Library

Ужвы йгIадзынгылуа чкIвынргIа рыхъазла интернетгьи телебарагьи рбзазара йырзалымхуата йщаквгылапI, сквшы 20 рапхъала Къарча-Черкес ашта йачIвыта телебара шаъамыз ауат рыхъазла хъацIауачвапI. Ареспублика ауагIахъаква рыбызшваквала арадиуа гIачважвагIвацун, йара ауыгьи ангIанша абзазагIвчва гIальаматра дута йырбун. АуагIа рыхъазла арадиуа абжьы йгьихабарргаган, йгьинбжьагIвын, йгьисас тлапIан. Асквш 1993 агIан акIвпI Къарча-Черкес республика абзазагIвчва рцри бызшваквала ателебара гIатраква йапхъахауата йырпшныс анрылша

«Къарча-Черкес» къральыгIва телекомпания астудия анхара асквш 1993 январь а 19 атшын анхара джвыквылтI. Ателебара студия злабжаз атехника шщардазгьи, анхара ащапIы шбагъьамызгьи акомпания апредседатель Ажьи Джьальамби Уасыф йпа, агенеральна директор Проценко Алексей Павел йпа, аредактор хъада Шендрик Светлана Борис йпхIа ангIалын ателебара атраква джвыквырыжьтI.
Ателебара студия КПСС аобком йырчIвыз тдзыкI азалырхтI. Атдзы астудия анхара закIылагьи йгьаквыргIапсымызтI, ауи ахIатырла зныкI ахъазла йатдрыпауа ателебара станция гIадрысабапуамцара атраква акIвдыршаланыс йщаквдыргылтI. Ауи астанция апны жвыра зхьыз хтелекамеракI гылан, агIвыраква, монтаж злаучпуш ъамапсымакIгьи гьаъамызтI, ауи ахIатырла йангIахъыртIы амщтахь йапхъахауа амызква руацIа ателебара атраква закIгьи йанрымцIауата рейша аэфир йтарыжьуан.
Асквш 1993 июнь а 12 атшын аэфир йталтI абаза бызшвала йапхъахауа атра. Ауи «ХIабадучва рабачва ртынха» – хIва йахьзын, ареспублика апхьартаква рпны абаза бызшвала арыпхьара уысква йгIарыквчважвун.
Йапхъахауа абаза телебара атра акIвзыршаз ЧкIала Георгий Константин йпа йакIвпI. Георгий Ростов йтагылу акъральыгIва университет афилология факультет йаланакIуа журналистикала ахъвшара дгIалгатI, Къарча-Черкес республикала гIатгара зму ажурналист чIахIныгIва хьзы нкъвигитI, СССР ажурналистква р-АдкIылара (ужвы – РФ ажурналистква р-АдкIылара) далапI.
Ужвы Георгий Константин йпа йгIайгвалашвахитI ареспублика телебара ангIанша рынхара апны баргвыра щарда йшрынйуз. Астудия злабжу аъамапсымаква ъащардаз йгIалцIла ажурналистква ъазара ду гIадырбара, йгIащтIырхуа атемаква йнардзата йырзыгIарбара атахъхун. Асурат квпшыраква хьпшыракIгьи йазыбжахымкIва йахъырхун. Ажурналистгьи, арежиссергьи, ателеоператоргьи адгылуанта йдрыхIазыруаш атра ахъа уалагата ацIыхъвадза йалдыргауа йалачважвун, йангIалуанта адгалра ацджвыквырцIун. Аоператор йхъихуаш анхIазырхара адиктори ажурналисти ражваква рыгIвуан, ауи атра шакIвшауамцара рейша аэфир йталуа йгIапхьахуан.


– Астудия ъамапсымала абгата йгьадгаламызтI. Апхъа угылата амгIва лукъьанысгьи гьмайрам. ЙачIвызйа швзыргвышхвуз, йгIаджвыквшвцIаз ауыс къару гIалцIыртата йазалуазйа?
– хIва хIаницIгIа ЧкIала Георгий араса йджьауапхатI

– Абаргвыраква уырчвшвузтын уыс шIыцкIгьи хъатаукIра гьатахъым. ХIара хIыхъазла ауыс йгьишIыцын, йгьиджьащахъван. АнхагIвчва гвып йацацхърагIауа йынхун. Ажурналистква цгIвы хIнадзун. ХIыззыбжаз ага йщардазтынгьи апшыгIвчва рыхъазла атраква шджьащахъвахушыз хIащтан.

– Ауи асхъан ареспублика ауагIахъаква ркультура апны ателебара атраква магIныта йрыму швылашвхIвузма?

– Ареспублика телебара ангIандыршуз хачIв хъадата йгылаз ауагIахъаква рыбызшваквала атраква ррыхIазырра акIвын. Ауи азаман акытква рпны арадиуагьи гьымчважвахуазтI, абаза газет атиражгьи швабыж йалдзгIахьан, абаза театр гьаъамызтI, ауи ахIатырла хIыбызшва агIахчарала амальква нахвра атахъын. Ателебара ауи апш хачIвы архъйаныс алшушын. Ателекомпания архив апны абаза уагIахъа йгIарылцIыз агIвычIвгIвыс дуква йгIарыквчважвауа ателебара гIвыраква гIащаквхатI. Ауи ззысхIвауа, агIвычIвгIвыс йунашвагIваца удыруи йлакта утапшуа уанйыздзыргIвуи гьапшым. Ауат зылала йзымбата йгIадзынгылуа абанпараква архив йщтIу ТхIайцIыхв Бемырза, Мыхц Кьарим, анахьанат хIыгIвычIвгIвыс пшдзаква йгIарыквчважвауа ателебара атраквала йырпшы йауаштI, рыцIа аргваныта йырдырнысгьи рылшуштI.
Ажва гьалам, астудия апынгьи йакIвшун атраква, ауаса аэфир рейша йталуаз рыуа атракIгьи гIащаквырыжьныс амаль гьрымамызтI. УадыргIванагьи йхIвара атахъыпI ателебара архив апны уахьчIвала змагIны дуу атра гIвыраква шмачIым – Абашта айсра Ду аветеранква, акультура анхагIвчва, апхьахьаква, уахьчIвала йхIылахым анахьанат агIвычIвгIвыс дуква йгIарыквчважвауата. Акытква рбзазагIвчва, ауат рансимш бзазара йгIаквчважвауа атраквагьи аъапI, акытква рыцIа йараргвануата акIвпI ауи апш атраква шадыргалуа. Абарат анархараква абгата йгIауахвырквын ателебара амагIны шдуу уылаухIвитI. Зны профессоркI араса йхIватI: «Апщаша шгIадзауа зымгIвагьи анхарта уысква ласылас йалхIыргата хIунагIваква хIышрыдгылхуаш хIащтапI – хIцри бызшвала ателебара атраква хIшгIархьымшвуш апшта». Арат рапш ажва зхIвауа гьмачIгIвым. Апхъала ателебара атраква рпны ащарда йубуз акъральыгIва аунашвачпагIвчва ракIвын, ужвы укытлагIв, уыквлагIв, уынбжьагIв, уъахIльы дгIанарбитI, хIцри бызшвалагьи дчважвауата. ХIыбызшвала атраква адыргалуа йаналага ателебара ауагIа рыцIа йраргванхатI.
КЧР-ла гIатгара зму ажурналист Аджьбакь ХIаджьисмель йшипхьадзауала, абаза бызшвала ателебара атраква ргIаныршара абаза алфавит, абаза газет ргIаныршара, абаза бызшвала арадиуачважвараква ргIаджвыквцIара йыршIырпшы йауаштI. Ауат зымгIвагьи йангIаншабырг ауагIа чIащыгIвара дута йырзалуан.
ЙагIвсыз асквшква руацIа атраква темата йгIадрахауа тшызларпсах дукI гьаъам. Зынла нархара хъадата йщаквгылыз йрыуапI хIтурых, хIыбызшва, хIуагIахъа культура, абаза кытква рыжвлара уысква.

Арежиссер ЧкIала Маринагьи (МалхIвазргIа дыртпхIапI) дацмшыркъвауа йгIалгвалашвахитI сквшы 20 рапхъала ателебара атраква радгалща шаъаз. Зыкв ква гIакIылсуаз астудия чкIвын апны ателебара атраква акIвдыршалун. «Апещ акв гIатгIвыррыгьи гвы гьахIымтрызтI – ауи аъарала анхара хIазгIашыкъта хIаланахIвун», – лхIвитI ауи. Кьангьаш гьалам, уахьчIва ауат рынхара знадзара хIаракIу аъамапсыма бзиквала йшадгалу, ауаса ага йбзийызтынгьи аъамапсымаква йгIазрысабапуа агIвычIвгIвыс йыршIыйара нхара апны йгIайцхърагIауата акIвпI йщаквгылазара шатахъу.

Ателекомпания абаза бызшвала ахъвшара ззынадзаз агIатгараквала йгьгIашIасуам, атшауацIнарыхра йазынхитI. Зуыс бзи йызбауа агвып рынхара рыцIа-рыцIа йшагъьхуш йащтапI – апшыгIвчва рынхара уысква йрылцIхта цри бызшвала атраква йырпшныс йшгвжважвалуш апшта. Ари йацхIцIауата йхIхIвапI: ауи апш амаль уыжв ласыла адуней акъральква рбзазагIвчвагьи йрымазлуштI. Ателекомпания аунашвачпагIвчва йшырхIвауала, ужвы абаза бызшвала ателебара атраква интернет амальквала хIырпшы йауата йырчпуштI.

Квициниа Инна,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki