Library

23.07.2012
Согъвым апны «Толстой йгьи Ганди» – хIва йзхьзу агIарбарта акIвшатI. ЙачIвыйа ауи магIныта йаму?

ЙачIвыйа йгIарбара затахъу йгIважьхаз асальамшвъаква, йбергьльу аурышв гIвгIви заджвгьи йымдыруаз ажвлара уыснкъвгагIви, йхъару ГIвадахь Африка йтабзазуз аиндиеци, зынзаман йыргIвыз? ЙашвхIаусыгIвайа?

Тамамта йухIвушызтын, уыжв хIзаман акъыльпшгIара йазынарху атемаквала йакIвшауа агIарбартакви аконференциякви апхъала магIны шырзырбуз апш ужвы йгьырзырбахуам. Ацивилизация ащапIы шацIцIуа гIазгвынгIвуа агIвычIвгIвысква, швкIгIвыпхьадзара йнадзауата, зны араъа тшазыркIкIитI, зны датшазджьара йайззитI, азаджв азаджв йхIвауа рымгIахуата йауыру агIачважвараква акIвдыршитI, ажва гвыбзыгъа щарда рхIвитI, ауаса закIгьи тшгьапсахуам. Индия апны йшырхIвауа анахйа, «адуней ажва бзиква йдырдагвтI». АгIвычIвгIвара гIащаквызыжьуаш ачважвараква уыскIла ныжьхта, хацкIлакIгьи йгьдрыбагъьум. ЙащтагIайуата, гIамта айшысла, датша айззаракI акIвдыршитI, йара ауи ауысла, дара ауат агIвычIгIвысква алата.

РыцIа йгьмайрамма уахьчIвала йгIаншахьу аинформация амальква гIадрысабапырныс? Ауат рапш уыс анадыргалуазара йхъаду ракIвыршара гьакIвым, къдзырата йрыцIу акIвпI.

Асуратква ргIарбартаква, ауахьауат аршIыйара нхараква ргIарбартаква уахьчIва йъагIадзазгьи магIны рымапI, йшпакIву ухIварыквын «Джоконда» суратдза анибара асхъан гIвычIвгIвысипхьадза дархъвыцитI, йбзазаща тшапсахитI. Ауаса магIныта йрымайа йажвыз асальамшвъаква?

Йауа, ауат зджьара йгIаквцIата йазалху аъачIвагIагIвчва рхъвыцраквагьи рыцта, урыпхьа йгьамуума? ЙачIвыйа ауи ахъаз аугIа уыста йрыму зымгIва кIарпсата бзита йузалмыргауа акопияква йзырпшра атахъу?

Йаргьи арат асальамшвъаква згIвыз рыхьызква щарда цIуата зымгIва рыхъазла йбергьльыпI.

Лев Николай йпа йжакIьа, «урышв шта апны йдуу агIвгIвы» (араса йззырхIвауа Толстой заджвыкI йакIвпI), апхьарта хIаныцIаз йгIашIарышвта йгIбалитI, йыгIгIалитI – апхьагаква рнапаквала акIвызтынгьи, акласс абльын йкIыду асуратла акIвызтынгьи. Йтдзахьыз нкъвызгуз агIвгIвчва хгIвы йшнадзузгьи ауи азаджв йыхьыз акIвпI щардагIвы рхъа йгIатахауа.

ЦIабыргыта, йара кIара йылыгIдыргIума Толстой Л.Н.?

ХъатакIла йгIахIахвырквын, йкнигаква ртираж мильуанпхьадзарата йгIацIырщтитI, ауатла адуней акъральква зымгIва рпынгьи фильм хъырхитI, апьесаква дыргылитI. Датша хъатакIла, асоветква рзаман йгIаншаз амшыркъвара айчважвара ауи даладмырджьауата аугIа йырхIвалитI:
– Уара «Айсри амамырри» уапхьама?
– Сапхьаныс салаган, ауаса ауаъа зымгIва француз бызшвала йаныпIи!
Абарат ажваква рымщтахь уымпшвырхъыччазтын цIабыргыта ауи акнига гьгIахъуымтIыстI, Толстой йунашвагьи хIвансхIванта акIвпI йшудыруа.

Ари адерт зымгIва рацкIыс йчвгьу уыжвгIанчIви згIвапI – апхьара бжанардза, дырра бжа (амдырра ацкIыс йайчвапI, йнардзам аъачIвагIанкъвгагIв йдертпI).

Ауыс датшагьи хъатакI амапI – магIны ду амата. ХIыуа ащардагIв Толстой йтынха йауата аъарагIвшаракI акIвпI йызхьагIвазу. Йуасаражву а-Толстой, йгвыбзыгъу арыпхьагIв, агIвы йаъащаква рпны агIвычIвгIвысагIара амагIны щтIызхуаз, дырра цIола змаз, арыпхьара йаргвышгвагIвыз агIвгIвду дгIазырбауа агIвыраква йгьрыпхьум йгIадзынгылуа абанпараква.

Ганди йуыс рахIагьи йайчвапI. ХIуыжвгIанчIвиква ауи йыхьыз рлымхIа йтггIитI, ауаса йдыргIващитI – Индира Ганди дылхъапщылума момкIва длабума, йаъапI ауи дхъацIуи дпхIвысуи атамам ззымхIвауагьи. АзджьакIгьи «Махатма Ганди дгьаъахымта демократия ауысла узачважвушгьи дгьаъам» – хIва Путин зны йхIваз ажваква ракIвымкIва закIгьи гьырдырам. Ганди Россия дыгьтамбзазатI, ароманквагьи гьйымгIвытI. Ауи йгIахъшахъыцIуата йдунейпшыщагьи уыста дызлазгьи гьырдырам аугIа, ага гандизм ззырхIвауа ангIаджвыквылгIваца Ленин араса йхIвазтIхIва: «Ганди дыздыритI, ауи Толстой йхъвыцща дтагылапI».

СквшышвкI рапхъала Ганди Толстой йылпха йаутI. ЦIабыргыта, «гандизм» ззырхIвауи «толстовство» ззырхIвауи гьазакIым, ауаса ауат адызкIылуа щардапI, зымгIва йрапхъата – зальмагIадаъа агIвычIвгIвыси адунейи рпсахра ауысла ахъвыцща.

ЗальмагIара – ауи хIзаман йазгIва чвгьапI. Ажва гьалам, агIвычIвгIвара атурых шабгугьи рчвыпI ауыла, ауаса ужвы ауи «азгIва» ауи аъара тшауацIнахын, ауи аъара турасшIыц щарда йыртагылын агIвычIвгIвара ныжьхта адунейгьи ыквначIвакьныс шварагIварахатI.
АкъванчагIа зымгIвагьи йхIыквпI – хIара, ажва гвыбзыгъаква гIазгвнымгIвыз, йзымгIаз, зтшдырра гIазмырбаз, Толстойгьи Гандигьи рбыжькванадзара.

Араъа йгьахIвартам ауат рдунейпшыща. Ауи уыс кIьыдата тшахауыргIвазара атахъыпI, йабашIкIыта, убзазаща йадукIылуамцара, ухъа уадынхалуамцара, ари адуней апсахра апны йгIауылалуа адырра шIыцква гIаурысабапуамцара, ухъи уаргванкви рахьыла угIалагата. Ауаса ужвы гIвнархаракI гIалхIкIгIаныс йаквнагитI.

Йапхъахауата, азальмагIадари амчыдари азакIыта йупхьадза йгьауашым, философия хIисаптагьи уысрхъйара йапрограмма хIисаптагьи. Ауи амчыдара йапшIагылитI. Зымч дуу рзальмагIадара – абарауи акIвпI ауи амагIны йаргьи агIвычIвгIвара къару гIарыланацIауата йзщаквгылуа.
ЙгIвбахауата, Толстойгьи Гандигьи хIыла йшгIацIалуа адуней зрыхъынхIвуа пельуангIвацата гьакIвым, ауат ражва гвыбзыгъа ззынадырхуз аугIахъакви акъральыгIвакви йгьырхъазым, агIвычIвгIвари адунейи рпны йгьгIанхум. Ауат ражваква адуней йыквбзазауа гIвычIвгIвысипхьадза йзынархапI, России Индии йыртабзазауа йгьырхъазым. «Упсы атшауацIыхра» даквчважвитI Толстой, «Анчва йакIвпI ацIабыргыра гIазлыцIуа» – йхIвитI Махатма, йаргьи адуней апны йапщыл йамуашыз агIвгIаншаракI ацхъайыргылтI – аэтики аполитики.

Толстойгьи Гандигьи йырдунейпшыщаз аидеализмла агIвычIвгIвара щтIырхуата дзачIв гIвычIвгIвысызлакIгьи йхъатачIв гIвзата акIвпI йшйызгIайуа. АзцIгIара уымазтын аджьауап уауаштI.

Абаратква рунашва зымгIва гIарбартакIгьи йгьгIаунахIвуашым, ага бзидздзата йадгалазтынгьи. ХIхъа хIатазцIгIахпI – йазнагвалайа щта ауат?
Ауат агIвычIвгIвыс йтшдырра йагIарыцIсгата йалныс ауаштI.
ГIврала швшагIвсуамца хIадагIвачата ауаъа швнашылуазтын, йажвыз асальамшвъаква швырпшырныс ахъазла – йдауышву азал йыгIвнажвгаз адакъикъаква швхъвыцраква гIадрыцIсныс закIы гьазхIвам, уадыргIвана ахъвыцраква рыцIа-рыцIа йцIолахауата.

Аиндусква рхрамква запшызлакIгьи анашылырта ахъахь уадгьына хвыцкI кIныхIапI. Йнашылуа дзачIвызлакIгьи тшйыргъвгъвитIта ауи напIыла дахьыситI. АзджьакI мдыршала ауыла Анчва йгватра тшырзгIацанарпауата йырпхьадзитI, ауаса ари абыжь пшка упсы Анчва йаргванхата уыла йамбауа ахацквала йпнащылуата акIвпI рыцIа йштаразу.
Йара ауаса абари агIарбарта хвыцгьи араъа йгIайуа дзачIвызлакIгьи йпсы ахацквала ахъвыцра цIолаква, ауасаражвра дунейпшыща йырпнащылитI. УадыргIвана дзачIвызлакIгьи ауат ахацква ансимш бзазара алагIваласраква йшшIрымчIвуш дащтазара атахъыпI.

ХIара амаль гIахIыртитI, анйара атып хIаздырцитI – уадыргIвана дасу йхъа йара дахвитпI. Ауат асальамшвъа гIважьква йгIарылцIуа амч, акъару, агвыбзыгъара швылашвхIва, ауи зыхьыз апщылу агIвычIвгIвыс дуква аргваныта йшвшвырдыр.
Ауи ухъагьи убзазащагьи злагъьучIв йауаш амальпI. Ймайрамызтынгьи гвлахIара злу уыспI ауи.

АгIарбарта – ауи швгIвацапI, ауаса адуней апны ашвква аъамзарквын, аугIа абыхъвкIылсыртаква анырбзазартаз азаман йазцахрын.

ЙцIыхъвахауата, йгьхIхъхIраштылрым йгвыбзыгъу ажважв – ауат руысквала йгIажвдырхлуштI ззырхIвауа! Зунашва ухIвуш ауысква гIаншазаджвыкIыргIатI…

Рыбаков Ростислав

Апсны Республика анаукаква р-Академия апны чIахIныгIва зму академик

А-Дуней адкIылара «Алашара» акьангьашагIв

«Абаза Къраль» сайт йазалхпI

***

«Махатма Ганди – Толстой Лев: шIырпшыра змам атынха» – хIва йзхьзу агIарбарта Апсны Республика асуратгIвчва р-АдкIылара а-Квта гIарбарта зал апны йакIвшитI. АгIарбарта «Агвапара угвы азыхътI!» – хIва йзхьзу агIаджвыквцIара йаланакIитI. АдгалагIвчва мурадта рпахь йдыргылуа арат ракIвпI: агвапари абзибари йрыцкIра, агIвычIвгIвыс дуква рхъвыцща цIолаква адуней апны ртшауацIнарыхра. Ауи гIаншищтара йцIуа ахысквша руацIа агIарбарта Россия апны 15 къалакI йрысасын. АгIарбарта акъральква рквтала йгIаншаз агIаджвыквцIара «Акультура гIамтаква Россия – Апсны – 2012» аларпшра адгалраква швабыж йрыквыргIапста йадгалапI.

Ганди – Толстой Л.Н. йызцауата, асквш 1909 октябрь а 1. – Асквш 1939 (атекст)

Ганди – Толстой Л.Н. йызцауата, асквш 1910 август а 15. – Асквш 1939 (атекст)

Толстой Лев Николай йпа. М. Ганди йзынарху гIвсальамшвъакI

Асквш 1869, Ганди адуней дангIаквыл агIан, ауи йкъраль Британ империя йарыпшдзагаркIван, апаштыхI пхIвыс Виктория йылналькъвыт-нальмаскIын. Асквш 1948 январь а 30, ауи зтшын дырщыз, Индия зхъа йахвиту къральыгIвахахьан. Ауи ахъахвитра йазынайырхатI Ганди зджьара йгIанымхауата йбаргвдзаз йынхара-бзазара шабгу.

Афильм «Ганди» (асквш 1982 йхъырхтI, «Оскар» согIатта агIба аквнадыргатI)


Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki