Library

Асквш 1930-ква ргIаталымта, абаза бызшва алфавит ангIанша амщтахь, Тобыль Тольыстан дйыцта зынла арыпхьара уысквагьи, алитература уысквагьи рырхъйара далалтI Уаз НыхIв Абрам йпа. Ауи асквш 1900 агIан Апсуа кыт апны дйытI. Ареволюция апхъала гIарып бызшвала адырраква гIайыквшватI. Теберда апны архъвыхраква дрыцIстI, ауи амщтахь махвыр дугьи зквыз адиплом гIайыртатI. Адин ауысла адырра цIолаква ъайымаз абзирала Уаз НыхIв гIарып бызшва бзита йдыруан, а-Къвыръан хвитта дапхьун, йгIаныцIуаз атайкIуан. Айфандква данрайбжьузгьи гIаншун: «ГIарып бызшвала швызпхьауа ауагIа йгьгIаргвынгIвуам, йгIаныцIуа абаза бызшвала йрашвхIвхла», – хIва.

Уаз НыхIв акыт апхьарта апны арыпхьагIвта дынхатI, уадыргIва Черксск апны (асквш 1925 йгIашIарышвта) НКВД апны датакIгIвын, агIвырагIацIщтырта апынгьи дынхун. Черкес бызшва йдыруанта ачеркес апхьагIвчва рыхъазла йгIацIырщтуаз апхьагаквагьи дрыдынхалуан. Асквш 1931 агIан черкес бызшвала йатайкIын йгьигIацIищттI напа 31 йнадзауата Конель В. йгIахIвахра «Ан лрыцхIагIа».

Уаз НыхIв абаза грамматика ауысла профессор Генко А.Н. йпны апхъапхъадза адырракви абжьагажвакви гIазквшваз дрыуан. Ауи ахIатырла абаза бызшвали алитературали йапхъахауа апхьагаква рыдынхалрала ахачIвква зпахь йгIадыргылыз дрыуан.

Асквш 1934 агIан абаза бызшва аграмматикала Уаз НыхIв йгIвапхьагакI гIацIцIтI (йхпахауа йгьи йпщбахауа аклассква рыхъазла), ауат рымщтахь апхьара бзита йзымдыруаз рыхъазла апхьага кIьыда гIанйыршатI. Ахрестоматия йалашваз атекста рщарда атакIран. НыхIв ауат анатайкIуаз псахра рылайцIун, афырква рыхьызква абаза хьзыла йпсахуан, ашIыпIа хьызква аналазгьи хIкытква рпны йырдырквауа ашIыпIа хьызква гIайырбун, йгIазквчважвуз араъа йапхьауа асабиква йшгIаргвынгIвуаш апш дадынхалуан. Ажва ахъазла, Салтыков-Щедрин й-«Матренка» НыхIв йпны «Марйам» – хIва йахьызпI, Неверов А. йгIахIвахра «Авдотья лбзазара» йара «Щаща лбзазара» – хIва йацайырпатI, Чехов йгIахIвахра «Хамелеон» йалу аполицай Очумелов агIахIвахра «Чваргьа-чврыс» (ахьыз ауаса йгIвытI) апны Гапф Фукан зхьзу старшината далайцIитI, Шолохов йфыр акоммунист Давыдов Семен йцынхъвы йгIахIвахра «Аколхоз рпны асоцацлыбра» апны ЛагIвычв СахIат дгIарбапI, ауасамцара.

АтакIраква йырхъазымкIва Уаз НыхIв йара йгIвыраквагьи дрыдынхалуан. Ауи апшта, литературала апхьага ачвгьахагIвчва йырщыз КIвыдж Рамазан далайджьабауата йара йуыса хвыц «ДгьахамдзатI» алайцIатI, агIахIвахра «Муса йымгIва» ареволюция апхъала арыцхIа йтгIачва гIазабта йрыквыз асуратква гIайырбитI, агIвыра ду ашIчIвара «ЙгIаржьатI» апны абайаква арыцхIаква ржьата абольшевикква йшгIарпшIадыргылыз дгIаквчважвитI.

Уаз НыхIв йгIвыраква лкIгIарата йрыму арат ракIвпI: йыбызшва майрапI, ауагIа рчважваща йаргванпI, дгIазквчважвауа агIаншараква абзазара йгIаквхпI, афырква раъащагьи рчважващагьи нахвапI. Ауи афырква рнашх штшапсахуа, дзачIвызлакIгьи дызлагIарылхIвауа, йгIаншауа азазаъащата йазрыму шапшым агьиква йалыргата йзыгIарбитI. АуагIа рпсихологиянадзара гIахъитIитI. АгIвгIвы йхъгалраква йрыуата тамамта йпхьадзауа ахъвыцща апхьагIвгьи дазйырцитI. Уаз НыхIв аршIыйара ахац йылан, ажва хвы аквицIун, хвитта йызгIарысабапуан, абызшва апшдзара йзыгIарбун. Абарат алкIгIараква апхъапхъадза йгIаншаз йлитература гIвыраква рпны йзыгIарбатI.

Абари агIвычIвгIвыс абаза литература ащаквгылра апынгьи асабиква рарыпхьара апынгьи лшара ду шйымаз гвынгIвырапI, йынцIра рыцIа йауыразарквын. Швабыж йгвасрапI, ауаса Уаз НыхIв йарыпхьара уысквагьи йыршIыйара уысквагьи зальмагIала йапыркъьатI. Асквш 1935 ноябрь а 11 агIан ауи мцкIыла дыркIын Черкес автоном област ахIаквымхарта ащаквыргылрала жвасквша йыквырцIатI, йымлыквгьи гIайыквырхтI. ДаныркIуаз асхъан йыпшцIа апны йгIацIищтыз апхьагаква йырхъазымкIва йнапIлагIвыраквагьи аквырпсан йырблытI.

НыхIв Абрам йпа Мордовия йтагылу Потьма станция йжвизхауа алагер апны дтан. Айсра гIаламгаскIва гIвымчбжьа рапхъала йуыс йаквгIацапахта шIыц-шIыц йшалапшхуашла, ласыла йунагIва дшадгылхуашла ахабар йъахIыльчва йырзыгIайыгIвтI. Ауаса айсра гIалаган йуыс заджвгьи дгьаквгIацампахтI. Ашвъаква йшгIадырбауала, асквш 1942 июнь а 10 атшын алагер дштаз азгIва дагатI.

Асквш 1980 октябрь а 29 агIан РСФСР ЙхIаракIу а-ХIаквымхарта а-Президиум Уаз НыхIв Абрам йпа льажьа йымамкIва дшыркIыз щаквдыргылтI, йкъванчагIа йыквырххын ддырзахвахтI.

ЧкIала ПIитIа,

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki