Library

Махважв Артур дчкIвынищтара айъазара ъачIвагIа дапхьаныс йгвы йтан, халат шкIвокIва йышвата ауагIа дшырцхърагIауа щардала йыла йгIацIайыжьуан. ГIаншаракI амщтахь ари агвала рахIагьи йылаштI. Псыжв кыт йапхъахауа апхьарта йхпахауа акласс дыцIаркIвата айззара дукI далашваныс йынасып йгIанакIытI. Ауи айззара апны акыт абзазагIвчва доктор диссертация ахчара ъагIайыдахIвуаз ахъазла йайхIвахIвуата хIреспублика ауацIала йбергьльу аврач Татаршвауа МухIарби ддыртлапIун. Агвышхвара йарчвыз ачкIвын йгвы йтайкIытI абари аврач йапшта нцIрата йыму бзира йханыс, ауагIа драйъазарныс.

– ХIткъвым врачкIгьи дгьгIарылымцIсызтI, ари абзазара мгIва заджвгьи сгьыквйымцIатI. СъачIвагIа сара-сара йгIалсхтI. Татаршвауа МухIарби ауи анйара апны акIвымкIва датша зджьарагьи дгьсымбасызтI, уадыргIванагьи йгвапари йгвхътIыри ртыбгIара джьасщатI, – йгIайгвалашвахитI айъазагIв шIа.

Йцбахауа аклассдза Артур акыт апхьарта апны дапхьун, уадыргIвана Черкесск йтагылаз атрыкв лицей дыцIалтI. АпхьарасахIатква рщарда англьыз бызшвала йакIвшун, ауи ахIатырла агIвыма бызшваква бзита йдыртI. Ажва гьалам, алицей йгIацIигаз адырраква ачкIвын уадыргIвана швабыж йыхъватI. Айъазара ъачIвагIа дазхъвыцуата Артур рыцIа йгвы зквкIыта дызпхьуз химии биологии ракIвын. Асквш 2003 апхьарта хьапщ медальла дангIалга амщтахь Махважв Артур Ростов йтагылу амедицина университет дыцIалтI.

– СаныцIалбырг суысква гьмайрамызтI, – йгIайгвалашвахитI Артур, – йшпакIву ухIварыквын апрограмма алачпан, скъару аквхъушшва йгьзымбузтI, сгвы снадзунта зымгIва кIаспсата сгIацапахырныс гIастахъхун. Ага сгвжвайыргьи йгIасгвынгIвуан адахIвра дуква уырзынадзаныс ахъазла мгIва майра шаъам. Йапхъазуз атшыбжьара нхара агIан зымгIва гвынгIвырахатI. Анчва йбзирала, сара ауи ауысла хIреспублика чымазагIвтара апны сгIарщтитI, Татаршвауа МухIарби йунашва сацIата сынхун. Ауи дгIасылабжьун, аъачIвагIа амадзаква сйырдыруан, ачымазагIвква сшрыдынхалуаш сйырбун. ЧIапщара сгIанхалун, аркъьарта апынгьи зны ахирург сицхърагIаныс сылшатI. ЙащтагIайуаз атшыбжьара нхараква зымгIва Татаршвауа МухIарби йпны сгIайуамцара сырхъыстI.

Йхвбахауа акурс ацIыхъвадза Артур врачта арра дкъвырльыкъвхагIвханыс йгвыгъан. Ауаса ауи азаман арра апны апсахраква гIаншан нхарта гIаууачвахатI. Хирургта акIвын йхъа шибуз, ауи ахIатырла йцбахауа акурс данапхьуз ъачIвагIа нархартата йауацIыху ахирургия гIалихтI. Айъазара апны ари аъачIвагIа лкIгIара ду амапI, ащарда ахирург йакIвпI ачымазагIв цхърагIара ду йызрадзауа. Датша хъатакIла угIапшыхырквын, аркъьара шварагIварадара ду апщылапI. Артур ауи бзита йгIайгвынгIвуан. Асквш 2009 агIан, ауниверситет дангIалга амщтахь, сквшыкIла специализация дахъысырныс дгIарщтитI. Ари азынгьи Татаршвауа МухIарби йакIвын зунашва дацIаз.

Специализация данахъыс амщтахь хирургия хъвшара апны дынхауа далагатI. Араъа ауи зуыс йазъазу дъачIвагIагIвта, дгIвынгIалта, дгвышхвагIвта тшгIайырбахьан. СквшыкI анахъыцI ачымазагIвтара апны йазалху шIыпIа квта гIандыршатI, рентгено-эндовоскуляр амальла айъазара диагностика ъарчпауа ахъвшара нхара днарахвтI. Аквта апны хирургия амаль гIадымрысабапуата агвыхьква йрайъазитI. Ари ауыс Артур дахIврала ййырдыруа айъазара йанархара шIыцпI. АчкIвын хирургия хъвшарагьи дгьакъвымцIтI, араъа анхари аквта апны анхари адикIылитI. Аркъьараква агвыхьква ракIвпIта йыззынарху айъазагIв шIа джьауапкIра ду шйыхъвдакву йылайхIвитI. Ага ауаса йаъазтынгьи, йгIарбараква бзипI: Махважв Артур йара-йара аркъьараква йчпарныс йылшитI. АркъьагIв шIа ареспублика поликлиника апны эндоскописттагьи дынханыс ддрайгватI. Абар йара ари ауысла йхIвауа:

– Хирургиягьи эндоскопиягьи злапщылу щардапI, ауи ахIатырла ари анархарталагьи сзынхушта йаъапI. ХIреспублика ауацIала рыцIа йагъьу аэндоскопистква йрыуу Охвта Анзор йъанатIа данакъвыцIхуаз аполиклиника апны йцынхъвы сынхарныс сирайгватI. Ауи апш азхъацIара апны «момо» гьсзымхIватI.

УахьчIвала Махважв Артур дахIврала ахынхартакIгьи адикIылитI. Айъазара апны ашIыцраква ансимшгьи йгIаншитI. Ууыс азаман йаквыргIапсата йузынардзара ахъазла зынзаман йгIауайдзаз адыррагIвацаквала угIашIас йгьауам – Анчва йылпха ануаурагьи уъачIвагIа бзибара ду азуымата уынхара атахъыпI.

Айъазара ъачIвагIата йгIауызтуа Анчва йакIвпI. Ари аъачIвагIа бзазара мгIвата йгIалызхуа агIвычIвгIвыс уыс щарда дырзычпазара, йдырраква ауацIыхзара атахъыпI. Гиппократ йшихIвазла, айъазагIв йылаква ауарба алапш йапшта йцIаразара, йнапIква пхIвыснапIыта йпшказара, ащтанчIв апшта дуасаражвта, йгвы асльан гвыта йбагъьазара атахъыпI. Ауи йаццауата ауагIа урайъазара ахъазла дырра цIола уымазара, ачымазагIв уйызбзизара атахъыпI. УадыргIвана акIвпI агIаншара хьантаква анузалыргуш. Махважв Артур йапшу агIвычIвгIвысква ршвапха зквшахIату ари акIвпI: ахIбачва рцIас бзиква пшдзата йыззынардзахуаш абанпара гвыбзыгъа шгIадзынгылуа.

Джьандар Залина,
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki