Library

АшвахIвагIв, акомпозитор Тльача Альберт йыхьыз Лагъь КIавкIаз апны йахъазымкIва хъарата йбергьльыпI. Ауи агIвымакъральква рпны щардала концерт айтлитI, йалкIгIата апсуа-адыгьа гвып бызшваквала йчважвауа аугIахъаква ъатабзазауа. Ауат патриот лахIварала, йпсадгьыл йазйыму абзибарала йырчву Альберт йашваква рапхъанчIвиква рпсадгьыл йабыжь хъгIата йырзалитI. СквшкъомкI руацIа тшауацIызхуа ауи йыршIыйара далабергьыльхатI, йыршIыйара йазцIабыргу аздзыргIвчва рбзибара йызгIашIыхатI. Хвысквша цIитIта Тльача Альберт анкъвакъвра «Абаза ашва» дархъйагIв унашвачпагIвпI. Ауи анкъвакъвра абаза угIахъа ркультура апны змагIны дуу гIаншарата йалтI.

ХIызту амыз ауацIа «Алашара» жвлара апны йхIыцынхауа, Къарча-Черкес, Къабард-Балкъар, ГIвадахь Осетия рпны гIатгара зму артист Тльача Альберт ужвыгьи чIахIныгIва хьзыкI гIайквнадыргатI: Адыгея республика апны гIатгара зму артист хьзы йыхьырцIатI. Адыгея ахъада ТхIаквщын Аслан ауи дйайхIвахIвуата ари ашта акультура атшауацIнарыхра йкъарути йгIапсарати йалайцIауа гIаликIгIатI.

– ХIара хIреспублика авокал ршIыйара атшауацIнарыхра апны уалацIара хвы азыгIбауата апхъахьылагьи адахIвра шIыцква уымазланыс узыхIтахъпI, – йхIватI Адыгея ахъада Альберт асогIа гIайийтуата.

Тльача Альбертгьи йыршIыйара хвду ъаквырцIауа шигвапахаз ТхIаквщын Аслан йайхIвтI, апхъахьыла Адыгея республика йкъагIауа йбазазаныс азитахъта дхIвахIвтI.

«Абаза Къраль» сайт аредакция Тльача Альберт йызцауа ахIвахIвраква йрыцыркIуата йыршIыйара апны апхъахьылагьи адахIвра шIыцква йымазланыс, ауыс дуква рырхъйара апны йымч йалахIауа дынхарныс, дбзазаныс йзыртахъпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki