Library

Июль а 18 атшын Гулиа Д. йыхьыз зхъу Апсны агуманитар наука рхъвыхра институт апны Апсны анаукаква р-Академия академик Салакая Шота йхъыцIыз асквш 80 йазынархата наука конференция акIвшатI. Салакая Шота Хича йпа афилология наукаква дырдокторпI, Апсны анаукаква р-Академия дакадемикпI, Апсны къральыгIва университет дапрофессорпI, Апсны агIвгIвчва р-АдкIылари Россия агIвгIвчва р-АдкIылари дрылапI. Афольклорист, алитературадырыгIв, алитература цIбацIбагIв асквш 1933 июль а 18 атшын Очамчира район йаланакIуа Тхина кыт апны дйытI.

Адырра бзидздзаква йымата асквш 1952 агIан йцри кыт апхьарта дгIалган Шота Хича йпа Горький А.М. йыхьыз зхъу СогIвым къральыгIва педагогика университет афилология факультет дыцIалтI. Ауаъа дапхьаркIвауата йыршIыйара нхара афольклори алитератури йырпищылныс йаквикIтI. Аинститут апны дамайчуата йапшым анаука кружокква дрылалуан. Ауи агIан Салакая йгIвыраква йапхъахауата апсуа газеткви ажурналкви йгIарыквшвауа йджвыквылтI.
Асквш 1956 агIан аинститут дангIалга Шота Хича йпа Ш. Руставели зхьзу кырт литература атурых а-Институт аспирантура «фольклористика» нархартала дыцIалтI. Асквш 1965 агIан Пушкин А.С. йыхьыз зхьзу Тбилиси йтагылу акъральыгIва пединститут апны «Апсуа атурых йгьи афыр эпос аквпшыра хъадаква» – хIва хъата йзму адиссертация йхчатI.
Салакая азыгIальаматра ззйыму анаука нархартаква ауацIыхпI: афольклор, алитература атурых, алитература цIбацIбара, абызшвадырра. Ауат анархартаквала Лагъь КIавкIаз ауагIахъаква рнаука нхараква йыршIйырпшитI, зымгIва йрапхъата абазакви адгьакви. Жвабапхьадзара йнадзауа ймонографияква, гIвышв райхIа йнадзауа Салакая йнаука гIвыраква СогIвым апны йахъазымкIва Москва, Санкт-Петербург, Ереван, Нальчик, Черкесск, Майкъвап рпны йгIацIцIыз азкIкIраквагьи йгIарыквшватI.
Шота Хича йпа дыравторын, дырредакторын литератураддырала архъвыхра нхара дуква: «Апсуа литература: йайшысу агIвыраква», «Апсуа литература атурых йгIаквчважвауа агIвыраква», датшагьи. Ауи Москва йгIацIцIыз анхара дуква равтор гвыпквагьи дрылан: «УагIахъа щардала йалу совет литература атурых», «Адуней ауагIахъаква рмифква: энциклопедияпI» (гIвтомкI йнадзитI), датшагьи. Апхьартакви авузкви рыхъазла йгIацIцIыз апхьагаквагьи ацхърагIагакви гватрата йырзалихыз гьмачIым. Асквш 1975 агIан астудентква рыхъазла апсуа фольклор ауысла йапхъахауа апхьара цхърагIага адигалын йгIацIищттI.
Агуманитар рхъвыхраквала аинститут анхагIвчва йшырхIвауала, ужвы йъагIадзазгьи анхара уысква рпны Салакая зынгьи дгьгIатхъум. Апсны Республика ажвлара уысквагьи джьгарта дрылапI. «Йынхара рхъвыхраква рнадзара, рцIолара нахвапI, афольклор материал абгата йгIайрысабапитI, апхьахьа ахIбачваквагьи уахьчIвала дызцынхаквауагьи пIатIу ду рыквыцитI, йадыркIылыз адырраква йылайкIитI, ашIыцраква йымагIальаматта дырзыпшгIитI, йгIайрысабапитI», – абараса йыквчважвитI ауи Дагъстан йауу афилологква – РАН академик Гамзатов Г.Г. йгьи афилология наукаква рдоктор Ажьи А.М.
Шота Хича йпа уыжвгьи дамайчуата астудентква, аспирантква дрыдынхалитI, напIлагIвыра щарда дрыпхьитI, дырредакторпI. СквшкъомкI руацIа йакIвйыршауа анаука нхара, апсуа фольклори алитератури рырхъвыхра апны йалацIара ду гIарпхьадзауата афилология наукаква рдоктор, АНА йгьи АМАН ракадемик, Апсны къральыгIва университет апрофессор, «Ахьдз-апша» орден йгIвбахауа атып акавалер Салакая Шота ачIахIныгIва хьзы «Апсны Республикала гIатгара зму анаука анхагIвы» гIайквнадыргатI. Ауи ауысла ащаквыргылра Апсны Республика апрезидент Анкваб Александр мачвы ацIайцIатI.
АхIвахIвра ажваква джьауап ритуата аюбиляр араса йхIватI: «ЙсхъыцIуа асквш 80 сызцынхауа агвып срылата съапылуа сара швабыж йсгвапапI. Ужвы анаука апны гIвнархартакI срыдынхалитI – ауагIа рыршIыйара йгьи алитература».

Квициниа Асида

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki