Library

Тобыль ИсмагIиль Бубакьыр йпа асквш 1918 агIан АлбыргIан кыт апны дйытI. Апхьарта дыцIаркIвата йыгIвзачва швабыж йыргвапхуз апьесаква йыгIвуа далагатI. Актерква руыс дукI йшазычпамызгьи, фаша пшдза шрымамызгьи апьесаква акыт аклуб асцена апны йандыргылуаз ауралагьи уагIа щарда гIайззалун.

БыжькласскI дангIарылга амщтахь ИсмагIиль Черкесск йтагылу педучилища дыцIалтI. Йапхъахауата йгIвыз ауыса «Аленинецква» асквш 1935 август а 31 атшын «Черкес пльыжь» газет абаза бызшвала анапа йгIаквшватI. Ауи щарда дыгIвуан, ауаса зынла йгIаквицIаныс дгьымгвжважвузтI: йыгIвуаз щтIайцIун, заман тIакIв анахъысра даквгIацапхуан дадынхалхуанта гвыгъара ду йзызмаз Тобыль Тольыстан дайырпшуан, дйайкьангьашуан. Тольыстан йгвапхузтын анахьанатгьи йдйырбун. Швабыж дсакъын, аквайчIвагIвыраква гькIайымпсахуазтI, апхъа йгIвызи ацIыхъва йшцази ашIйырпшыхлун.

Асквш 1939 сентябрь а 1 йгIашIырышвта Тобыль ИсмагIиль АлбыргIан апхьарта апычIв классква рпны арыпхьагIвта дынхауа далагатI. Абашта айсра Ду ангIалага йгIашIарышвта йалгандзыкIьара ауаъа дпшцIан. Атанк рхъвы дрылата Албания йантысуаз асхъан хIадагIвачата ареволюция апхъала ауыла йхъысхыз абазаква дрынйатI. Ауат согIата «Албан танго» зныз апластинка гIайыртатI. Айсра анакIвшуз зны ахъвахI даквчIвата амина йгIагвнажван мачIкI атахъхатI адзы дахъватшхуан. Айсра амщтахь йан араса лайхIвлун: «Бара бъамыр акIвапI сара сгIазхчаз», – хIва.

Айсра амщтахь йцри кыт апынгьи ЙынджьыгьчкIвын апынгьи арыпхьагIвта дынхатI, КПСС а-ХIабаз райком ахъвшара даунашвачпагIвын, Черкесск йтагылаз арыпхьагIвчва ринститут дыцIан, асквш 1955 агIан анхара йацйырцауата Ставрополь пединститут историяла афакультет ахьыла дайтыпахын дапхьун. Асквш 1959 февраль мыз агIан апхаста (амашинаква рапшIахра) даладзтI. Адуней анихIваджь амщтахь йгIащаквхаз йнапIлагIвыраквала ароман «Азамат» гIацIырщттI. Ауи ахьызгьи аредакторква ракIвпI йахъадззыргылыз.

ЧкIала ПIитIа,
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki