Library

Къарча-Черкес ауагIахъаква ртурых йгIаквчважвауата йбайу алитература ужвыгьи дырра цIолала йадгалу нхара дукIла йалахIатI. Арат амшква Черкесск апны йгIацIцIтI йбергьльу апхьахьа, аистория наукаква рдоктор, апрофессор ТхIайцIыхв Михаил йкнига «Й-ХVIII-хауа асквшышв ацIыхъва – ХIХ-хауа асквшышв агIаталымта абазаква ртурых ауысла агIвыраква». Ари шIыц-шIыц дыздынхалхыз йгIвбахауа гIацIщтрапI. Йапхъахауа агIацIщтра асквш 1992 агIан СогIвым агIвырагIацIщтырта «Алашара» апны йгIацIцIтI. Амонография апны абазаква рэтнография уысква, Лагъь КIавкIаз апны ауи атлахан акытква ъачIваз аштаква гIарбапI. Ауатква ракIвымкIва архъвыхра нхара апны гватра ду азынархапI абазакви йраргвану ауагIахъакви (апсуакви адгьакви) разазаъаща.

ГIальаматра ду рылапI абаза ткъвымхьызква, ауат ртурых, Лагъь КIавкIаз апны анахьанат ауагIахъаква йызларпщылу ауысла апрофессор ТхIайцIыхв Михаил йакIвйыршаз архъвыхра шIыцква.
ХIызлачважвауа акнига йаццауата Москва апны ТхIайцIыхв Михаил датша книгакIгьи гIацIищттI – «Трыквшта абазаква». Ари акнига Трыкв Республика апны асквшква 2003, 2005, 2011 рагIан апхьахьа йакIвйыршаз архъвыхраква йыргIарбагапI.
Ари анхара Россия атурыхдырра апны Трыквшта йту абаза мхIаджьырква ртынхаква рбзазартаква, раъаща гIазырбауа йапхъахауа рхъвыхрапI. АмхIаджьырква йжвежвхауа асквшышв йакIвшуз КIавкIаз айсра агIан рпхыцIа шцазла, рцришта йтнаган Осман паштахIыгIва йтанагатI. Акнига швапха щарда аланакIтI, ауат Трыквшта апны автор дызквшахIатхаз, дзынйаз агIаншараква гIахъыртIитI, атрыкв абазаква руыжвгIанчIви бзазара гIадырбитI.
Апхьахьа анахьанат йынхраква йрапшта Лагъь КIавкIаз атурых гIальаматра азызбауа апхьагIвчва йырзынарху ари акнига ТхIайцIыхв Михаил апсуа-абаза уагIахъа р-Дуней Ассоциация (Абаза) апрезидент, аюрист наукаква рдоктор, академик Шамба Тарас йхьызхIвагата йщаквйыргылтI.

НакIвахв Михаил
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki