны йгIарбаз ахачIв хъадаква йрыуан Апсны атурых, акультура йгьи алитература Россия абзазагIвчва йдырдырра. Москва йапхьауа астудентква ргIаджвыквцIарала асквш 2012 ноябрь мыз йгIашIарышвта апсуара йгIаквчважвауа апхьара сахIатква акIвшитI. Йапхъахауа агIвлекциякI дгIарыпхьатI аистория наукаква ркандидат, аэтнопсихолог Бройдо Анна. Алекция анакIвшуз аздзыргIвчва азцIгIараква дыргылуа йалагатI, уадыргIвана алекция айчважвара джьащахъвала тшапсахтI, дзачIвызлакIгьи ауатыкв йтаз атемала йгвгIанаграква гIайхIватI. «АуагIахъа анадкIылу асхъан акIвпI йангIащаквхауа, руагIахъа уысква тшанауацIырхуа. Араъа ауи апш хачIв ду ззырхъйушта йаъу акультура акIвпI, ауагIа ръадаб-намыс щата багъьа амазтын, ачвгьи абзии ралыргара азазаъащата йазрыму азакIызтын. Абауи йапшу культура амальта агIвыми учIви злалудыргIушта йщаквгылазара атахъу Апсуара акIвпI. Апсны апны ауи апсуаква йырхъазымкIва араъа йтабзазауа анахьанат ауагIахъаквагьи йырдырырквын бзихуштI, дара ркультураква рынкъвгара йаццауата», – лхIватI апхьахьа.

ЙащтагIайуаз алекция асквшшIыц гIаталхьата январь а 25 йакIвшатI. Ауи акIвзыршаз апсуа гIвгIвы, апублицист, атакIыгIв Чачхалиа Денис йакIвпI. Ауи апсуа жвлара апны апсуара гылартата, магIныта йаму, йапшым ауагIахъа цIасква рынкъвгаща, агIвымакъральква рпны апсуа диаспора рбзазаща агьиква дрыквчважватI. Апхъахьыла алекцияква радгалра ауысла Апсны Республика апхьахьаква, йбергьльу ажвлара уыснкъвгагIвчва гIадрайгваныс ргвыгъапI. Апсуара йазынарху алекцияква йрыздзыргIвныс йгIайуа апсуаква йгьырхъазым, Москва йтабзазауа анахьанат ауагIахъаква рыуа щардагIвгьи гIальаматра ду рызрымапI.

Козлова Эльвира,

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki