Library

Дагвжвей МухIадин Закьарыйа йпа асквш 1934 июнь а 1 атшын дйытI, жвсквша анихъыцI Къвбина кыт апхьарта йапхъахауа акласс дыцIалтI, асквш 1951 агIан быжькласскI дгIарылгатI. УадыргIвана Черкесск йтагылу апедучилища дыцIалтI, ауаса йгIвбахауа акурс амщтахь арра къвырльыкъвхара дызшIырттI. Къвырльыкъв йхата дангIацапах ажвлара апны апсахраква шгIаншаз гвы айттI: апхьара даныцIал йыцапхьуз акытква йгIартыцIыз ачкIвынчва йрыуан, ауат мгвалагьи чгIвычалагьи йбжан, асквш 1956 агIан апедучилища апны йапхьаквуз рквпшыралагьи раъащаквалагьи йдатшан ¬¬– рыцIа бзита йгIвычан, ахIвсса акосметика пкъыгIваква гIадрысабапуа йалагахьан, чкIвынргIа вальснадзара йзыгIахIвуан.

Анахьанат абаза гIвгIвчва рапшта МухIадин Закьарыйа йпагьи йыршIыйара уысагIвта йджвыквицIатI: асквш 1958 июль а 24 атшын йапхъахауата йуыса «ЙхътIу ашва» гIаквырцIатI. Йара ауи асквш педучилища дгIалган нхара Къалмыхшта дырщтитI, гIвысквша апычIвклассква дырарыпхьагIвта дынхатI. Асквш 1960 агIан йцришта дгIайхын Къарча-Черкес педагогика институт дыцIалтI. Хвысквша руацIа йызпхьауа апрограмма пщысквшала дахъысын асквш 1964 агIан дгIалгатI. Аинститут амщтахь Къвбина квтанай апхьарта апны дарыпхьагIвын, обллит апны, аобласть гIвырагIацIщтырта апны, аобласть радиуа абаза бызшвала аредакция апны редакторта дынхатI, арыпхьагIвчва рдырраква йъарыладырхIауа аинститут апны дметодистын.

МухIадин алитература тшадикIылуа даналага аинститут апны данапхьуз асхъан акIвпI. Ауи йгIвыраква агазет анапаква запыт йгIарыквшвалун. Йуысаква йапхъахауа разкIкIра «АшIара амгIва» асквш 1967 адуней йгIаквылтI, гIвысквша анахъыцI йпоэма «Щахахра» кIьыдата йгIацIцIтI, йхпахауа йазкIкIра «Агьарпагьаджь ащтала» (1980) апны Дагвжвей МухIадин апроза тшазынайырхатI, йпщабахауа акнига «НартргIа рахIва» (1984) апны йгIашIарышвта абаза литература апны зуыс рыцIа йльальаз адрама ажанр йгвы аквкIта дадынхалуа далагатI.

ЙхIаль-шанла МухIадин Закьарыйа дшаквкIыпI, ауыс акъыльпшгIарала дадгылитI, йнардзата дадынхалитI. Ауи акIвзапI йаргьи СССР агIвгIвчва р-АдкIылра кIьасата дызнарахвыз, асквш 1989 агIан, йхвбахауа йкнига – агIахIвахракви ахабаргIвыракви разкIкIра – ангIацIищт амщтахь. Алитература нхара заман щардагьи къару щардагьи йыквнахуа йанца йынхарта йпсахтI. Анхарта шIыц абыжьдукви аугIа жвпIари йырчвыхъаран. СахIатпхьадзарала йхъазыта, заджвгьи дгIайымзарархауата дынханыс йылшун. Абарат асквшква рагIан йщаквгылтI ацIыхъва йгIацIцIыз ароман «Ббзаза, Рина» (1997) афырква ртурасква. УадыргIвана Европа апны рыцIа йпхатшу агрокомбинат «Южна», ауи йхаквлагIвчва рпхыцIа йызлапщылу, щтата йгIаннажьуа йгIарыквчважвауа акнига агIвра йгвы йгIаташватI. Акомбинат ансимш бзазара джьащахъварата, лкIгIарата йалу гIаййырдырныс, йылаквала йырхъвыхныс ахъазла араъа нхара далагатI. Йгвы йтайкIыз абзазара йызлалайжьыз ароман «АгIвадыгь ашIысыртала» – хIва (2009) йахьызпI.

ЙцIыхъвахауа йгIвыраква рпны Дагвжвей МухIадин хIугIахъа ртурых атемаква хъатазкIуа дыршIымпшуата хIуыжвгIанчIвиква рбзазара атема дадынхалитI, цIолата йгIахъититI, бызшва джьащахъвала даквчважвитI.
УахьчIвала ауи абаза литература апны зыхьыз дута йырхIвауа дпрозагIвгIвыпI, ддраматургпI, пенсия даъазтIхIва дамайчуа алитература дадынхалитI.

ЧкIала ПIитIа,

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki