Library

Апрофессор ЧкIала ПIитIа данаука редакторта адуней йгIаквылтI акнига шIыц «Тобыль Тольыстан Закьарыйа йпа. Архъвыхракви агIагвалашвахракви йгIархъыху аршIыйара сурат». АгIацIщтра йаншвалтI агIвычIвгIвыс ду Тобыль Тольыстан йынхара-бзазара, ажвлара, арыпхьара йгьи алитература йырзынархата йырхъйаз ауысква йырпщылата йапшым асквшква руацIа йыргIвыз ашвъаква. ХIара агIацIщтра анаука редактор ЧкIала ПIитIа хIйынйан ауыс дадынхалуа дзалагаз, акнига дшадынхалуаз гIахIайхIвныс тшизынахIырхатI.

Акнига агIацIщтра згIаджвыквцIару Тобыль Тольыстан йпхIа Нина лакIвпI. Ауи ЧкIала ПIитIа тшгIайзыналырхан йадылкIылта йлымаз ашвъаква йнапIыцIалыршватI.

– ХIпны санцах ауат ашвъаква сгвы рыквкIта сырпшытI. ЙшгIацIцIызла, ауат ТIыгв Владимир йгIвыран, йынхараква йрыуан. Рщарда йапшым агIацIщтраква рпны йгIарысабапхьан. ЙгIаснапIыцIашваз агIвырагIвацаквала книга кIьыда уызгIацIщтуашта йгьаъамызтI, ауи ахIатырла гуманитар рхъвыхрала а-Институт анхагIвы Тобыль Татьяни сари нхара ду ацакIвхIыршатI, датша швъа щарда шIыц-шIыц хIырзыпшгIан йгIахIаутI. Ауи зымгIва адхIкIылтI хIадынхалын акнига агIацIщтра йазхIрыхIазыртI. ЙхIвара атахъыпI Москва абиблиотека санынхуз асхъан Тобыль Тольыстан йгIвыраква рыуа щарда сшрынйаз. Ауат абаза бызшвали черкес бызшвали йгIвын, апхъапхъа латин щата зму ахIарыфквала, уадыргIвана кириллицала. Ауат акнига ацIыхъва апны йгIарбапI.

Акнига йадынхалкваз йшгIалыркIгIауала, Тобыль Тольыстан йгIайыквчважвауа агIвыраква щардазтIхIва уыжвгIандзара ауат гIацIщтра заджвыкI апны йадкIылата, ауи йынхара-бзазара ахъатаква зымгIва, йыршIыйара тынха гIанарбауата йгьаъамызтI. Абари акнига агIацIщтрала ауыс аъаща тшапсахитI.

«УахьчIвала йгIацIцIыз агIвыраква йрыуата хIара рыцIа магIны змакву гIарылхIхын книгакI апны йадхIкIылныс мурадта йхIчпатI, – хIва йгIанахIвитI апхъажва апны. – ЙазхIкIкIыз агIагвалашвахраква, алитературадырра йгьи алитературацIбацIбара гIвыраква апхъала зынгьи йгIацIымцIс агIвыра шIыцквала йнахIырхъахтI. Ауат ашвъакви агIагвалашвхракви рырхъвыхрала йщаквгылтI. Ауи апшта агIацIщтра апны йапхъахауата Тобыль Тольыстан йынхара-бзазара ахроника гIарбапI, йтынха гIазырбауа агIвыраквала йбайапI, йара Тольыстан йгIвыраквагьи ауи йунашва зну агIвыраквагьи рбиблиография абгата йгIарбапI. Ауи шабгу ззынарху закIыпI – Тольыстан Закьарыйа йпа йыршIыйара сурат йнардзата йгIарбара».

Апхъапхъа акнига асквш 2009 агIан Тобыль Тольыстан йюбилей йадахIвуата йгIацIцIырныс акIвын ауыс шаъаз, ауаса ауи агIвырагIацIщтырта апны хысквша райхIа йщтIан. УадыргIвана ЧкIала ПIитIа Къарча-Черкес къральыгIва ауниверситет апроректор ПIаз Сергей тшизынайырхан агIацIщтра ауысла ауи дгIарцхърагIатI.

Акнига атираж экземпляр 200 йнадзитI. Сабап ду рызгIанагуата ауи рызгIарысабапуаштI арыпхьагIвчва, апхьагIвчва, апхьахьаква, абазаква ртурых, рлитература, ркультура гIальаматра азызбауа апхьагIвчва зымгIвагьи.

Квициниа Инна,

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki