Library

Январь а 24 Апсны акъральыгIва филармония апны амакъымквали ауысаквали йалу акомпозиция «Сара стынчра» апрезентация акIвшатI. Ауи йбергьльу апсуа уысагIв Аджьба ТIаиф йуысаквала йдыргылтI. АуагIа ари аспектакль хвыкIгьи азырымтиуата йапшныс рылшатI.

Аспектакль аунашва гIаджвыквызцIаз Ардзинба З. йакIвпI. Ауи йцхърагIатI ауыс йацызкIуаз анбжьагIвчва гвыпи культурала Апсны Республика а-Министерстви. Аспектакль ауысагIв йынцIра-бзазара, йхъвыцраква, йлахIвараква йгIарыквчважвитI. Асценарий щатата йазалтI айсра агIан агъачва йыркIыз СогIвым дтата ТIаиф йгIвуаз амшгIвыра. Уысипхьадза, ашвипхьадза акомпозиция йалата йбыжьгуз ауысагIв йбзазари йлахIваракви нахвата йгIаудырбун, апшыгIвчва ргвы йазынадзун. «Абгата йгIауахвырквын ари аспектакль агIвычIвгIвыс бзи, йджьащахъву ауысагIв йбзазара йгIаквчважвауа гIахIвахра лашарапI. АгIахIвахра йапшым алахIваракви ахъвыцракви уызгIадрыцIсуата йаъапI», – лхIвитI Апсны акъральыгIва драмтеатр асценарист йгьи арежиссер Аргвын Мадина.

Апремьера амщтахь зынла интернет-портал LIvejournal апны йбергьльу аблоггер Кобахия Батал йгвгIанаграква гIазырбауа агIвырахвыц тайцIатI. «Асцена бжалащцарапI, амузыканткви актеркви йымгвжважвауа йнаныкъва-гIаныкъвитI, чIадакIгьи гьаъам, апшыгIвчва ргватра абгата йыззынарху ТIаиф йуыса гIальаматкви йымшгIвыра ашIчIваракви ракIвпI. Ауипхьадза асцена апны йаныргIалыз ТIаиф йсурат ду мачI-мачIымца псы гIахъалуан. Апрограмма ацIыхъва йаннадза Аджьба ТIаиф дабгата дхIылазшва, ауи дшаъахым зпсы йхъанамцIауа дхIыцызшва акIвын йшхIылахIхIвуз. Швабыж хIырзыразпI абзазара апны ауысагIв дызларчвыз апхари алашари йнардзата йззыгIарбаз артистква. НцIара абгакI, момо – сквшышвпхьадзара гIазцIанакIуа гIамта дукI, хIыла йыцIстI а-УысагIв йуысакви ймакъымкви хIшрыздзыргIвуазымцара…», – йгIвитI Батал.

Аджьба ТIаиф (асквш 1939 мартI а 11 – асквш 1992 октябрь а 9) – дапсуа уысагIвпI. Гвыдауыт район йаланакIуа Ачандара кыт апны дйытI. СогIвым апны дапхьатI, ауаъа дбзазун. Уыса азкIкIра къомкI дыравторпI. Апсуа саби литература даклассикпI. АуысагIв атакIраквагьи йчпун. Ауи дацхърагIумцара апсуа бызшала йатаркIтI Пушкин А., Лермонтов М., Тютчев Ф., Блок А., датшагьи щардагIвы ргIвыраква.

АхIвара

Анчва йдуу, суыхIвитI уара,
СыгIвнарызла ари атыдз хвыц.
ЙшIымчIварагIатI сашва анцIра,
ЙгIасыт къару шIыц.

Йаршвызтынгьи ахьта стыдз хвыц
Сашва йалазтI гIвычIвгIвыс ща пха,
Ауи йазыбжакву йрыц
Йаборчу арха.

ЙлащцаразтI сынцIра зымгIва,
ЙстахъыпI йгIахъшахъыцIныс ауи
Ашва лашара йкIкIауа,
Йымчвхуаш зынгьи!

(Абаза бызшвала Мыхц Кь. йатайкIтI.)

Козлова Эльвира,

Асуратква Кобахия Батал йархив йгIалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki