Library

Абаза литература ащата щтIазцIаз дрыуапI Уаз НыхIв Абрам йпа (1900-1942). Ага йгвасразтынгьи, ауи йбазазара шакIвшаз йауата йбергьльу мачIпI. Асквш 1900 агIан Апсуа кыт дйытI, адин ауысла адырраква гIацIигатI, гIарып бызшвала дзыгIвуан, дзапхьун, а-Къвыръан хвитта дапхьун, йгIаныцIуаз абгата йзатакIуан. Акыт апхьарта апны арыпхьагIвта дынхун, уадыргIвана Черкесск апны дынхауа далагатI (асквш 1925 йгIашIарышвта) – НКВД апны атакIыгIвта, ауи амщтахь агIвырагIацIщтырта апны.

Абаза алфавит анлырх амщтахь Уаз НыхIв зынла арыпхьара уысква джьгарта дрылалтI. Асквш 1934 агIан Афанасьев дыздынхалыз аурышв бызшва арыпхьага шIырпшыгата йгIайахвын абаза грамматикала гIвапхьагакI гIацIищттI, йхпахауа йгьи йпщбахауа аклассква рыхъазла. Йара ауи асквш Богоявленский Д. йгьи Тимофеев Л. йгIацIырщтыз литературала апхьага аныргIалща дашIпшуамца агIвыра льальата йыздыруа апхьагIвчва рыхъазла апхьарала цхърагIага гIацIищттI. Апхьага аурышв гIвгIвчва ргIвыраква ратакIраквала йалан. Ауат рыуа азджьакI Уаз НыхIв абаза апхьагIвчва йшгIаргвынгIвуаш апшта йпсахуамцара дрыдынхалтI. Ари апхьага йхъатала йалайцIаз агIвыраквагьи аныпI: гIвуысакI, гIахIвахракI йгьи гIвыра дукI ашIчIвара. Псахра алайцIумцара апхьага йалаз гIвгIахIвахракI – “Чваргьа-чврыс”, “Аколхоз апны асоцацлыбра” (Чехов А.П. йгIахIвахра “Хамелеон” йгьи Шолохов М.А. йгIвыра “Поднятая целина” йгIархъыхта) – Черкесия агIвгIвчва ргIвыраква разкIкIра “Идем на пробу” йалашватI. АзкIкIра асквш 1934 йгIацIцIтI.

Йджьауымщушта йгьаъам заман айшысла ауи уыста щарда йырхъйаныс ъайылшаз. АршIыйара ахац йылан, ажва йгвы аквкIын, йангIалуата йызгIарысабапуан, абызшва апшдзара йзыгIарбун. Ари агIвычIвгIвыс абаза сабиква рыхъазлагьи ауагIахъа литература ахъазлагьи сабап злу бзира щарда шизахъвдаквыцIуашыз ажва гьалам, йынцIра рыцIа йауыразарквын. Швабыж йгвасрата ауи йыршIыйара уысквагьи йырхъйуз арыпхьара уысквагьи зальмагIала йшIчIватI. МцкIыла ддыркъванчан асквш 1935 ноябрь а 11 агIан Черкес автоном область ахIаквымхарта жвасквша йыквырцIатI, йымлыквгьи йыквырхтI. ДаныркIуаз йпшцIа апахь апны асабиква рыхъазла йгIацIищтыз апхьагаква йырхъазымкIва йнапIлагIвыраквагьи азыркIкIын йырблытI.

Асквш 1942 агIан Мордовия Потьма ст. йжвизхауа алагерь апны дпсытI.

Асквш 1980 октябрь а 29 РСФСР ЙхIаракIу а-Суд а-Президиум ащаквыргылрала льажьа йымамкIва хIаквым шйыквырхаз щаквдыргылхтI.

Уаз НыхIв йыршIыйара тынха йауата:
1. Муса дашгIамгIвайсыз: гIахIвахра //Йызпхьуш акнига. Апхьара мачI зму ршколква рыхъазла учебник. – Сулимов, 1934. – 78-80 ан.
2. ЙыржьатI //Йызпхьуш акнига. Апхьара мачI зму ршколква рыхъазла учебник. – Сулимов, 1934. – 51-58 ан.
3. Чваргьа-чврыс // //Йызпхьуш акнига. Апхьара мачI зму ршколква рыхъазла учебник. – Сулимов, 1934. – 16-19 ан.
4. Аколхоз апны асоцацлыбра // //Йызпхьуш акнига. Апхьара мачI зму ршколква рыхъазла учебник. – Сулимов, 1934. – 74-78 ан. – Идем на пробу. Выпущен Черкесским оргкомитетом писателей. Посвящается первому Всесоюзному съезду оргкомитетов писателей. – Сулимов, 1934. – С. 135-139.

ЧкIала ПIитIа,

“Абаза Къраль” сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki