Library

Ажвлара программа «Газпром – асабиква рыхъазла» апкъ йтата АдгьахIабльа район йаланакIуата МалаабазинскI кыт апны нархарта щардала йгIарысабап йауаш стадион хвыц гIахъыртIытI. Грушка муниципал гIаныршара йаланакIуа апщкыткI – МалаабазинскI, ТIапIанта, АбазахIабльа, йара Грушка – угIата гIвынзыкIыгIв раъара ртабзазитI, ужвы ауат рсабиква араъа йапшым аспорт квпшыраквала рхъа йадынхалныс рылшуштI.

Ауи гIахъыртIуата айззара анакIвшуз агIан Къарча-Черкес Республика а-Правительства апредседатель йцхърагIагIв Уаз Мурат дгIачважвауата абзазагIвчва драйхIвахIвтI. Ауи дшгвыгъауала, абари астадион чкIвын апны асабиква аспорт тшадыркIылырквын рызгIвадара багъьахуштI, амыгIвхъгараква йырчвыхъарахуштI, Къарча-Черкес аспортсменква Россияли адунейли йакIвшауа анкъвакъвра дуква рпны рылшараква рзыгIарбуштI.
Нархарта щарда йырзынхауа ари астадион чкIвын МалаабазинскI апхьарта апшцIа апны йдыргылтI. Ауи йалачпапI футболасырта уатыкв, гIвбаскетболасыртакI, нагIв-гIагIвра йазычпу амгIващчкIвынква, асабиква уралагьи хIагIаралагьи йпауа тшъарбжьуш. ХIайчважвара апны Грушка кыт ахъада ШвхIагващ Артур йшгIаликIгIазла, ареспублика ахъада Темрезов Рашиди «Газпром» аунашвахъцIарта апредседатель Миллер Алексейи рангIалра абзазара йаларыжьуата Къарча-Черкес ауацIа йтарчпуш ажвастадионкI йрыуата араъа йгIахъыртIыз ауыхвара апхъахитI.
– Ари аспорт уыхвара уыжвгIанчIви заман астандартква йрыквыргIапста йырчпатI, – йхIвитI ШвхIагващ Артур. – Астадион чкIвын йахъызымкIва апхьарта апшцIа апны нхара ду акIвшыдраштI: апшцIа апны асфальт щтIарцIатI, асабиква зланыкъвауа амгIващква рчпатI, афинарква дыргылтI, ужвы апшцIа агьагьара гвара шIыцла йкIвдыршитI.
ШвхIагващ Артур сентябрь а 11 атшын астадион шIыц апны футболла АдгьахIабльа район апхъагылара шакIвдыршуш ахабаргьи гIахIайхIвтI. Ауи анкъвакъвра апны аспортсмен шIаква ареспублика ахъада й-Кубок йазабакIуаштI.
Асквш 2014 ауацIа Апсуа кыт апны напIлачпара хIврала йхъгIву мини-футболасырта рчпуштI. Хъвыжвду кыт апны аспорт уыхвара шIыц ацIыхъва йазынадзитI.

Квициниа Инна,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki