Library

ЙынджьыгьчкIвын кыт… ПхныпI… Асаби амгIадаква быжь ду рхъыцIуа амгIващхвыцла тшкIвабара адзы йазыгIвитI. Зынла анкъвакъвра гIаларгитI: апхъапхъадза адзы йзырста йзгIарсхуахIва. Абараса хъвлапныдза йхъвмаритI. Адз хьшвашва тшыцIищитIта чкIвын лачIыхвкI йыгIвзачва дрыламылуата адзы пхартшахъва ъаквнапсаз дазцитI, анышви апхартшахъви йгIарылхуамца апсауышвхIаква рсуратква йчпитI, ауат зымгIвагьи йгIарылхIвитI атшы ахъа асурат… Абараса йаъан асуратчпагIв Агача МухIамад хъгIата йгвы йгIатахаз йсабихъа.

Аколхоз апны йынхуз йан Татымгьи зынцIра йветеринарыз йаба Бахситгьи йджьарщун рпа йнапIы йгIацIцIуаз асуратква. УадыргIванагьи аршIыйара ауи йъачIвагIахушта, йбзазара уысхушта зынгьи йгьазымхъвыцуазтI.

Азаман мгIвайсуан. Крупская лыхьыз зхъу Москва йтагылу акультура институт дангIалга амщтахь йцри кыт дгIаталхын арыпхьагIвта дынхауа далагатI. Абараъа йапхъахауата зымгIвала йнардзу асурат йчпатI – Къайдыхв къала. Ари атема анахьанат асуратчпагIвчвагьи адынхалуан, ауаса МухIамад йгьизымчхIатI турых пшдза щарда зпщылу абари апхъынчIви къала асурат йара йгви йпси йшалу апшта йымчпакIва.

СквшквакI рымщтахь конденсатор гIацIызщтуата Къарча йтагылаз азавод апны дынхауа далагатI, асатин кыт Коста-Хетагурово дтабзазун. Ауаъагьи асабиква асуратчпара йайрыпхьун. Ари аугIахъа йпсы йалалтI, ркультура апшдзара йылайкIуата йсуратква рпны щарда йгIайырбун.

Асуратчпара квпшыраква зымгIвагьи алапI ауи йыршIыйара апны: пейзажызтынгьи, натюрмортызтынгьи, гравюразтынгьи, портретызтынгьи. Асквш агIамтаква рыуа рыцIа йгвапхауахIва сгьазымцIгIатI – ауи йынхарта пещ апны адзын акIвпI йхIвачвауа, йбайу ачваквпшыраква зымгIвалагьи.

«Апартизан йтгIачва» – хIва зхьзу асурат сылапш гIанакIитI. Айсра ангIалага Агача МухIамад цсквша ахIа дгьыртамызтI. УжвыгIандзарагьи йыхьыркIвитI йгвы апны ауи йгIаннажьыз ахвыртаква…

Асуратква уырпшыпхьадза удырхъвыцитI, угвы дрыпшгIитI, асуратчпагIв йылпш датша гIвычIвгIвыскI йыла йгIацIамшвауа гIальаматра щарда гIанакIитI. Зъара бгъьыцйа йахъурышвтра атахъу, акъыльпшгIарата йатахъыйа швыгала аугIа ртурых гIащаквуыргылхныс ахъазла!

ДъагIатадрийыз ашта йачвыхъару агазджьарагьи йбергьльыпI Агача МухIамад йыхьыз. Бзи йбуз асурат «Къайдыхв агъныла» ауи Йордания апаштыхIпа согIата йыйтатI.

– Баргвума унапIы йгIацIцIыз асурат пшцIущтныс? – хIва сицIгIитI МухIамад.

– Швабыж йбаргвыпI, йшпакIву ухIварыквын йзапш суратызлакIгьи упсы алауцIитI, угвы йгIатахитI. Ауаса аугIа рыхъазла акIвпI асуратчпагIв дыззынхара атахъу!

Абзазара апхъала йымгIвайситI. МухIамад йпщыгIвпхIчвагьи унагIва йалалтI, йтгIачвахатI. Йаргьи йгвы йцри кыт ахьыла йахъхтI. Ауаса ЙынджьыгьчкIвын апны йхвгIушыз хакв гьимаутI, йхъапщылагьи йаргьи АлбыргIан йгIаталхтI.

– Тыдз шIыц ргыл йауашын, ауаса ауи аъара заман гьсымам, – йхIвитI МухIамад. – С-Псадгьыл йасуратта йчпачIву зъарайа ужвыгьи йспыру!

Ешерова Муъминат

«Абаза Къраль» сайт йазалхпI

Агача МухIамад йынхараква ргалерея


Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki