Library

СогIвым адзтшп урам апны ахъачва аэвкалипт цIлаква рыжьора йыцIата шахмат йаслитI, ахабарква рхIвитI. Июнь а 26 атшын араъа йбергьльу апсуа суратгIвгIвы, аскульптор Лабахуа Архип йчпаз аскульптура шIыц дыргылтI. Ари анхара гьпычIвым. Ауи йыршIыйара СогIвым йахъазымкIва Апсны шабгу апсыпынкъвгара гIадырбитI.

Лабахуа Архип йскульптураква Апсны атурых йгIалахаз агIвычIвгIвыс дуква, алитература йа алокI фырква ртурасква гIадырбитI. Зынгьи йгIайхъвыцуа афыр турасква скульптурата йчпахитI. Ауат йрыуапI апингфин философ, Чики Ники рсин, ауасамцара.
Апсуа фольклор афыр Тачквым (апсуа бызшвала «напIыршIашIа» гIаныцIитI) йскульптура акIвпI ари азын Архип СогIвым адзтшп урам злайрыпшдзаз. АпхъанчIви хабарква йшгIархIвауала, Тачквым йтурасы джьащахъвапI, ауи дкъвышпI, дгIащарбипI, дсудагьарпI. Йкъвышра акIвпI турасыта аскульптура йгIанарбауа – йхпахауа йнапIы йакъыльпшгIари йкъвльейри йырхцIарапI.
Аскульптура шIыц ангIахъыртIуаз уагIа щардагIв гIайззатI: акъва абзазагIвчва, асасчва, акъральыгIва уыснкъвгагIвчва.
– Тачквым йныбыжьла днаскIьахьан, йхъапщыла зынгьи закIылагьи йразымыз дпхIвыс уагIвырсызын. Ауи тширыгвыбзаханыс, йхIвауа мцтIакIвгьи алайцIаныс бзи йбун. Абараса йбергьльу амцхIвагIвы йсин адзтшп урам апны йъагIахъыртIызгьи лкIгIара злу магIныкI амапI: асин йачвыхъарамкIва ауагIа «мцхIварта» – хIва йзпхьауа чартакI гылапI – араъа йгIархъвыцта йызлачважауа щарда рхабар ауагIа зынла йрылалитI, – йхIватI Апсны республика ажвлара уыснкъвгагIв Кобахия Батал аскульптура ангIахъыртIуаз атшын.
Аларпшыга уыхвара шIыц гIазхъвыцыз ажва анйырт йгIайззакваз ауагIа йнапIы йачпауа афырква рсин турасква шгIаншауа атурых райхIвтI. Ари атшын пхарала, кьахврала, бзирала йырчвыта зыла йабаз ауагIа зымгIвадзугьи ргвы йгIатахатI.

Квициниа Асида,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki