Library

Июль мыз ацIыхъва Абаза район йаланакIуа АлбыргIан кыт апхьарта рфутболасыгIвчва гвып «Шарпны» «АчхъачкIвын» – хIва йзхьзыта Россияла айцIбачва (асквшква 2000-2002 рагIан ййыз) рквтала Ейск апны йакIвшуз анкъвакъвраква йрылан.

Атурнир йалаз швицгвыпкI йнадзун. ЧIвы антадрышв амщтахь Абаза район рфутболасыгIвчва йгIвбахауа агвып йрылашватI. Ауат ракIвымкIва араъа тшадыркIылтI Чачан республика, Ростов област, Ставрополь край йгIартыцIкваз агвыпква. Аполуфинал апны «Шарпны» Забайкалье йгIатыцIыз «Спартак Домна» гвып йрыцасуан, хпа закIыта йайгIайтI.
Афинал апны ахьапщ медаль ахъазла ауат Курск област йауаз афутболасыгIвчва шIаква йранкъвакъвтI. Йапхъахуз атайм апны ркъару апшыта йгIадырбатI, йгIвбахуз атайм апны Къарча-Черкес йауу хIычкIвынчва хпа нольта йайгIайтI. ЙгIалахаз ачкIвынчва рыладзква хъагылата йгIанхатI. ЙхIвара атахъыпI, албыргIанква ари агIатгара гIвысквша цIуата йшазабакIуаз. ЦIыпх ауат йхвбахуз агыларта йгьзахъымстI.
РгIатгара дайгвыргъьауата спортла ареспублика аминистр хIхаквлагIвчва шIаква телефон дырзасын драйхIвахIвтI. АчкIвынчвагьи ауат рбжьагIвчвагьи – ХIамыкъва Псабыди Йуан Азамати – дшырзыразу йхIватI. АхIбачва гвыхътIыла футбол бзи йшырбауа, ауи абзибара ашIаква рщагьи йшаларцIауа гIаликIгIатI.
Ачемпион шIаква ргвып акубокгьи, амедальквагьи, аспорт фашаквагьи гIарыртатI. Анкъвакъвра агIарбараквала гвашвхчагIв ъазата Къвырча Арсен дырпхьадзатI, йагъьу гвыквсыгIвта – Абдокъва Нури. «Шарпны» афутболасыгIвчва ахIбачва рыщта багъьата айцIбачвагьи йшдырцауа кьангьаш гьалам. Йшбергьльу апшта, ахIбачва «Сахтан топ» турнир апны асквшква 2010-2011 рагIан Россияла йчемпионхатI.

Квициниа Инна,
Интернет ахабарргагаквала йадгалапI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki