Library

Тльабыча Мира СахIатгьари йпхIа асквш 1942 июнь а 1 атшын Хъвыжвду кыт апны дйытI. Асквш 1949 агIан Хъвыжвду апхьарта дыцIалтI, аршIыйара дшIадзата дхънахтI. Йапхъахауа ауыса йхпахауа йа йпщбахауа акласс дыцIата йалалцIатI, йыззынархазгьи ларыпхьагIв лакIвын. Мира ларыпхьагIв ауи аъара бзи дылбунта тыхIа дцата датша кыткI данталх лгвы йыцIалчван уахъынла ахъыза дыцIата дчIвыулун.

Йхвбахауа акласс дангIалга Мира аобласть апхьарта-интернат дыцIарыжьтI. Ауаъа дапхьауата асквш 1957 декабрь а 7 атшын йгIацIцIыз абаза газет анапа ауи луыса «ТIима» гIаквшватI. ГIвысквша анцIы, асквш 1959 октябрь а 24 агIан, йара ауи агазет анапа луыса «Скаца шкIвокIваква» гIаквырцIатI. Абари ашIырпшыра анцIрала лыршIыйара йахцIарата йгIащаквхатI. Йара ауи асквш Мира апхьарта дгIалгатI, Къарча-Черкес педагогика институт дыцIалын сквшыкI дапхьатI, уадыргIвана Москва Литература институт дыцIалныс гIалтахъхатI. Лтахъыра гIалдахIвын асквш 1960 агIан Москва йтагылу Горький йыхьыз зхъу а-Литература институт дастудентхатI.

Абаза уысара атурых хIырхъвыхырквын Мамата Зурагьи Эбзей Сонягьи Мира лапхъала руысаква йара ауи агазет анапаква йгIарыквшватI, Мира луыса йацта Шхай Екатеринагьи луыса йара номеркI анапа йгIаквшватI. УадыргIванагьи абаза пхIвысква рыуа йапхъахауа йпрофессионал уысагIвхаз Мира СахIатгьари йпхIа лакIвпI. Араса йызцазгьи ауысара рыцIа лгвы ъакIвкIыз йгьахъазым, аршIыйара рыцIа дазычпан.

Москва апны апхьара асквшква, ауысара асеминарква ракIвыршаща ауи адуней культура дахадыргIвазатI, лыршIыйара агIвынаква рыцIагьи йауацIырхтI, ащайдза дрыбагъьатI, лъазара рсайтI. Ауи йащтагIайуата асквш 1969 агIан СССР агIвгIвчва шIаква йхвбахауа райззара апны луысаква хвду рыквырцIауата йрылачважватI.

Абаза уысара апны Мира апхIвыс лдунейпшыща, абзибара азазаъащата йазлыму, лпшкара, йчвалатшычпарам лхътIыра лзыгIарбатI. Луысаква йрылубгIитI лхъа дшазыъаз, дгIакIвзыршауа ауагIа лыла йшгIацIалуаз, абзазара апны йлызгIаныжьуаш ащта дшазхъвыцуаз.
Ауаса Тльабыча Мира луысара амагIны рыцIа йдупI: алирика амакъымква рыцIа йцIолапI, пщсатыркIла йалу ауысаква уысара псы гIархъалцIатI, амаль шIыцква гIахъылтIытI, ауысара хъвыцщи ашIырпшыри рыцIа йауацIыхта йгIалырбатI. Луысаква рритм псы зхъу чважвара макъымта тшапсахуа йымгIвайситI, агъвгъвара апны йпшгIауамцара зныкъварта гIазауа адзыгIвчкIвын йашIырпшы йауаштI.

Тльабыча Мира дуысагIвдзан, шIырпшыра, макъым шIыц щарда дыргIаджвыквцIагIвын, лцIыхъвала йгIадзынгылыз ауысагIвчва рыршIыйара апны ауат рбыжьква абгата йщаквгылтI. Мира луысара апны апхъапхъа йгIаншатI акаца шкIвокIваква, амгIващква, акIьанджьаква, агъбаква ршIырпшыраква, ауат уадыргIвана абаза уысара апны хцIара турасы йтагылуата йщтIыцIтI, ргыларта багъьа щаквгылтI.

«Тльабыча Мира луысаква рлирика макъым апшкара, йхътIу ллахIвараква псы рхъазшва ухъырхуата йаъапI, – хIва лгвгIанаграква хIыцагIвылшитI Друнина Юлия. – Йкьахву йгьи йнашхыйу луысаква агвапара пшкала, абзазара йазлыму йцкьу абзибарала, пхарала, нур лашарала йырчвыпI». Кулиев Кайсын араса йхIвун: «Луысаква адгьыли ачIахъви рфыгIвква гIархъыцIитI, КIавкIаз ауысагIвчва рабанпара ахIбачва рыршIыйара йгьапшым, йуызмыргIващауа агIвычIвгIвысагIа апхарагьи, чвалатшычпара злам лпсыпынкъвгарагьи гIарныпщитI».

Тльабыча Мира асквш 2011 сентябрь а 28 атшын адуней лхIваджьтI, лцри Хъвыжвду кыт апны дыцIарцIатI. Асквш 2012 июнь а 1, сквшы 70 анылхъыцI атшын, лцри кыт аквтанай апхьарта апны чвахъабага гъвы гIахъыртIытI, лыхьыз зхъу акласс гIандыршатI.

ЧкIала ПIитIа,

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki