Library

Кавминводы йтабзазаквауа абазаква угIахъа культура автономия гIандыршищтара сквшы 20 цIытI. Ауи аюбилей йадахIвуата сынчIва сентябрь а 15 атшын Нарцана апны гвыргъьарамш ду адыргалтI. Араъа асасчва щардагIвын – Кавминводы акъалакви акыткви йгIартыцIыз абазаква йырхъазымкIва Нарцана йаъан Къарча-Черкес республика, Ставрополь, Москва, Санкт-Петербург ргIащтийыгIвчва гвыпква.

Зыхьызква бергьльу асасчва йрыуан апсуа-абаза угIахъа р-Дуней конгресс апрезидент, аюрист наукаква рдоктор, апрофессор Шамба Тарас Мирон йпа, апсуа-абаза угIахъа р-Дуней конгресс агенеральна секретарь , «Абаза» журнал аредактор хъада Аламиа Геннадий Шалик йпа, Москва апны абаза диаспора рыжвлара йапхъахуз аунашвачпагIв, аэкономика наукаква рдоктор, кытмлыкврхIарала Россия академия апрофессор Агырба Юрий Уасыф йпа, аугIахъа уысквали акъазакъква руысквали Ставрополь шта аправительства акомитет аунашвачпагIв Якушев Александр Михаил йпа, Къарча-Черкес республика ажвлара мгIвайсра «Абаза» аунашвачпагIв ШенкIауа МухIадин Али йпа, ахIаракьатчпагIв, амеценат, ахимия наукаква рдоктор, а-Дуней абаза-апсуа адкIалара «Алашара» апрезидент Егьзакь Муса ХIабальа йпа, Ставрополь шта абазаква ругIахъа культура автономия аунашвачпагIв Чагва Армида Хзыр йпхIа, датшагьи. Агвыргъьарамш йалан зыхьызква бергьльу апхьахьаква, аршIыйагIвчва, арыпхьагIвчва, асуратгIвгIвчва, артистква, агIвгIвчва, ауысагIвчва, ашвахIвагIвчва, ахIаракьатчпагIвчва, акъвырльыкъвхагIвчва…

«Театральный» ресторан анашылыртагьи азалгьи пшдзата йаныргIалын, Россия, Ставрополь шта рбаракъква кныхIан, зквпшырала шIыцта йгIандыршагIвацаз Ставрополь шта абазаква ругIахъа культура автономия абаракъгьи кIнырхIатI йапхъахауата. Айззара гIахъыртIуата ауи абаракъ азал йгIаргылын Кавминводы абазаква ругIахъа культура автономия «Абазашта» апредседатель Макъвауа АгIвырби йнапIыцIарцIатI. Азал йыгIвназ зымгIвагьи гIагылын напIасра дула ари ауыс нардастI.

АгIачважвараква, ахIвахIвраква, асогIаква рытра йгIарбжьадрышвуата ашвахIвагIвчва гвып «Абазгьква», датшагьи йбергьльу ашвахIвагIвчва асцена йгIадрайгвумцара йгIахъмартI. АпшыгIвчва швабыж пхата напIы йзасуа, йайгвыргъьауа дгIадрайгватI йгьи днардастI Хъабльахь Рустам. Ауи зылаква йрымбауа амузыкантква рквтала Нарцана, Астрахань, Санкт-Петербург, агIвыма къральква рпны йакIвшуз анкъвакъвраква дрылан, дахIврала йыршIыйара йзыгIарбатI. Нарцана къала апны абаза бызшва йапхьауа асабиква ргIахъвмарра асасчва зымгIвагьи йыргвапахатI. Ауат дрыдынхалитI арыпхьагIв ХвытI Агнесса. Йачвыхъару аштаква йыртабзазауа абазаква, ажвлара уыснкъвгагIвчва абараъа йшашIашваз апшта щардала йанйаныс гьрылшум, ауи акIвпIта ари атшын ауат анйара джьащахъаква, магIны зму айчважвараква акIвдыршатI. Абараса агвыргъьарамш дахIврала йакIвшатI. Асасчва разыта, лахIвара пшдза рщардата йамцIыцIхтI. ЗымгIвагьи абаза бызшва, абаза культура, абаза цIасква шIымчIвауата йшгIахчахуш, апхъахьыла рыцIа-рыцIа тшауацIырхуа хIбзазара йшалазлушла гвыгъара пшдза гIарылалтI.

ЧкIала ПIитIа,
афилология наукаква рдоктор.
АгIвыра «Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki