Library

Цекъва Пасарби Квчыкв йпа асквш 1922 сентябрь а 1 ЙынджьыгьчкIвын кыт апны дйытI. Асквш 1926 агIан ртгIачва Мало-АбазинcкIа йталхтI. Апхьарта апны быжькласскI дангIарылга Черкесск йтагылу педучилища дыцIалтI. Асквш 1939 агIан ауаъа дгIалган абаза газет аредакция апны йынхара джвыквицIатI: апхъапхъа корректорта, уадыргIвана – литература уысква дрыдынхалыгIвта. Йара ауи асквш декабрь а 5 «СталинскIа Конституция» – хIва ахьызта йапхъахауа йуыса агазет анапаква йгIарыквшватI. Ауи анахьанат ауысаква ащтагIайуа, йгIаквшвауа йалагатI.

Асквш 1941 август мыз агIан арра къвырльыкъвхара дызшIыртын йапхъахуз апщмызкI руацIа Волгоград йтагылу связь ауысла аучилища дапхьатI, ауи амщтахь йпщбахауа ахIауа десант бригада авзвод акомандир дицхърагIагIвта дрыларцIатI. Асквш 1942 агIан Армавир аргван йакIвшуз айбащраква рпны гъарта дыркIытI. ГIвымшкI анахъыцI жвыхвсквша зныбжьыз Меркулов Виктори йари гIардахтI.

Асквш 1949 йгIашIарышвта Пасарби Квчыкв йпа Абаза-ХIабльа йгьи ТIапIанта апхьартаква рпны арыпхьагIвта дынхатI. Арыпхьарагьи аршIыйара нхарагьи ацйырцун: асквш 1950 май мыз гIвуысакI гIаквицIатI, ауат рымщтахь айсра амщтахь йапхъахауа апоэмаква йрыланакIуата апоэма «АкIварбах» йгIвытI. Йара ауи асквш ауацIа абаза бызшвала йатайкIын Каверин В. йхабаргIвыра «АхъацIара апхьарта» гIацIищттI. Асквш 1955 агIан Пасарби Кожевников В. йроман ду «Йбзу дзы» атайкIын йгIацIищттI. (Ари абаза бызшвала йапхъахауата йгIацIцIыз романпI!) Йара ауи асквш датшагьи магIны зму уыскI ншатI: июнь а 23 йуыса «Атшыхча йашва» агазет йгIаквшватI, ауыса макъым азгIайаутI. Ари ауарадла лирика ашва жанр атшауацIнарыхра джвыквылтI. Пасарби Квчыкв йпа асквш 1950-ква, 60-ква рагIан абари ажанрла йынхуз ауысагIвчва дрыуахъадан.

Черкесия аугIахъаква дара ртахъырала Россия йалалищтара йцIуа асквшпщышв йадахIвуата асквш 1957 агIан Москва апны Къарча-Черкес алитератури аршIыйара рдекада акIвшун. Агвыргъьахъв концерт а-Колонна Зал асцена апны СССР-ла аугIа рартист Пашенная Вера «ДзыгIв щарда шалачIвауа апш» – хIва йзхьзу Цекъва Пасарби йуысала йгIахъылтIытI. АнапIсра ду тшгIащтIнахтI! УадыргIван актриса азал ахьыла дцIрытI: «Автор асцена дгIахъалыргIатI!» – лхIван. Пасарби Квчыкв йпа асцена дхъалтI, йнапIы йгвы йаквикIын азал йыгIвначIваз зымгIва квырмыш рзичпатI. Ауыса «ДзыгIв щарда шалачIвауа апш» Епанешников Л. йатайкIта том гIвышв йнадзауа «Адуней литература абиблиотека» йалашватI.

Асквш 1957 Пасарби йуысаква разкIкIра «СыквлагIв йыхъазла» урышв бызшвала йгIацIырщттI. Йара ауи агIан абаза гIвгIвчва рпны зымгIва драпхъахауата СССР агIвгIвчва р-АдкIылара днарахвтI. ЙащтагIайуаз асквш агIаталымта РСФСР ЙхIаракIу а-Совет а-Президиум ащаквыргылрала ЧIахIныгIва грамота гIайквнадыргатI.

Асквш 1959 Джыр ХIамид йажвала Пасарби тгIачвала Черкесск дталхтI, «Коммунизм алашара» газет аредакция апны дынхауа далагатI, асквш 1961 йгIашIарышвта – аобласть радиуа абаза атраквала ахъвшара апны редакторта дынхун. Асквш 1966 август йгIашIарышвта асквш 1967 июнь мыздза Москва Литература институт апны йхIаракIу алитература курсква дырхъыстI. Пасарби йыршIыйара жвыхв книгакI гIацIанакIитI (абаза бызшвалагьи йатакIугьи алата). Ауат йрыуапI ауысаква, ашваква, апоэмаква разкIкIраква, асаби гIахIвахраква разкIкIра, ххъвыкIла йалу ахабаргIвыра «Ащхъаркт ащахахра», гIвхъвыкIла йалу ароман «Къазма».

Цекъва Пасарби йгIвыраква рщарда атурых йазынархапI, ауаса магIныта йрыму бергьльыпI: ауат йаназаману йгIанымшазарквын, алитература атшауацIнарыхра йацымхърагIазарквын, ауи зламгIвайсуаш амгIваква лнамкъьазарквын уахьчIвала абаза литература ззынадзаз ахIагIарадза тшшщтIнамхныс аурын.

Йапшым ажанрквала йахъыхацIыху Цекъва Пасарби йгIвыраква абаза литература амч ангIаталуаз уыс ду дырхъйатI, ауаса йашваква зынгьи жвыра гьрыхьуам. «Дуней дукI йыквшвуш аъара ашва гIанйыршатI Пасарби, – йхIвитI ауи ауысла ТIыгв Владимир. – Ауат рыуа щарда аугIа йырчIвхатI. Ауат аугIа йырхIвитI, бзигьи йырбитI». ТхIайцIыхв Бемырза ари ахъвыцра рахIагьи йрыбагъьахтI: «Цекъва Пасарби йашваква ракIвымкIва датша закIгьи йымгIвызаргьи абаза культура апны йыхьыз аналькъвытнальмаста йгIалкIкIгIушын». Ауи Цекъва Пасарби абаза лирика ашваква дшыргIаджвыквцIагIву, уадыргIвана йбергьыльхаз абаза композиторква: Гваджьа Абракь-Зауыр, Гваджьа Галина, Йуан Муса, ЧквтIу Владимир – зламгIвайсуаз амгIва шырзыликъьаз гIаликIгIатI.

Араъа йгIалкIгIара атахъыпI: Цекъва Пасарби ауарадква йара-йара санрыкьтара дасуамцара йшихIвалуз. Ауи ауысла Муратыкъва Николай йгIайгвалашвахуан: асанрыкьтара ауи йыхьазла йгьикъвабызын, йгьипхарчIакьын, йгьидауылын.

Цекъва Пасарби швабыж дгIвычIвгIвыс гвапан, дгIвынгIалын, агвып зджьара йгIанымхауата йрыпшдзун. «Ауи зымгIвагьи бзи дырбун, – йгIвитI йбергьльу абаза литературадырыгIв ТIыгв Владимир. – Зынгьи закIгьи йампхьас аугIагьи йырдыруан ауи йыхьыз. Йашваква йрыздзыргIвуан, йырхIвун. Йынйата йабадырыз рыуа заджвгьи зынгьи дгьихъаштылхуам: ауи абзазара анурква гIайылцIуазшва гвырбзига дута зымгIвагьи дырзалуан».

Зны дчмазагIв хIатлата, йзгIва хвышхIва шамам, йынцIра шайшысхазгьи йдыруата йынбжьагIвчва дырбарныс йызцатI. Йлакта ъанашхыйамыз, гвыргIвакIгьи ъагIанымпщуаз Мыхц Кьарим швабыж йджьайщатI. «Ауи акIвмагьи сызчвшвушI», – йхIватI ауи агIан Пасарби апсра ахъазла тIакIв длакъырдуазшва.

Ауи асквш 1984 декабрь а 14 атшын адуней йхIваджьтI. АгIсквша анцIы Грушка кыт аквтанай апхьарта Цекъва Пасарби Квчыкв йпа йыхьыз ахьырцIатI.

АгIвгIвы, ауысагIв, ашвагIвоу дгIайыквчважвауата Тльабыча Мира лгIвыра уахьчIва хIызквгIацапахныс хIтахъу ари ахъвыцрала далгитI: «Цекъва Пасарби абаза уысара апынгьи апрозагIвра апынгьи йапхъадзахауа
акъыжква лызгаз дрыуапI. АлитературагIвыра апны ауат йапхъахауа акъыжква – рыцIа йщацарадзу, рыцIа йхIатладзу ачIвырхъаква йрыуапI. Йгвасрадзугьи – ауат акъыжква йгIайуа абанпараква рпны зынгьи йырквнагу рыхв гьрадзахуам, йгIаншитI йанырхъаштылдзахуагьи ауат лызгаз ргIапсара. АйхIара ауи ъагIаншауа ажвлара хвамыхвква рпны акIвпI. Анчва, йнаумырдзан ауат рпны абазаква».

ЧкIала ПIитIа,

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki