Library

Асквш 2005. Йапхъахауата асцена йгIаквылтI, апшыгIвчва йрынйатI… ЧIащыгIвари пшдзари зщардаз, зыршIыйара шIырпшыра амамыз агIахIвра театр «Меркурий» зынла абгата унанауахвуан, зымгIвалагьи йджьащахъван, йара йгIаннаршаз аджыпха йтагылан.

Меркурий from ALASHARA on Vimeo.


АгIахIвра театр агIаныршагIвы, ауи азаман «Меркурий» йапрезидентыз Дер Стас, мурадта йпахь йыргылыз ари акIвын: «ЗымгIвалагьи йхIаракIыта хIреспублика йадамыгъа пшдзахара атахъын ауи, хIреспублика йахъазымкIва КIавкIаз шабгу гIауахвыргьи апш аъамкIва».
Атеатр ршIыйарала унашва ахъицIаныс Апсныла йгьи КЧР-ла гIатгара зму артист Таниа Валерий дгIадрайгватI. Ауи агIвычIвгIвыс гвымчIва, гврыхва йгIайырбаз аъазара йабзирата гIамта айшысла агIахIвра театр «Меркурий» ахабар хъарата йгатI.
Ажва бахква рацкIыс атеатр аунашва апхьадзараква рыцIа нахвата йгIаудырбитI. Музыка ауыслагьи абжьы ардура йазалху ауыслагьи аппаратурата йрымаз тоннкI айхIа гIаначакьуан, аконцертква рыхъазла йырзырдзахыз ачгIвычаква комплект 200 йнадзун. Дара йырзалхта, йрыцынкъвырга йауата сцена бзи рыман. МшигIадза рахIа йанмачIу цсахIаткI аъара йынхун, ръазара щаквдыргылуан, йаладырхIун. Пхдзыта йкIарчвуз швага-зага гьамамызтI.

Абараса йаъан ауи азаман агIахIвра театр «Меркурий» – хIва йызпхьуз. Абараса асквш 2006-дза йгIамгIвайстI, Дер Стас абзазара далцIынцIкIьара. Зны йаквымшваз атшыбжьара сахIатква рымщтахь агвып дыркъвыцIхтI Таниа Валерийгьи. Зъазара швабыж йхIагIу, анхара апны агIвщт зымчпуз ари агIвычIвгIвыс агвып йгIарылашваз аквымшвараква гьизымчхIатI, ауи ахъахьгьи атеатр ахчадъа, цхърагIарадъа йгIанхата йаъан. Ужвы «Меркурий» йауата йгIащаквхаз агвып Къарча-Черкес агIахIвра театрхIва йрыпхьауата ареспублика къральыгIва филармония апны йынхитI.
РшIыйарала агIахIвра театр унашва рхъызцIауа КIьыщмахва Валерий йхIвахитI агвып агIыла шIыц-шIыц йшадикIылхуа. ЙцIыхъвахауа апщысквша руацIа ауи ауысла йылшаз гьмачIым. Сквшы 20 зхъатала асцена йхвынгылата йгIахIвыз ари аъачIвагIагIв гвалымста дгIанхарныс, хъатакIла дгIапшуа дгылырныс йхъа йгьизаквымцIатI. АчкIвынчва йыргвышхватI, бзигвыгъа рылайцIатI. Рыуа дзачIвызлакIгьи бзи йбауа агIахIвра шизагIарбуш хъаййырцIатI.
КЧР-ла аршIыйара апны гIатгара зму анхагIвы КIьыщмахва Валерий йунашва асквш 1963 йгIашIарышвта йбергьльыпI. Ауи атлахан зыхьыз дута, хIагIата, хъарата йгуз акъральыгIва ансамбль «Эльбрус» дрылата дгIахIвуан. Ауи агIамта зымгIвалагьи пшдзата, йгвы йгIаткIкIгIауата акIвпI йара йшгIайгвалашвахуа. Ауат йашIамсуата йынхун, акъраль ашта аргванквагьи ахъараквагьи гIамырдун, ргIахIвраква заджвгьи гвалымста дгьгIанырымжьуазтI, дара агIахIвчвагьи гвышхвара ду гIарылалуан.
Абар ужвы агIахIвра театр агIахIвчва заджвы-заджв, гIвыджь-гIвыджь йазыркIкIыхра атахъхатI, йъагIвнанхуш апещгьи агIаура гьмайрамызтI. УахьчIвала анхара ахъазла рыцIа йхъаду аъаща йтагылапI – агIахIвра йазгIашыкъпI. Ауаса йызлагIамдуш автобуснадзара ужвыгьи йгьрымам. Агвып злащаквгылу агIахIвчва ъазаква тшадыркIылхтI: КЧР-ла гIатгара зму артистква Аджьбакь Валерий, Ажьи Анжела, Джьанымбей Арсен, ХIачвыкъва Валерий, Гаги Мурат, Йынгвыщштала гIатгара зму артистква Мыква МхIамат, Къвныжв Тимур. Ауат рхъа йадынхалуа йахъазымкIва йгIадзынгылуа айцIбачвагьи йрайбжьитI, рнапIы йгIацIаркIитI.
МчбжьыкI апны пщын 60-гIвы йнадзауата араъа атшыбжьара сахIатква акIвдыршитI. АгIсквша рапхъала швкIгIвы йнадзауата агастрольква йанцалуз руыс зквыз датшазтынгьи рыршIыйара къагIаркIвитI. Ръазара рыла йабаныс ахъазла апшыгIвчва азалква йрыгIвнамшвауата йгIайззалитI. Амакъым ласква йгIащтIырхуата агIахIвчва пшахъынхIвыта асцена йгIаквххитI, зуыс йазцIабыргу ахIбачвагьи райцIбачва дыргвышхвауата апшыгIвчва йрымбарыгьи йырзымчхIауата амакъым тшацырчпитI. Хъадата йыззхъарцIауа ари акIвпI: ужвыгьи аган амцабыз рхъагылазшва пшахъынхIвыта йгIахIвуаштI, йкIвашуштI.

Ешерова Муъминат,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki