Library

Апсахраква, абаргвыраква, агIахътIра шIыцква, йырчвымшвауа, йутахъыта йузымчпуш шаъам йазхъазцIауа абанпара… ЗымгIва аквшвуштI, ауаса майрата йгьалуашымхIва йзпхьадзауа абари абанпара дрыуапI Къалмых Асйагьи. Бзазара хъата щарда рахьыла дгвышхвитI, йлылшуш лырхъвыхитI, дрылапшитI, йаллыргитI, бзита закI анылзынардзара дайгвыргъьитI. Ага ауаса йаъазтынгьи, луысква зымгIва агIахIвра апны тшадыркIылхитI, хореография амадзаква дрыздырцитI.

Къалмых Ася лцри Черкесск къала апны музыкала апхьарта дгIалгатI, аъамапсымаква йа ахореография хъвшара дыцIалта дапхьаныс йазалху ашвъа (асертификат) гIалнапIыцIарцIатI. АгIахIвра рыцIа дхънахын Черкесск йтагылу акультури аршIыйари рколледж дыцIалтI.

Асйа сквшкъомкI руацIа Багаева Елена унашва зхъылцIауа «Глория» ансамбль дрылата дгIахIвытI. Къарча-Черкес апны йазалху аевропа гIахIвраквала ари ансамбль рацкIыс гвып ъаза гьаъам. Ужвы Асйа Къарча-Черкес республика къральыгIва ансамбль «Меркурий» дрылата дгIахIвитI. Дызщцаз агIахIвраква рымщтахь ауагIахъа гIахIвраква шIыц-шIыц тшырзылбжьахырныс шмайрамыз гьцIалкIуам. Ауат злаквымшвауа аъащаква ауи аъарала йщардапIта гIвдуней гIвымакI йыргIвызапI. Дамайчуата лхъа дадынхалуамцара ауи абари архъвыхрагьи дахIврала дахъыстI.

Къалмых Асйа лбзазара апны агIахIвра уыс хъадата йылпхьадзитI. ЗаманкIла дхвитхата тшанпсылщауа (17 сквша йырту ари апхIвыспачкIвын ауи апш лшара гьылщардам) агIвыма бызшваква рдуней дыквлитI, йлымаджьащахъвата англьыз бызшва ллырдыритI. Щарда мцIуата Черкесск сасра дгIайын даъан аканада профессор Леонард Джеймс. Ауи хымшкI руацIа арыпхьара курсква акIвйыршун. Йайрыпхьуз агвып йрыуата рыцIа йагъьта йпхьадзаквуз апхьара Канада йрайгватI. Ауи зынасып йгIанакIкваз Асйагьи дрылапI.
Ауи аспортгьи хъатакIла дгьачвымгылтI, «КУДО» – хIва йзхьзу арра абакIра майрата дазъазахатI. ЛхIатларала йабакIуа агвып рпны Къарча-Черкеслагьи, анахьанат аштаква рпнылагьи ауи йызнымкIва дапхъагылагIвхатI.

Асйа йшылхIвауала, абзазара апны йгIалыдахIвуа зымгIвагьи збзиру лан Аминат лакIвпI. ХIайчважвара ацIыхъва апхIвыспачкIвын дгвыргъьауа арат ажваква гIацылцIахитI: «ДзачIвызлакIгьи йуысква бзихуштI, ауи ахъазла ухъагвы аквыта ухъа уадынхалра атахъыпI. Уангвышхвауа агIан акIвпI уымчгьи ангIаталуа».

Ешерова Муъминат,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki