Library

Футбол йъасуа ауатыкв тыбгIаква рпны ачкIвынчва гврыхваква атоп нкъвырцитI, ауипхьадза апшыгIвчва хъызхуа ахъвмарра джьащахъваква рыла йгIацIалитI. КIвращын ХIасана Щамсадин йпа абари агвала ансимшгьи абзазара йшалайыжьуаш дащтапI. Абари апш футболасща хIреспублика ауацIа, хIкъраль ауацIа йакIвшаларныс йтахъыпI, хIычкIвынчва ахча щарда йъахънадрыхуа агIвымакъральква рахьыла йамхъуата.

КIвращын ХIасана аспорт йапщылу йынхара-бзазара Казахстан апны физкультурала дарыпхьагIвта йджвыквицIатI – асквш 1981 агIан апхьара даналга ауаъа дынхун. ГIвысквша дынхатI, асабиква рыдынхалрала йъазара йалайырхIатI, уадыргIвана тгIачва гIанйыршатI. Асквш 1983 агIан йцри Къвбина кытла дгIацапахын Устджьгваты йтагылу чкIвынргIа рспорт апхьарта апны бжьагIвыта, арыпхьагIвта дынхауа далагатI.

Ауи багъьата ауыс ацIыхъва дтагылын «АйгIайра» – хIва ахьызта Московск микрорайон апны спорт апхьарта кIьыда гIахъдйыртIытI. Апхьарта ужвыгIандзара йынхитI, асабиква хвитра абакIрали футболли йрыдынхалитI.

Араъа дынхауата ХIасана йызнымкIва йсабихъа гIагвалашвахраква дрыланахIвун. Ауи агIан абари апш спортзал рымазланыс ргвы адзакIьагьи йгьгIатамшвузтI. Бжьага уыста йрымаз адзгIагра акIвын: ансимшы Къвбина апсыхIва йталуамцара дзы гIвба-гIвба пщырхIа йрызната йгIахъаргыллун. Футболасыртата йрымаз акыт адзакIьа ащаца мцыра акIвын.

Апхьарта ангIахъыртIы йгIашIарышвта ХIасана Щамсадин йпа йынхарала гIатгара йщардапI. «Сахтан топ» клуб асогIатква йырзабакIуата ауи йбжьуз асабиква футболла йащтацауата хын Россия йачемпионхатI, асквшква 1995, 1996, 1997 рагIан, Россия ауацIала йакIвшуз анахьанат анкъвакъвраквагьи йрапхъагылагIвхатI.

Асквш 2002 йгIашIарышвта 2008-дза апхьара сквшипхьадза КIвращын ХIасана дзунашвачпагIвыз апхьарта «АйгIайра» ареспублика анахьанат аспорт апхьартаква рквтала рыцIа йагъьу йрыларпхьадзумцара йгIамгIвайстI. Араъа Россия йаспорт мастерта хгIвы дрыхIазыртI, аспорт мастерра йакандидатта – 35-гIв, йапхъахауа аразряд зму спортсмента – 75-гIв.

Абараса зуыс йазъазу агIвычIвгIвыс гватрадаъа дгьгIанымхатI. Асквш 1999 агIан физкультури спорти руысквала КЧР а-КъральыгIва комитет дапредседательта ддыргылтI. УацIыхъван йшгIацIцIхызла, ауи асквш хIреспублика ахъазла швабыж йхьантахатI.

Араъа ауи аполитика бзазара апны йщаквгылу азазаъащаква йылстI, дыздынхалра атахъугьи гIайгвынгIвытI. Асквш 2008 агIан йара ауи аъанатIа дадгылата хIреспублика аспорт атшауацIнарыхра йымч абгата йадигалтI. Физкультури спорти руысла Россия Федерацияла йлырхыз а-Хабза ажванахъаква гIайрысабапуамцара «Къарча-Черкес Республика апны физкультури спорти руысла» хабза апроект йрыхIазыртI. Ауаъа аспортсменкви ауат рбжьагIвчви рцхърагIара йазынархаз ажванахъаква гIарбан. Асквш 2010 агIан ауи йунашва йацIаз агвып йазалху ареспублика программа лырхтI, ауи апрограмма нарахвтI, афедерал программа «Россия апны физкультури спорти ртшауацIнарыхра ауысла» йаларцIатI. Апрограмма аспорт уыхвараква радгалра йазынархан, йызларуыхвушыз ахча акъраль рбюджети ареспублика рбюджети йацгIарылцIра атахъын (процент 95 йгьи хвпроценткI).

Ужвы ауат асквшква дрыквацапахуата КIвращын ХIасана йшихIвахуала, акабинет дыгIвначIвата дгьнымхузтI, ауралагьи аугIа дрылан, анахьанат акъалаква рпны дцалун, аспортсменква дрынйун, ауат ргIатгараква зымгIва дрыхагIвазан, закI ангIардамыхIврагьи гвалымста дгьгIанымхузтI. ЪанатIата дыздгыллакIгьи хъадата йпхьадзауа – ашIаква рбжьара ауыс – зынгьи дгьакъвымцIтI.

Ауи дыздынхалыз аспортсменква агIатгара дуква йырзынадзатI, Россия ачемпионат йапхъахауа йгьи йгIвбахауа адивизионква ргвыпква йрылата футбол йаситI: Тльыс Артур, Шарипов Даниил, Кьанджьа АхIмад, КIвращын Азамат, Жуков Дмитрий, Фомин Василий.

Ауат дрыуапI асквш 2005 агIан Россия а-Чемпионат апны арызна медаль зквнадыргаз Павлюченко Романгьи. Ауи Россия йадыркIылыз агвып дрылата футбол даситI. Згвы цхIауата йынхауа абжьагIвы йгIадзынйыргылуа аспортсмен шIа йыхъазла араса йхIвитI: «Ауи дымгIащауата йара-йара йылахь йсайитI», – хIва. Абауи апшта Роман КIвращын ХIасана данйызгIай жвсквша ахIа дгьыртамызтI. ДышпагIайгвалашвахуа ауи йапхъахауа йбжьагIвы? ТIакIв дамлага-хIгIата, дхъышта, зынгьи атопасра ашайымрысуата… 17 сквша анихъыцI Павлюченко «Ротор» дрылата футбол дасныс днарахвтI. Абаружвы Англия апны акIвпI йылахь ъайсайуа.

ХIасана Щамсадин йпа йынхара уысква ращтацаща дазхъвыцуата, йгIаджвыквицIаз ауыс дамайчуа ацIыхъва йнайырдзауата акIвпI дышрыдгылуа. Зыбызшвала йапшым ашIаква ауи ашвхIаусыгIвала гвыбгъан зынгьи йгьгIарбжьашвум, ауаса КIавкIаз апны йщаквгылу ацIас бзиква зымгIвагьи йынкъвдйыргитI.

Йара йунагIва апынгьи бызшва щарда быжьгитI, араъагьи апхъанчIвиква рцIасквала йбзазитI, йара ауаса зымгIвагьи футбол бзи йдйырбатI. ЙпахIба Азамат футболасра йъачIвагIата «Спартак-Белгород» дрылапI. АйцIба Альбертгьи йбзазара футболдъа йыла йгьйызгIацIажьуам. ЙпхIа Альбина журналистта ГТРК «Къарча-Черкес» апны дынхитI.

КIвращын ХIасана физкультури спорти руысла йагъьу дынхагIвыпI, Къарча-Черкес Республикалагьи Россиялагьи гIатгара зму дбжьагIвыпI. УахьчIвала ауи КЧРООГФСО «Россия ашIара» дапредседательпI. Араъа ауи ауыс шIыцкви агIатгаракви тшырзынайырхитI. Ауаса ужвыгIандзара дминистркIвазшва акIвпI ачкIвынчва штшгIайзынадырхауа, йызлайыдгылуа ауыс цIыхъва шайтуаш рдыритI.

ШвкIыгIвпхьадзара йнадзауа асабиква ауи йнапIы йыцIсхьатI, ргвылагьи рызгIвадаралагьи йбагъьахатI. Ари аъачIвагIа даланхауищтара мурад хъадата ХIасана йыму ари акIвпI: ашIаква рхIаль-шанквала багъьата рщапIы йхвынйыргылныс. ЙшпакIву ухIварыквын агIвычIвгIвыс йхIаль-шан абагъьара акIвпI йылахь злайсайуа.

Ешерова Муъминат, джурналистпI, Черкесск.
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki