Library

Тобыль Тольыстан Закьарыйа йпа (1879 – 1956) абаза литература дагIаджвыквцIагIвпI, аугIахъа ршIалахIвара гIазызкIкIыта йгIацIызщтыз драпхъагылагIвпI, абаза йгьи черкес бызшваквала апхъапхъа йгIацIцIыз ахIарыфбакви апхьагакви дыравторпI. Тобыль Тольыстан апрофессорква Генко А.Н. йгьи Сердюченко Г.П. дрыцынхун, ауат пхата ргвы дгIатахатI, урышв бызшва ажвар адгалагIв Ожегов С.И. дйынйалун. Йгвы байан, зымгIвагьи йырзыхътIын, йгвчIагIв дууын. Йцри уагIа дырра рауырныс, гIвырагьи, литературагьи, культурагьи рымазларныс швабыж йтахъын.

Тобыль Тольыстан асквш 1879 АлбыргIан кыт апны дйытI. Амадырса дангIалга Лагъь Осетия апны Ардон йтагылу адин апхьарта дыцIалтI. Ауаса апхьара наймырдзауата дгIацIцIхтI. Асквш 1914 агIан АлбыргIан кыт апны амадырса арыпхьагIвта ддыргылтI. ЙащтагIайуаз асквш Теберда апны йакIвшуз Баталпашинск хъвшара арыпхьагIвчва райззара апны ачкIвынчва йырхъазымкIва ахIвссагьи арыпхьара шатахъула, гIарып бызшва йахъазымкIва урышв бызшвагьи йарыпхьара шатахъула дгIачважватI. Ауи ахъазла арыпхьара уыс дакъвырххтI.

Асквш 1920 асоветква рвласть щаквгылхьата АлбыргIан апычIв апхьарта апны арыпхьагIвта датадыргылхтI. Асквш 1924 агIан гIарып гIвыра щата амата черкес алфавит гIанйыршатI, ачеркес газет аредакция драбадыруан, йапхъахуз ачеркес хIарыфбакви апхьагакви гIацIищтауан. Асквш 1924 йгIашIарышвта асквш 1932-дза Тольыстан 13 апхьагакI дрыдынхалын йгIацIищттI, Алтадоков А. йгьи Уаз Н. йыцта хгIвыла йгIвбахауа асквш йызладрыпхьуш апхьага дрыхIазыртI, Хабекиров Б. йгьи Барануков А. дрыцта Кретовская лапхьага атайкIтI. Ауи акIвымкIвагьи асквш 1926 агIан черкес бызшвала агIахIвахра «Джьалдуз», асквш 1929 агIан йгIвыраква разкIкIра «Зули» гIацIищттI (араъа апьесакви, ашвакви, ауысакви аншвалтI).

Й-30-хауа асквшква рагIангьи уыс щарда йырхъйара атахъхатI. Асквш 1932 ноябрь а 25 Баталпашинск апны абаза арыпхьагIвчви ажвлара уыснкъвгагIвчви райззара акIвшатI. Араъа Алфавит шIыцла а-Квта Комитет абаза бызшвала гIвыра Черкес автоном область апны абзазара йшаларыжьуаш ауысла йнарахвыз ащаквыргылра ауатыкв йтан. Аконференция йалакваз Тобыль Тольыстан дыздынхалыз абаза алфавитгьи ахIарыфбагьии йрылапшын йдрыбагъьатI.

Абаза алфавит абзазара йаналарыжь амщтахь, асквш 1933 йгIашIарышвта асквш 1940-дза, аурышв апхьагаква гIайрысабапуамцара Тольыстан йхъазыта йа датша автор йыцта хIарыфбазтынгьи апхьагазтынгьи йалата 19 дрыдынхалын йгIацIищттI. Апхьагаква йрылашвуз агIвыраква атакIраква йгьырхъазымызтI, йара йчIвквагьи рылан, абаза уагIахъа ршIалахIварагьи гIайрысабапуан. Апхьагаква дшрыдынхалуазымцара Черкесск йтагылаз апедагогика техникум апынгьи йайрыпхьун, анаука рхъвыхра институт апынгьи агIвырагIацIщтырта апынгьи дацынхун, абаза бызшва агIвырала дбжьагIвын йгьи педтехникум апны абаза бызшва арыпхьара ауысла дкьангьашагIвын.

Арыпхьара йгьи алитетература рпны Тобыль Тольыстан йынхара асквш 1937 сентябрь а 19 агIан йапышвттI. Ауи асхъан абаза бызшва ацайкIитIхIва ддыркъванчан дыркIытI. Тольыстан йпхIа йшгIалгвалашвахуала, даныркIуаз ага амшква шуаразтынгьи йпальто жвпIа йыцнайахвын джьауап ангIайхъырхуаз йанхьтугьи йанпхагIвугьи йышвата йынкъвигун. Йара ауи агIан дыздынхалыз апхьагаква зымгIва азыркIкIын Черкесск аплощадь апны йырблытI. ЙпахIба Нури (Абашта айсра Ду даладзтI) комсомол дгIалырцатI, арыпхьагIвта дъанхузгьи дгIакъвырцан чIапщагIвытанадзара нхарта ймауа дгIанхатI.

ГIвысквша руацIа дтачIван Тольыстан Черкесск ахIапса апны джьабагIакI ъану йчва йтшауа. Ежов Н.И. йчвгьахараква ангIацIцI амщтахь асквш 1939 сентябрь а 13 агIан дгIадырхвитхтI, льажьа шйымамызгьи щаквдыргылтI.

Абашта айсра Ду рыцхIагIата йгIанагыз швабыж йылсын дарычмазагIвтI. Анамыцаква хIышта йангIатал амадырса апны йайрыпхьауа даталагахныс йгIайщахIалызтIхIва абаза ажважвла джьауап риттI: «Ахъва йджвылугаз гIаугылхитIхIва йгьпхахум».

Айсра алгата абаза газет агIацIщтра анджвыквырцIах ащымта аредакция дцан йынхаквуз зымгIва тшрыкIвйыршауа драйхIвахIвуан, гвыргъьара дута йзалуан. Агазет йымата педучилища, ауагIа рарыпхьарала ахъвшара, атипография дырнашылуамцара зымгIвагьи рнапIква йкIуан, йгвыргъьара рыцагIвишун.

Йныбыжьла ага днаскIьахьазтынгьи, Тобыль Тольыстан абаза сабиква рыхъазла йгIацIырщтуаз апхьагаква рыдынхалра гьашIайымрысуазтI. Ауи анхара дшазгIашыкъыз джьауымщушта йгьаъамызтI. Асквш 1945 йгIашIарышвта асквш 1954-дза йхъазытагьи анахьанат авторква йыцтагьи йрыхIазырыз, йатайкIыз, йгIацIищтыз апхьара программаква, ахрестоматияква, атшарыщцара азкIкIраква, апхьагаква 12 йнадзун. Апхьагаква ауагIа ршIалахIвара йгIахъыхыз йгIвыраквагьи рылайцIун. Ауи акIвымкIва асквш 1949 агIан Чуковский Н. йхабаргIвыра «АдзыгIв апны атдзы чкIвын» атайкIтI, гIвнаука нхаракI гIаквицIатI: «Абаза диалектква руысла» (1945), «Абаза ажважвква» (1954). Датша гIвнаука нхаракI рнапIлагIвыраквагьи йрыхIазыртI: «Абаза бызшва апны ажва агIаншаща», «Абаза бызшва апны ащата ажвакви аффикскви». Зарбла йаквта йрыхIазырыз ауат анапIлагIвыраква напа 200 райхIа йнадзун.

Тобыль Тольыстан ауагIа ршIалахIвара бзи йбун, цIолата йдыруан, йангIалуата йызгIарысабапуан. Асквш 1947 агIан йапхъахауа абаза турыхква разкIкIра, асквш 1955 агIан – ШакIрыл К. дйыцта – йгIвбахауа азкIкIра гIацIищттI. ЙащтагIайуаз асквш ауи адуней йхIваджьтI.

Тобыль Тольыстан бзита дыздыруаз, згIагвалашвахраква рпны йауацIыхта дгIазырбауа агIвгIвы Джыр ХIамид йкнига «Амара йгIанаршIыхаз» апны араса йгIвытI: «Асквш 1956 февраль а 19 апны абаза угIа, ауат рлитература гвасра ду, пхаста хIатла гIарайдзатI. ХIара хIугIахъа, хIыбызшва рхчагIвы, ргIащаквыжьыгIв, хIгIвыра ащтIыхыгIв, ауи атшауацIнарыхыгIв, хIугIа рарыпхьагIв, ауат ргIвоу Тобыль Тольыстан дпсытI… ЙанакIвызлакIгьи йшаъу апшта, февраль амыз хьтахъан, ушIнабылгIауата апшыхь хьчIвачIва гIасуан. ЗымгIвагьи Тобыль Тольыстан йпсхъа рымата гвыла йчIвыуа, рхъаква кIарщщы АлбыргIан аурамква йгIарбжьысуан…»

Апрофессор ТIыгв Владимир Тобыль Тольыстан йынхара-бзазара ахъазла араса йхIвун: «Тобыль Тольыстан аугIа гIаныршара къарута йрымаз рыцIа нахвата, рыцIа йалкIгIата йгIаузырбауа дрыуан. Ауи уыс щарда дырзычпата даъан. Тобыль Тольыстан … уыста йхуз жвагIвхъачва йрызхъушын – адгьакви (ачеркесква) абазакви рыбызшваква рхIарыфква лихтI, апхьагата библиотека абгакI йгIвытI, ажварква гIанйыршатI, йапхъахауа алитература гIвыраква гIацIищттI, анаука нхараква алайцIатI, афольклор азикIкIытI, йгIацIищттI». Йара ари автор Тобыль Тольыстан йынхари йынцIри хъацIара дула йырчвыта акIвпI йшипхьадзауа.

Тобыль Тольыстан йыршIыйара тынха йауата араъа рыцIа йхъадата йхIпхьадзауа алитература йазынарху агIвыраква ракIвпI йгIахIырбауа:
1. Зули: апьесаква, ауысаква, ашваква. – Баталпашинск, 1929. – Н. 55 – Черкес бызшвала.
2. Абаза турыхква. – Ставрополь, 1947. – Н. 145. – Абаза бызшвала.
3. Абаза турыхква. – Черкесск, 1955. – Абаза бызшвала (ШакIрыл К. дйыцта).
4. Зули: апьесакви ашвакви разкIкIра. – Черкесск, 1958. – Н. 55. – Абаза бызшвала.
5. Ашахв акIкIара: йынхара-алкIгIараква. – Черкесск, 1982. – Н. 256. – Абаза бызшвала, черкес бызшвала.

ЧкIала ПIитIа, афилология наукаква рдоктор, апрофессор.

АгIвыра «Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki