Library

Мыква Рамазан Аслангьари йпа асквш 1925 февраль а 17 Псыжв кыт апны дйытI. Рамазан 18 сквшагьи дгьыртамылсызтI айсра дпшцIарыжьныс дахIвауа даналага. Йаба йгIайгвынгIвуан ауи й-Псадгьыл дазгылра шитахъыз, ауи йгIалцIла дгьипшIамгылуазтI. Ауаса асквш 1943 август а 28 атшын акIвпI Рамазан айсра данпшцIал. АмгIва дшыквыркIваз айбащраква дрыланагатI: дызлаз аэшелон агъа йсамолетква гIагвыквстI, атопхква гIаквырпсан йабгата йгIанхаз мачIыгIвпI. Рамазан абгата дгIанхатI. Ари атшынгьи йхъираштылхныс йылымшауата анцIрала йгвы йгIатахатI.

– Адгьыл былуан, агъа йсамолетква тшырчвыкъахIчIвахныс амаль гьхIмауазтI, – йгIайгвалашвахитI ауи. – Йара акIвпIта абджьарнадзара гьхIымамызтI, Невинномысск астанцияла хIтыцIгIвацан мгIва хIыквын.

Абгата йгIанхаз айсыгIвчва шIаква йъарщтийыз архъвдза йнадзаныс рылшатI. Асквш 1943 ноябрь мыз агIан Мыква Рамазангьи йыгIвзачваквагьи Абашта азгылра йшазыхIазырула ныха рхIватI. УадыргIвана механизацияла йадгалу й-28-хауа агвардия архъв йрыларцIатI.

Мыква Рамазан йгIамидаз айсра гIвагвана йгIаквчважвауа ажурналист Натхва Хадиль йгIвыра «Рейхстаг апны йымачв аквицIатI» («Возрождение республики» газет, й-18-хауа аномер, ас. 2003 май а 6 йгIацIцIтI) апны йрытаразитI ауи архъв йаланакIуаз й-202-хауа йазалху абатальон айсыгIвчва айсра йпшцIищтара хъацIара ду шгIадырбахьаз. Ауат Украина рышта агIархвитхра ахъазла джьгарта йайсытI, Мыква Рамазан абатальон данрылашва Польша ркъральгIвына йахъысхьан.

– Польша апны Остров Мозовицк къала агIархвитхра ахъазла хIайсуата атанк ахъахь саквчIва сшымгIвайсуазымцара аргвандзата атопх гIагIвжван схъыланарцIыжвтI, – йгIайгвалашвахитI Мыква Рамазан. – СлымхIаква дагвхан йгIаншуз закIгьи гьсзалмыргахуазтI, зны сгIагылуан, зынгьи тшызымдырхуата скIахIахуан.

АчкIвын ауи асхъан удын чвгьа шгIайыквшваз гьгIайгвнымгIвытI. АчымазагIвтара апны акIвпI тшъагIайдырхыз, зныкI ахъазла араъа йайъазатI. МышкIы ауат концерт зыргылуаз артист гвыпкI рызгIайтI. Аконцерт йапшныс йгIайззаз айсыгIвчва дрылата айсра апхъала къвырльыкъвхара йызшIыртыз йкытлагIв Уаз Мурат дйынйатI.

– Ауии сари хвысквша раъара хIгьабамбасызтI, – йхIвун Мыква Рамазан. – ХIцришта хIачвыхъарата хIъанйаз швабыж йджьасщатI. ХIыбызшва ауи аъара йгIасгвалашван агангьи схъа сачважвалун. Мурати сари щарда хIайчважватI, хIцри кыт, хIаргванква, хIкытлагIвчва гIахIгвалашвахтI. Ужвы ауи дъахIылахым швабыж сгвы йыцIалитI, йпсата бзихатI! Йбзира щарда сыдпI.

Мыква Рамазан йгIайырбаз ахъацIара йаквшахIатпI йгIайквнадыргаз артшхъвагаква: Абашта айсра аорден, амедальква «Айсра апны агIатгараква рыхъазла», «Кенигсберг агIакIра ахъазла», «Германия ррыхъвашара ахъазла», Сталин йымачв зцIата йгIайыртыз артшхъвага швъаква.

АйгIайра Амш атшын Мыква Рамазан Берлин даъан, рейхстаг абльынгьи йымачв аквицIатI. Ауат йгIатгара джьащахъваква здыруа мачIыгIвпI.

Айсра амщтахь Къарча-Черкес типография апны Рамазан Аслангьари йпа сквшы 32 руацIа линотипистта дынхатI. Ауи аквплацIа «Совет печать апны йагъьу анхагIвы» гIайырттI.

Абараса дайсытI, дынхатI абаза уагIахъа рпа цIабыргы Мыква Рамазан Аслангьари йпа. УахьчIвала ауи йгIадзынгылуа абанпараква рпны дшвапха пшдзапI, йкытлагIвчвагьи йцриквагьи айгвыгIвра дула дкIвдыршауата АйгIайра Ду йахъыцIуа асквш 68 дапылитI.

«Алашара» аинформация йгьи аналитика къвырльыкъвхарта

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki